Saioa Leguinagoicoak, Estrategia Digitalerako Zerbitzuko buruak, GovTecharen inguruan BAT dorrean egindako adituen batzar baten ostean, horren guztiaren gakoa zein izan daitekeen azaldu zigun: “kontua ez da soilik gaitasun digitalak indartzea, baizik eta pixkanaka egoera berrietara egokitzeko gaitasun dinamikoak kontuan hartuz lan egitea, zerbitzuak diseinatzea, herritarrak erdigunean jartzea… Ikuspegi horretatik, herritarren beharrak, arazoak eta nahiak erdigunean jartzen ditugu, zerbitzuak diseinatzeko”.

Pentsamolde-aldaketa honekin, teknologia xede bezala ikusteari uzten zaio, horren ordez, etengabeko berrikuntza lortzeko baliabide bezala aintzatesteko.

Administrazioa berriz diseinatzeko beste faktore bat kontratazio-parametroak aldatzea da. Historikoki, Administrazioak garrantzi handia eman dio irizpide ekonomikoari, ETEei, startupei eta scaleupei jarduera hauetan sartzeko oztopoak ezarriz. Mexikon eta Erresuma Batuan, esate baterako, marketplace erako zerbait dago kontu hauetarako. Saioak azaldu digu horrek pentsarazten diela, aldez aurreko homologazio baten bidez, startup eta ETE digitalekin lan egiteko aukera izango luketela, irizpideak ez daitezen beti izan betikoak.

GovTech Bizkaia joera hauekin bat eginez doa aurrera, ETE eta startupen alde apustu eginez eta kontratatzen dituzten proiektu guztietan berrikuntza irekia gauzatzeko klausulak ezarriz (nahiz eta zeharkako jarduera izan).

Edizio hau aurrera eramatea oso garrantzitsua iruditzen zaigu aurretik aipatu dugun arrazoiarengatik: Administrazio Publikoaren kontzeptua goitik behera aldatzen ari gara. GovTech mugimenduak berrikuntza irekia, ideia freskoak, sormena eta teknologia erabiltzen ditu aipatutako xedea lortzeko. Horren ondorioz, esan dezakegu GovTech tresna bat dela (nahiz eta bakarra ez den), teknologiaren laguntzaz zerbitzuak berriz diseinatzeko helburua duen oso tresna indartsua.

GovTech kontzeptuan pentsatzen dugunean, milaka adar dituen mapa erraldoi bat imajina dezakegu. Adar horien artean, berrikuntza, sormena, ekintzailetza, bootcampak, ideiak, enpresa-ekosistemak, ETEak edo startupak aurki ditzakegu, besteak beste (eta ehunka adar gehiago daude!).

Edizio hau irakurri ostean, hainbeste aipatzen ari garen GovTech zer den ulertuko duzu, Bizkaitik (GovTech Lab-ek) ezarri diren erronkei startupek emandako soluzioak ezagutuko dituzu, obra artistiko baten atzean dauden sormen-prozesuen aditu bilakatuko zara eta, noski, Bizkaian egiten ari den guztiaren jakitun izango zara.

Bihotz-bihotzez, ale berri hau zuen gustukoa izatea espero dugu. Ea Administrazioaren berrikuntza hau lantalde honi bezain zirraragarria iruditzen zaizuen!