Arau eta lege kuantikoak:

Uhin-funtzioaren kolapso-printzipioa:

Orain arte irakurritako guztiarekin, jakingo duzue dagoeneko partikulek portaera desberdina dutela behatuak direnean edo behatzeari uzten zaienean. Horregatik, partxis kuantikoan, jolasten ari diren pertsona guztiek begirada taulatik apartatu eta harrapatzen ez bazaituzte, zure partxikulak 10 lauki aurrera egin ahal izango ditu inork ezer aurpegiratu gabe. Mugimendua egiten harrapatzen bazaituzte, mugimenduaren aurretik zeunden lekuan geratuko zara; geroago harrapatzen bazaituzte, ordea, irabazitako 10 laukitxo horiek guztiz izango legezkoak dira.

Korapilatze kuantikoaren printzipioa:

Partikulak elkarri loturik daudela ere badakigu dagoeneko, eta horren ondorioz, partikula bati gertatzen zaionak beste bati eragiten dio. Eta zer esan nahi du horrek partxis kuantikoan? Bada, zure partxikula bat jaten badute, kanpoan dituzun beste guztiek ere etxera bueltatu beharra izango dutela (zure koloreko pasilloan bazaude, lege honek ez du eraginik izango). Partxikulak jan dituen pertsonak 10 lauki aurreratuko ditu jandako partxikula bakoitzarengatik (bat jaten badu, 10 lauki; 2 jaten baditu, 20 lauki; eta horrela hurrenez hurren).

Gainjartze-printzipioa:

Partxis klasikoan, dadoak 6 hiru aldiz jarraian erakusten badu, zure fitxa berehala itzultzen da oinarrira. Gainjartzeak, ordea, esaten digu, behatua ez den bitartean, partikula (edo dadoa, kasu honetan) hainbat egoeratan dagoela aldi berean. Horregatik, bi 6ren ondoren dadoa botatzen duzun hirugarren aldian, apustu bat egin ahal izango duzu hurrengo jaurtiketa 6 bat izango den edo ez. Apustua asmatzen baduzu (adibidez, 6 bat izango dela eta 6 bat dela esaten baduzu), 6 lauki gehiago aurreratuko dituzu. Apustua asmatzen ez baduzu (6 bat izango dela esaten baduzu, eta 3 bat tokatzen bazaizu, adibidez), partxikula hori bere oinarrira itzuliko da, 6 bat tokatu ez bazaizu ere.

Partikula-uhin dualtasuna:

Mundu guztiak daki kolore berdineko bi fitxak bidea ixten dutenean, beste koloreetako fitxek ezin dezaketela aurrera egin. Partxis kuantikoan, ordea, partxikulak partikula edo uhin bezala porta daitezke, eta, horren ondorioz, tapoi horretatik pasatu ahal izango zara 2 bat (dualtasunagatik) ateratzen baduzu. 2 hori ateraz gero, tapoia pasa ondoren berriz botako duzu dadoa, beste txanda bat izan eta aldentzeko aukera izateko.

Arau eta lege klasikoak (bizitza guztiko horiek):

• Etxetik irteteko, beharrezkoa izango da 5 bat ateratzea.
• Partxikula bat helmugara sartzean 20 lauki aurreratuko dira.
• Zure fitxa seguru egongo da segurtasun laukietan edo zure koloreko bi fitxa dituzun laukietan.
• 6 bat ateraz gero, berriz botako duzu dadoa.