Jon publizitatean hasi zen lanean, sormenean, baina beti izan du lekutxo bat gordeta bere zaletasun handienerako. Ondorioz, tokiko eta nazioko komunikabide askok arreta jarri zuten haren lanetan. 2008-2009an, krisi ekonomikoa heldu zenean, bere agentziak besteetatik desberdintzeko zerbait aurkitu behar izan zuen, izan ere, publizitatea eta komunikazioa izan ziren murrizketa latzenak jaso zituzten sektoreetako batzuk. Gauza asko probatu zituzten, baina ez zuten emaitzarik izan. Hala ere, Jonek trikimailu bat zuen gordeta… “Bueno, nik bideojokoen zaletasun hau dut eta oihartzuna izaten ari da komunikabideetan…”. Horrela hasi zen abentura zirraragarri hau.

ESTRALURTARRAK, AUTOAK ETA TXUPITOAK

Kar Snatchers (2011) izan zen atera zuten lehen produktuetako bat. Momentu horietan bezeroentzako lanak egiten zituzten, eta aipatutako hori Barakaldoko Opel kontzesionario batentzat sortu zuten. Jokoaren helburua objektu hegalari ezezagun (OHE) batekin autoak abduzitzea zen, minak eta behiak oztopo zirela. Azzurro deitzen den Bilboko metal eta hard rock pub batentzat ere sortu zuten joko bat, nahiko berezia: “Tabernak eta bertara joaten diren bezeroek laurogeiko hamarkadako giroa daukate, horregatik, hamarkada horretako Spectrum ordenagailu britainiarrean funtzionatzen zuen produktu bat sortu genuen. Jokoan lokaleko barmana agertzen zen eta txupitoak ateratzen zizkizun. Gainera, ohiko bezeroak agertzen ziren izkinetan. Gure helburua bezeroak fidelizatzea zen, esperientzia ederra izan zen”. Ba al dago modu hobeagorik bezeroak fidelizatzeko, horiek joko baten barruan sartzea baino?

Beren lehen bideojoko komertzialari esker, Opel kontzesionarioak sari bat irabaztea lortu zuen, eta, bigarrenaren bitartez, Azzurro puba bideojoko retroak gustatzen zaizkion jendearentzako gurtza-leku izatea lortu zuen . Une goren horretan, Baboon! (2015) sortu, garatu eta aurkeztu zuten, arrakasta handia izan zuen PS4 eta PSVITA (erne) kontsoletarako jokoa. Momentu horretan, Relevo markarekin jarraitzea erabaki zuten, baina, orduko hartan, publizitate-agentziatik kanpo, gaur egun Relevo Videogames SL denari bizia emanez.

ETA ZUK ZERTAN JOKATZEN DUZU?

Mundu guztiak daki talde on bat izatea bizitza honetan edozertarako gakoa dela, eta bideojokoen mundua ez da salbuespena. Baina, zer behar da benetan talde horietako partaide izateko? Jonek argi dauka: era horretako talde batek “bideojokoak ezagutzen dituen, bideojokoei buruz dakien eta bideojokoekin jokatzen duen” pertsonak behar ditu.

“Gehiago estimatzen dut ikasteko gogoz lan egitera sartzen den norbait, jada ezer berririk ikasiko ez duela pentsatzen den super crack bat baino. Denbora asko daramat bideojokoak egiten, eta ikasi besterik ez dut egiten. Dena baldin badakizu… dagoeneko nik baino gehiago dakizu”.

Ikasketak, curriculuma eta esperientzia oso garrantzitsuak dira, noski, edozein pertsonak argi izan behar ditu bere zereginak, baina, horrez gain, Jonek badaki zeri begiratzen dion norbaiti eta haren lanari erreparatzean: “Nik asko baloratzen dut proiektu bat hastea eta amaitzea. Ez diot jokoak Google Play Store, App Store edo Steam-en argitaratu behar dituztenik, horrek berdin dit, baina jakin behar dut zerbait hasi eta bukatu egin dutela, izan ere, esan ohi dudan moduan, hilerriak demoz beterik daude”.

Proiektu bat amaitu izanak esanahi asko ditu Jonentzat; adibidez, taldean lan egiteko gai izan direla eta “ostiak” hartu dituztela. Ez da erraza bideojoko bat amaitzea; amaierara iristeak erakusten du motibazioari oso ondo eusten diozula. Izan ere, Jonek diosku proiektu orok bere motibazio-gailurrak dituela. Hasieran, hodei batean zaude, baina bat-batean motibazio-basamortuaren unea iristen da, benetan jokoa sortu behar duzun unea. Hala ere, merezi du, zorionaren azken gailurrera iristeagatik, dena amaitzen ari zarenean eta goza dezakezunean. Kontuz, oraindik oso bero dago eta!

EZIN DA BETI MODAN JOAN

Teknologia berriak egunero aldatzen diren mundu batean bizi gara, eta orain dela 10 urte ezingo genuke imajinatu ere egin gaur egungo egoera. Baina Relevok ezin du abangoardian egon. Zergatik? Bada, azken urteotan guztiok ikusi ditugulako joera asko jaiotzen eta hiltzen. “Orain dela gutxi metabertsoari buruz hitz egiten zen industria guztiak aztoratuko zituen zerbait izango balitz bezala. Zer gertatu da horrekin? Bada, bat-batean desagertu zela; jada inork ez du gauza horiei buruz hitz egiten, ez NFTei buruz, ezta cryptoei buruz ere. Relevo gauza horietakoren baten sartuta egon balitz, orain pertsiana jaitsita egongo ginateke”.

