Gaur egun, proiektu pilotu gisa hasi zen hori erreferentzia da Europan. Egiaztatu denez, epe luzeko begirada hau ezinbestekoa da gure garaiko erronka handienetako bati aurre egiteko: behar den talentua leku eta momentu aproposean batzea.

TALENTU GAITUA: BEHAR ESTRATEGIKOA

Talentuaren erronka ez da pertsonen departamentuei edo zuzendaritza-taldeei bakarrik egokitzen zaien zerbait. Aitzitik, Bizkaian bizi garen pertsona guztiengan zuzenean eragiten duen errealitatea da. Enpresa batek behar dituen profilak aurkitzen ez dituenean, bere garapena atzeratu egiten da, bere «berritzeko gaitasuna» mugatzen da, eta baliteke jardueraren zati bat deslokalizatzeko aukerari erreparatzea. Profil horiek aurkitzen dituenean, ordea, zirkulu bertutetsua abiarazten da: lehiakortasun handiagoa, enplegu gehiago, inbertsio handiagoa, bizi-kalitate hobea.

Nazioarteko hainbat ikerketak erakutsi dutenez, kualifikazio handiko enplegu bakoitzeko, bi eta bost enplegu gehigarri artean sortzen dira (horietako asko kualifikazio txikiagokoak edo sektore osagarrietan); hau da, oso gaituta dagoen talentuak biderkatu egiten du enpleguak gure lurraldean duen eragin ekonomiko eta soziala.

Bizkaian, Europako lurralde aurreratu askotan bezala, profesional kualifikatuen eskasia gero eta handiagoa da, batez ere STEM (Zientzia, Teknologia, Ingeniaritza, Matematika) arloetan. Arrakala hori larriagotu egiten da zahartze demografikoaren eta enpresek etorkizunera begira behar dituzten profil espezializatuen araberako lehia global gero eta handiagoaren ondorioz.

KONEKTATURIKO TALENTU-ESTRATEGIA

Bizkaia Talent-ek ikuspegi integral batetik ekiten dio erronka horri, hiru jarduera nagusirekin: tokiko talentua garatzea, talentu globala erakartzea, eta talentua lurraldean sustraitzea.

Talentuaren garapen hori hemengo talentu gazteari benetako aukerak ematean hasten da. 2014an sortutako gure Talentia programa unibertsitateetako gazteak Bizkaiko enpresa-ekosistemarekin lotzeko tresna nagusietako bat da. Abian jarri zenetik, 1700 ikasle baino gehiago trebatu dira zeharkako gaitasunetan, eta Bizkaiko enpresen erronketan lan egiteko aukera izan dute.

Lan hori ezinbestekoa da talentua lurraldean geratzeko; bestela, bertatik deslot liteke, ezjakintasunagatik edo merkatuarekin lotura eskasa izateagatik. Belaunaldi berriei Bizkaian etorkizuna ikusten laguntzea lehiakortasunean eta gizarte-kohesioan inbertitzea da.

Paraleloki, talentu kualifikatua erakartzeko ere gogor egiten dugu lan. Gure goi-mailako prestakuntzadun profesionalen sareak 24.000 pertsona ditu 110 herrialde baino gehiagotan, eta, haien jatorria edozein dela ere, hemen gertatzen denarekin konektatuta daude –edo egon nahi dute–. Gure atariaren eta nazioarteko networking programen bidez, behar dituzten profilak aurkitzen eta Bizkaian ezartzeko interesa duten profesionalekin konektatzen laguntzen diegu enpresei.

Hala ere, gaur egungo testuinguruan, ez da nahikoa talentua erakartzea. Horren ondorioz, enpresa eta profesionalen esku jartzen ditugu gure harrera-zerbitzua eta Spouses Programme bezalako programak (nazioarteko profesionalen bikotekideen gizarteratzea eta laneratzea errazteko). 2025eko lehen seihilekoan, dagoeneko, 171 profesional eta 77 enpresei lotutako 38 bikoteri eman diete arreta, beraien etorrera eta beste izapide administratibo batzuk errazteaz gain, ingurugiroarekiko duten lotura erraztuz.

ANIZTASUNA ETA INKLUSIOA: EZINBESTEKOAK ENPRESEN ETORKIZUNEAN

Tokiko biztanleria aktiboaren hazkunde mugatuko testuinguru batean, ezinbestekoa izango da nazioarteko talentua sektore guztietan sartzea. Behar demografiko hori aukera estrategikoa ere bada.

