Pauso bat baino gehiago barne hartzen dituen prozesua da.

Proposamenak aurkezteko –EBko programa baten esparruan– deialdi bat argitaratzearekin hasten da prozesua. Erakunde edo alderdi interesdunek kontzeptu estrategiko bat garatzen dute deialdiaren helburuekin bat datorren proiektu baterako.

Ondoren, koordinatzaile batek Partzuergoaren lidergoa eskuratzen du, eta herrialde eta sektore desberdinetako bazkideak identifikatu eta parte hartzera gonbidatzen ditu. «Esperientzia, oreka geografikoa eta gaitasunen arteko konbinazio egokia bermatzea» da asmoa.

Proposamenak aditu independenteek ebaluatzen dituzte, eta aukeratutakoek proiektuari ekingo diote partzuergoak diru-laguntzetarako hitzarmena EBarekin sinatu ondoren.

GovTech4All proiektua asmo-adierazpen osoa ezkutatzen duen kontzeptuen batura da. Zatika azter dezagun: alde batetik, GovTech kontzeptuak administrazio publikoek herritarren eskura jartzen dituzten zerbitzu eta soluzio teknologikoak aipatzen ditu; eta, bestetik, 4All [guztiontzat] hitzak mugarik gabeko merkatu bakar bati erreferentzia egin nahi dio. Horrek, sarritan, elkarte publiko-pribatuak eskatzen ditu (bereziki, startup eta ETE-ekin), baita beste gobernu batzuek garatutako soluzioak berrerabiltzea ere.

Gaur egun, 20 herrialdetako 29 erakundek osatzen dute ekimena, eta Europako GovTech merkatu eta ekosistema baten garapena bizkortzea du helburu.

Proiektuaren xedea eta anbizioa ulertu eta bultzatzen ari diren pilotuak gertuagotik ezagutzeko asmoz, haien bi aurpegi ikusgarrirekin hitz egin dugu: Alex Borg, The Lisbon Council-eko kidea eta Partzuergoko koordinatzailea; eta Stefanos Kotoglou, Europako Batzordeko Project Officer eta DG DIGITeko kidea.

Proiektu konplexua den arren (osagai eta jarduteko modu asko dituena), badira proiektuaren bizkarrezurrean etengabe orbitatzen duten bi kontzeptu: eraldaketa digitala bultzatzea eta teknologiaren bidezko elkarreragingarritasuna, Europar Batasunaren eta haren merkatu bakarraren potentziala askatzeko «funtsezko» alderdiak.

EUROPAR BATZORDEA, INDAR ORIENTATZAILEA

Esan liteke Stefanos Kotoglou dela EBren helburu politikoak itzultzearen arduraduna, GovTech4All-en zimenduak sostengatzen dituzten eginbehar estrategikoak ezartzeko. Proiektuaren ildo nagusiak marraztean eta proiektuaren koordinatzailearekin lan egitean datza bere rola, proiektuaren funtzionamendu egokia eta EBren ildo estrategikoekiko koherentzia bermatzeko.

Bere hitzetan, GovTech4All proiektuaren barruko pilotuak lehenesten dira «euren eraginaren, berrikuntzaren, bideragarritasunaren eta garrantziaren» arabera. Proposamen bakoitza ebaluatzen da Europar Batasunaren erronka edo aukera esanguratsuei erantzuten diela, «ikuspegi berritzaileak edo abangoardistak» txertatzen dituela, eta hura inplementatzeko plana errealista dela bermatzeko.

Halaber, kontuan hartzen dira ere «EBaren helburu politiko zabalenei begira pilotuak duen garrantzia» eta beste estatu batzuetan errepikatzeko moduko emaitzak sortzeko duen ahalmena.

Orokorrean, Partzuergoak sustatzen dituen pilotuak sektore publikoko erronkei aurre egiteko adimen artifizialaren aplikazioan ardazten dira.

Europako gizartean espero den emaitzari dagokionez, asmo nagusiek «gizartean eragin esanguratsua» bilatzen dutela azaldu du Kotoglouk. Egituratzeko modua Partzuergoak irtenbide horiek azkarrago hartzeko duen gaitasuna aprobetxatzea da. Irtenbide horiek zerbitzu publikoetan inplementatzeko bokazioarekin sortu dira, eta hasieratik dira eskalagarriak eta elkarreragingarriak, azkenean Europako herritarrengan eragina izanez.

THE LISBON COUNCIL, XEHETASUNAK

Imajinatzen duzu puzzle bat egitea forma, kolore eta testura desberdinetako piezekin, eta behin amaituta, azken emaitzak zentzua izatea? Horrelako erronka du aurrean Alex Borgek, GovTech4All partzuergoko koordinatzaileak.

Bere piezak proiektu hau osatzen duten 20 herrialdeak dira (infografian ikus daitezke, artikulu honetatik orrialde gutxi batzuetara), eta amaitutako puzzlea da helburu partekatua: «teknologia publiko digitalerako ekosistema eta merkatu bateratua» sortzea, eraldaketa digitala eta elkarreragingarritasuna ahalbidetu eta hobetuko dituena.

Eraldaketa digitala: teknologia digitalak erakunde bateko hainbat arlotan txertatzeko prozesua.

Elkarreragingarritasuna: hizkuntza teknologiko komuna eta partekatua.

Nork imajina dezake digitalizatu gabeko zerbitzu publiko bat?