Teknologia-enpresa erraldoien kontuak dira horiek. Enpresa horiek dena joka dezakete ondorio izugarririk gabe. Baina Jonek argi dauka nola heldu diezaieketen joera teknologiko horiei: “Azken batean, inguruan duzun guztiak eragiten dizu; horregatik, eguneraturik egon behar duzu, eta ikusi ea enpresa handiek egiten dutenaren zati bat eskura dezakezun, haien asmatze edo hutsegiteetatik ikasi eta hobetzen saiatu”.

Hala ere, momentuz, ondo egiten dutena lantzen saiatzen dira: sormena, komunikazioa eta jokoen diseinua.

GAIZKIAREN KE-LAINOA ATZEAN UZTEN

Bideojokoetan jokatzen duten pertsonak “friki” deitzetik euren liga propioak izatera eta atleta profesionalak izatera pasatu dira. Nork esango zuen duela 30 urte?

Azkenean, ke-lainoaren atzean arcadeetan jokatzen zuten pertsonek argitara irteteko eta beren joko gogokoenez aurreiritzirik jasan gabe gozatzeko aukera izan dute, eta hori oso ona da. Mundu guztiak jokatzen du bideojokoetan gaur egun. Eta, era berean, mundu guztiak sortzen ditu bideojokoak gaur egun. Bideojokoak kultura bihurtzen ari direla esan nahi ote du horrek? Jonek baietz uste du, nola ez.

Hiru joko nabarmentzen ditu bere katalogoan gai honi buruz hitz egitean eta, zalantzarik gabe, bideojokoak gure kulturaren parte direla argudiatzeko. Lehenengoak Treasure Rangers (2019) du izena, eta, Jonek dioenez, “zenbait arrazoiren ondorioz, bideojoko hau oso ezberdina da”. Puzzle- eta plataforma-joko bat da, non pantailaren aurrean dagoen pertsonak protagonisten (Lucy, Eric, Roxy eta Randy) trebetasunak konbinatu beharko dituen aurrera jarraitzeko. Interesgarria, ezta? Bada, hori ez da onena, izan ere, Relevok joko honekin zuen helburua normalizatzea zen. Zer normalizatu? Bada, Randy, autismoa duen haur bat, beste edozein jokalari bezalakoa dela normalizatzea. Jonek dioenez, berarentzat oso garrantzitsua zen jokoa mundu guztiarentzat izatea, ez bakarrik autismoa duten pertsonentzat, eta, gainera, ez zuen betiko “turra” eman behar, non norbait seinalatzen den bere desberdintasunengatik. Joko honetan, dena oso naturala da. Azaldu digunez, “jendea horrelako egoeren inguruan kontzientziatzeko joko bat da, non erakusten dugun pertsona bakoitzak bere abileziak eta gaitasunak dituela”.

Bestalde, Frontball Planet (2017) ere badago, Treasure Rangers bezala PlayStation Españarekin elkarlanean atera zena, eta Frontball delakoa du ardatz, euskal pilotaren diziplinetako bat (FEPelota eta FIPVk ere bermatzen dute). Bideojokoan berez euskal pilotan jokatzen ez bada ere, diziplina horri ahotsa eman dio, eta Bilboko agertoki bat ere agertzen da, non, noski, euria egiten duen. “Bertako kultura ere zabaldu daitekeela erakusten duen adibidea da, eta, kasu honetan kirola bada ere, beste adar batzuetara estrapola daiteke”.

Azkenik, Bullfighter Neon (2023), edo, Jonek dioen bezala, “kontu ero bat” aipatuko dugu. Jokoan, protagonista etorkizuneko mundu distopiko batean dago, non, Iruñeko estiloan, zezen askoren aurka borrokatu beharko duen. Baina zezenak ez dira zezen arruntak. Zezen robotikoak dira eta zuziri eta laserrez horniturik daude. Zorakeria liluragarri bat. Joko horrekin, Jonek bideojokoak artelantzat hartzeari buruz hitz egiten digu, izan ere, pertsona bakoitzak bere interpretazioa egin dezake jokatzen ari den bideojokoari buruz. Eta zezenketen alde edo kontra dagoen jendearen % 1 horren kritikarik izan badu ere, oso harrera eta kritika onak izaten ari den bideojokoa da. Twitterren beti dago norbait…

AMAIERAKO BOSS-A

Horren guztiaren ondorioz, Jon industria eta mundua leku hobeago bat egiten saiatzen diren 100 garatzaileen zerrendan izendatua du GamesIndustryk, eta bera oso harro dago horretaz, izan ere, ez da gutxiagorako. Gainera, iragarri berri dute Terrifier bideojokoaren arduradunak izango direla, mundu osoan modan dagoen beldurrezko filmen frankiziarenak. Beraz, norbait gehiagorako gogoz geratu bada… Relevoren mundu fantastikoetan murgiltzera animatzen zaituztegu, fantasiaz, inklusioz eta, nola ez, dibertsio infinituz beteriko munduetan.