2025eko udari ongietorria emateko gure nazioarteko topaketa eta antzeko jarduerak –17 nazionalitatetako ia 60 partaide hartu dituztenak– gure ekosistema hartzen hasi den dimentsio globalaren isla dira. Iritsi berrien giza lotura sendotzeko jarduera soziokulturalek partaide izatearen sentimendua indartzen dute, eta gure lurraldearekin konektatutako nazioarteko komunitate bat eraikitzen laguntzen dute.

Nahiz eta talde anitzak dituzten enpresak berritzaileagoak diren eta nazioarteko merkatuetan lan egiteko gaitasun handiagoa duten, aniztasun hori kudeatzea zailagoa izan daiteke. Bizkaia Talent-ek kultura ireki eta berria bultzatzen du erakundeei egokitzeko prozesuetan eta bide honetan laguntzeko.

ERAKUTSI MUNDUARI

Harrigarria dirudien arren, lurraldeko pertsona gazte gehienek ez dituzte bertoko enpresak eskaintzen dituzten aukerak ezagutzen; eta, aldi berean, kanpoko profil kualifikatuek ez dute Bizkaia beraien radarrean. Horregatik, ez da nahikoa baldintza onak eskaintzearekin; horiek komunikatzen ere jakin behar da.

Bizkaia Talent-etik, ikuspegi bikoitzarekin ematen dugu bultzada. Alde batetik, enpresei laguntzen diegu beren enplegu-marka garatzen, eta aurrera egiten laguntzen diegu hautagaien eta enplegatuen esperientzia zainduz, beren antolakuntza-kultura hobetzen lagunduz, eta beren burua ezagutarazteko moduan aholkularitza eskainiz. Bestetik, Bizkaia talentuaren nazioarteko mapan kokatzeko lan egiten dugu, irudi koherentea, asmozkoa eta edukiduna proiektatuz.

Egokitze hori funtsezkoa da, talentuak ez baitu bakarrik lan bat bilatzen. Jomuga bat, ongizatea eta hazteko inguruneak bilatzen ditu; eta horixe da, hain zuzen ere, Bizkaiak eskain dezakeena ekosistema gisa duen proposamena modu bateratuan artikulatzea lortzen badu.

LURRALDE-ALIANTZA BAT

Erronka horrek edozein erakunde indibidual gainditzen duela jakinik, merezi du nabarmentzea Bizkaiko Foru Aldundiak Bizkaia with the talent estrategia bultzatu duela. Aliantza horrek lurraldeko dozenaka enpresa eta eragileren parte-hartze aktiboa du, eta Bizkaia Talent-ek funtsezko rola jokatzen du STEM arrakala murrizteko, Bizkaiak behar duen talentua aktibatu, erakarri eta fidelizatuko duten konpromiso erreal eta koordinatuen bidez.

Talent Strategy, ETE-entzako Labo-Talento edo Bizkaia Talentek gidatutako talentuaren kudeaketako autodiagnostiko-tresna bezalako proiektuek pertsonen kudeaketa profesionalizatzen laguntzen dute, bereziki ETE-etan, eta, horrela, talentuaren inguruko kultura partekatua sendotzen dute garapenerako palanka gisa.

ETORKIZUNA ORAIN ERAIKITZEN DA

Orain, azken urteetan egindako ahaleginak fruituak ematen hasi dira. Gero eta jende gehiagok aukeratzen du Bizkaia bere ibilbide profesionalarekin jarraitzeko, eta gero eta gehiago dira profil gakoak erakartzeko gaitasuna hobetzen eta talentua ardatz estrategikotzat hartzen duten erakundeak.

Bizkaia talentuarentzako lurralde erakargarri gisa finkatzen hasi da, eta hori, munduko leku askotan bizi eta lan egin ahal izan arren, hemen lan egitea aukeratzen dutenen erabakietan islatzen da.

Datozen urteak erabakigarriak izango dira. Bizkaiak oinarri sendoa du: industria lehiakorra, ezagutza-zentroak, azpiegiturak, bizi-kalitatea… Bizkaia Talent-en, lanean jarraituko dugu gure lurraldea ekosistema gisa aintzatetsia izan dadin, non talentuak bere potentzial guztia garatzeko baldintza idealak aurkitzen dituen.

Izan ere, azken batean, talentua ez da bakarrik ekoizpen-faktore bat: gizarte oparoagoa, berritzaileagoa eta inklusiboagoa eraikitzeko giltzarria da. Eta gure esku dago elkarrekin eraikitzea.