Egia esan, XXI. mendean bete-betean gaudela, eta azken hilabeteotan komunikabideetako titularretan ageri diren politika berrien ondorioz, globalizazioaren eragozpenak kritikatzen dituen eta tokikoaren aldeko apustuan oinarritutako formula berriak aldarrikatzen dituen eztabaida loratzen ari da.

Ohiko irakurleek badakizue BizkaiaTech Magazinearen DNAren zati bat teknologiari oso lotuta dagoela, eta, beraz, gai honi heltzeko bururatzen zaigun modu bakarra kontzeptu batean oinarritzea da: burujabetza teknologikoa.

Saltsa mehe egiteko, galdera pare baten eskutik helduko diogu testuinguruari.

Zer neurritan jabetzen gara aplikazio mugikor bat deskargatzean edo erabiltzean onartzen ditugun baldintzez? Zalantzan jartzen al ditugu aldi baterako aplikatzen diren aldaketak eta ingurune profesional eta pertsonalean erabiltzen ditugun tresna digitalak erabiltzeko moduak? Ba al dakigu zer neurritan ezartzen dituzten IT erraldoiek beren produktu teknologikoak? Ba al dago lekurik teknologia erabiltzeko beste modu baterako?

BURUJABETZA TEKNOLOGIKOA 3DAN

Hurrengo orrialdeetan, burujabetza teknologikoaren kontzeptuari helduko diogu, eta hiru dimentsiotan banatuko dugu: nazioartekoa, tokikoa eta pertsonala.

Nazioarteko burujabetza teknologikoak Interneteko erraldoien nagusitasuna eta mundua gidatzen duten tresna teknologikoen gaineko kontrola barne hartzen ditu, horrek berarekin dakarren guztiarekin: datu masiboen kontrola, iritzi publikoa gidatzeko botere handia eta agertoki ekonomiko berri baten sorrera (zeinari feudalismo berria edo teknofeudalismo esaten zaion dagoeneko).

Halaber, punta-puntako oinarri teknologikoko proiektu pilotuak ere mapan jarriko ditugu. Proiektu horiek Europar Batasunak finantzatzen dituen administrazio publikoetatik sortu dira, eta Europako lurzorutik eta Lantik (Bizkaiko Foru Aldundiaren Teknologia eta Berrikuntza Sozietatea eta aldizkari honen editorea) bezalako eragileen lanetik abiatzen dira, burujabetza teknologikoa aldarrikatuz. Horretarako, GovTech4All-etik (ekimen guztiak antolatzen dituen Europako partzuergoa) datozen bi pertsona ospetsuekin hitz egin dugu. Hurbiletik ezagutuko dituzu beraiek –herritarren bizitza hobetzeko eta errazteko– garatutako proiektuak.

Tokiko dimentsioak Bizkaiak teknologikoki burujabe izateko duen gaitasunarekin zerikusia du; zehazki, Euskal fedibertsoa kontzeptuari helduko diogu, eta, horretarako, Abaraska taldeak azalduko digu zehatz-mehatz kontzeptu horrek zer esan nahi duen: euskaraz diharduten edo euskal komunitateari zuzenduta dauden fedibertsoko plataforma eta zerbitzuen multzoa. Fedibertsoa elkarren artean konektatutako zerbitzarien sare bat da, komunikazio sozialerako hainbat plataforma barne hartzen dituena (guztiak software librean eta protokolo irekietan oinarrituak), zerbitzu ezberdinen arteko interakzioa modu federatu eta deszentralizatuan ahalbidetuz.

Azkenik, dimentsio pertsonalak burujabetza teknologikoa gauzatzeari dagokionez pertsona bakoitzak duen erantzukizun pertsonalerako deia egin nahi du. «Maker kultura» kontzeptua –aldizkariaren ale honen ardatzarekin oso lotuta– eta Raspberry Pi batekin etxeko bideo-jokoen kontsola open source bat lehen urratsetik hasita eraikitzeko modua azalduko dituen tutorial batez gozatu ahal izango duzu. GAFAM (Google, Apple, Facebook, Amazon eta Microsoften akronimoa) erabili gabe egun bat pasatzea nolakoa den kontatzeko ere eskatu diogu gure erredaktore bati. Aurrerapen bat: bai, egin daiteke.

Gozatu irakurketaz!