Nork imajina dezake mugaz gaindiko elkarreragingarritasunik gabeko merkatu bakar bat?

Borgen aburuz, eta jendeak pentsa dezakeena gorabehera, Europar Batasunaren heterogeneotasuna –hainbeste muga eta herrialderekin– ez da oztopo bat, aberastasun-iturri indartsua baizik.

Aniztasunaren handitasuna aipatzen du.

Eta, hemen, Partzuergoak «elkarrengandik ikasteko aukera paregabea» aurkezten du. Parte hartzen duen erakunde bakoitzak ezagutza, esperientzia eta gaitasun desberdinak ditu, heldutasun-maila banarekin.

Gakoa da «helburu estrategiko partekatu bat izanda elkarlanean aritzea», eta lan hori testuinguru egoki batean burutzea, «kide diren erakunde guztien heldutasun kolektiboa sendotzen duen ingurune inklusibo eta kooperatibo bat» bultzatuz lortzen dena.

Metodologia horrek, gainera, bizi dugun garaiari buruz hitz egiten du.

Bere hitzetan, «Gaur egun, munduak aldaketa azkar eta konplexu bati aurre egiten dio, eta horrek inoiz baino elkartuago dagoen Europa bat eskatzen du»; eta hori, jakina, teknologia-arlora ere zabaltzen da.

EUROPAREN APUSTU TEKNOLOGIKOAK

Europako Batzordeak ez ditu hainbeste azpimarratzen teknologia espezifikoak, baizik eta horiek nola garatzen diren eta zer helburutarako erabiltzen diren; eta, hemen, krisi klimatikoa funtsezko kontzeptua da.

«Europar Batasunak uste sendoa du teknologiak garatzeko eta erabiltzeko moduak funtsezko zeregina duela bere jatorrizko balioak defendatzeko eta adierazteko», azaldu du. Zenbait proiektu klima-krisia egokitzeko eta arintzeko estrategia eta neurrietan oinarritzen dira jada, eta, berak aurreratu duenez, hurrengo pilotu-multzoak adimen artifizialak administrazio eta zerbitzu publikoetan izan ditzakeen aplikazio arduratsuetan oinarrituko dira.

EUROPA, BURUJABEA TEKNOLOGIARI DAGOKIONEAN?

Teknologikoki burujabea den Europa bati buruz galdetzean, Borg irmoa da. Bere ustez, ideia hori «erabat derrigorrezkoa» da. «Funtsezko beharra da, eta, ziurrenik, existentziala».

Ikuspegi hori oso lotuta dago teknologiak gure egunerokotasunean duen rolarekin. Gaur egun, teknologia ez da ekonomikoki lehiatzeko modu bat; aitzitik, eta gero eta gehiago, oinarrizko elementua da gizarte-ongizateari, gobernantza publikoari eta autonomia estrategikoari dagokienez.

Horrek azaltzen du, adibidez, Partzuergoak teknologia kuantikoen alde egindako apustua, Lantik-ek gidatzen duen pilotuetako batean islatua. «Konputazioan, komunikazioetan eta segurtasunean epe luzera egin beharreko aurrerapenetara zuzenduta daude», Stefanos Kotoglouren hitzetan; eta, hala, «Europako ekosistema digital erresilienteari eta etorkizunera begira dagoenari» laguntzen diote.

Borgek iragarri duenez, oraindik bide luzea dugu aurrean, baina anbizioa eta gogoa hor daude, eta, horrekin, datorren hamarkadan, baliteke Europa arlo teknologikoan subirano izateko behar adina baldintza izatea.

ERRONKA GEHIAGO

Burujabetza teknologikorako bide horretan, bi erronka identifikatu ditu Borgek: batetik, lehentasun lehiakorrek (estatu-mailakoak eta Europakoak) zaildu egiten dutela garapen teknologikoa politiken formulazioaren erdigunean kokatzea; eta, bestetik, teknologiaren zati handi bat sektore pribatutik datorrela. Bere hitzetan, «Esleipen-esparru askok hornitzaile handi eta ezarrien alde egiten dute, hobeto kokatuta baitaude eskakizun konplexu eta zurrunei aurre egiteko». Horren ondorioz, zenbait eragile txiki eta berritzailek lehiatzeko zailtasunak dituzte.

Desoreka horri aurre egiteak Europaren gihar teknologikoa handituko luke, eta, momentuz «ohiko praktika izatetik urrun» dagoela ematen badu ere, Borgek gogotsu begiratzen dio etorkizunari. AAn oinarritutako pilotuen multzo berrian, adituak iragarri du sektore pribatuko erakundeen irtenbide berritzaileek «aukera esanguratsuak» izango dituztela (aurrekontua). Asmoa da «Europako herritar eta enpresei abangoardiako gobernu-teknologiak erabiltzeko aukera ematea», eta –Kotoglouk osatzen duen moduan– teknologia zerbitzu publikoetan, industrian eta ikerketan «etikan eta konfiantzan oinarritutako ikuspegiarekin» txertatzen dela ziurtatzea.

Izan ere, sarbide hori funtsezkoa da pertsonek administrazio publikoekin elkarreragiteko duten modua hobetzeko eta, aldi berean, etorkizun digital eraginkorragoa, inklusiboagoa eta herritarrengan oinarrituagoa lortu ahal izateko.