Ezin ukatuzoa da badugula geure bizimodu berezia, inork kenduko ez diguna. Gure gastronomia artea da; txokoak eta maite ditugu eta poteatzea gustatzen zaigu. Guretzat natura geure burua ezagutzeko, atseden hartzeko eta gozatzeko bidea da; mendira igotzen gara eta hondartzara jaisten gara, eta nahi izanez gero bi gauzak egin ditzakegu egun berean. Eta kultura, zer esango dugu, bada, kulturaz! Erreferente mundialak gara arkitekturan, antzerkian eta diseinuan.

Nahaste eklektiko honi esker bizkaitarrok harro gaude hemen bizitzeaz. Baina badugu ezaugarri bat are bereizgarriagoa dena eta gurera etortzen diren pertsonekin gaudenean ezinbestean azaltzen dena: harrotasuna abegikortasun bihurtzen da, kontzientzia jasangarria agertzen da eta gauzak sortzeko eta gure herria ezagutu nahian heldutakoei erakusteko eta abegi egiteko gogoa nagusitzen da.

Urtero milaka pertsona etortzen dira Bizkaira maleta bete proiekturekin. Eta beste horrenbeste joan ziren eta itzuli zirenean inoiz baino gogo handiagoa zuten hemen gelditzeko betiko. Ikasteko, eraikitzeko eta sortzeko datozen guztiei (datozen tokitik datozela) harrera egiten diegu, gure klase sortzailea baitira.

Egon apur bat… klase sortzailea? Zer dugu hau, beste modernotasun bat? Ez, klase sortzailea aspaldiko ideia da eta aski zabalduta dago. Terminoa Richard Floridak sortu zuen 2002. urtean (aspaldi, esan bezala, baina indarrean dago oraindik). Haren esanetan, klasearen kategorian biltzen dira ezagutzaren eta sormenaren inguruko jarduera ekonomikoak eginez hirien ekonomia eta garapena bultzatzen dituzten pertsonak. Ezagutzen duzue halako inor? Beharbada, talde horretakoak zarete eta oraindik ez dakizue.

Klase sortzaileaz hitz egiteak soziologiaren esparrua astintzen du, baina esan dezakegu pertsona horiek guztiek badituztela ezaugarri batzuk: adimen zabala, gutxiengoen inklusioa, jasangarritasunaren eta kultura aniztasunaren aldeko jarrera.

Beraz, ez zaigu besterik falta pertsona eta profesional modura naturarekin bat hazteko moduko tokia aurkitzea baino.

Eta, Platonek politikaz uste zuenarekin bat etorriz “Politikaria ehulea da, baina ehuntzeko ez du artilea erabiltzen, baizik eta denetariko gizakiak, eta horrela hiri zoriontsua bilbatzen du”, Bizkaian nonahiko talentuaren alde egitea erabaki dugu. Badakigu onuragarria dela gizartearentzat. Horregatik, tinko jarraituko dugu sorkuntzaren arloan erreferente mundialak izateko beharrezkoak diren enpresa-ehuna eta gizartea eraikitzen.

Hori lortzeko, hiru Tak eraiki behar ditugu:

TALENTUA, TEKNOLOGIA ETA TOLERANTZIA

Gai hau aztertzen ari ginela aurkikuntza txundigarria egin dugu: Bizkaia klase sortzailearen paradisua da! Ez genekien zer egin: kalera irten megafono batekin eta lau haizeetara zabaldu zer onuragarria den hona bizitzera etortzea edo isilik gelditu, sekretua ondo gordetzeko. Baina garen bezalakoak izan behar dugu eta kontatzea erabaki dugu, eta kontatu ere ozen eta argi.

BIZKAIA KLASE SORTZAILEA DA, BAI, HALA DA!

Horren lekuko dira kualifikazio handiko profesional eta unibertsitate-ikasle talentudunak erakartzeko abian ipini dituen laguntzak eta programak. Teknologiaren eta berrikuntzaren bidez bizitza hobetzea kultura tolerantea eta zabala da, ezinbestean.

Hor dugu, batetik, Bizkaia Talent: prestatzen eta esperientziak partekatzeko aukera ematen duten pertsona azkarrak ezagutzen jarraitu nahi dutenentzat. Sare irekia sortu da talentuaren inguruan profesionalentzat, enpresentzat eta ikasleentzat.

Teknologia nonahi dago; gizarte aurreratuen oinarria da eta ematen dizkigun erraztasunek zorionerako bidea zabaltzen dute.

Bizkaia Dorrean (Bilbo) berrikuntzaren arloko crème de la crème bilduko da. Ekimen honen izena Biscay Startup Bay da: ekimen-zentroa izango da, Aldundiak diseinatua munduko berrikuntza-gune garrantzitsuenetako bat izateko. Ekintzailetzaren Guggenheim izango da. Aupa!

Azken T-a hitz baketsu bati dagokio: Tolerantzia. Hauxe da DNAn errotuen daukaguna, guztiz bat baitator hasieran aipatu dugun bizitza ulertzeko moduarekin. Gure gizartea irekia da; hemengoari atxikita dago, baina, halaber, ez du inolako beldurrik bere ekimen eta onura guztiak (ekonomikoak, kulturalak, gastronomikoak eta sozialak) mundu osoarekin partekatzeko.

Hemengo sormenaren paradisua aspaldi aurkitu dute enpresa eta pertsona askok (askok ere askok) eta beren “txokotxoa” sortu dute gure artean.

Esaterako, 2011. urtean bi gazte Getxora heldu ziren diseinu-estudio baten ekimena abian jarri nahian. Hala sortu zen Muka Design Lab. Espazio honetan diseinu-ideiak produktu erabilgarri bihurtzen dira Slow Design filosofiarekin. Filosofia honen ardatzak artisautza eta tokiko jardun ona dira. Gainera, hemengo materialak erabili ohi dituzte, pagokia eta arbela, kasurako. Hauek gure lurreko txokoetara eramaten gaituzte.

Muka Beazeko, kide ugarietako bat da. Bizkaiko Foru Aldundiaren sozietate publiko honen helburua da enpresa eta pertsona ekintzaileei laguntzea beren ideiak, proiektuak eta berrikuntzak gauzatzen eta, batzuetan, nazioartera zabaltzen.

Beste era batera esanda, sormenaren ehuna bilbatzen laguntzen du, jakin-nahiz betetako pertsona adimentsuek elkar elikatu ditzaten, erronka berriak ezar ditzaten eta dagoeneko esku artean dauzkaten erronkekin aurrera egin dezaten.

Olerkariek musez hitz egiten duten bezala, guk ikuspegia aldatzen dugu. Poesiatik gutxiago dauka, agian, baina askoz praktikoagoa da klase sortzailearentzat. Gure musek diote ezen, gizartea oparoa izango bada, garrantzitsuenak pertsonak direla, pertsona guztiak.

Eta pertsona horiek beren ahal osoan eta buru-belarri jardungo badute mundua eraldatzen, zaindu egin behar ditugu, eskua luzatu behar diegu eta eskura ipini behar dizkiegu maletan ekarritako ideiak gauzatzeko behar dituzten laguntza, sare eta tresna guztiak.

Gainera, ez dugu ahaztu behar bizimodua ere lagungarria dela inspirazioa datorrenerako: natura, artea, zientzia eta janari ederrak (Da Vincik berak ez zuen eduki hain giro onik).

Horrela lortuko dugu Bizkaiak sorkuntzan hazten jarraitzea eta bertakoak zoriontsuak izatea lanean eta bizitzan. Eta mundu osoak jakingo du zein askotarikoa eta homogeneoa den gure herria, eta hemen bizi garenok ere bai.