Nahiz eta, tradizionalki, diseinua aipatzen genuenean estetika, forma edo proiektu baten azken itxura etortzen zitzaizkigun gogora, gaur egun diseinua ardatza eta eragile nagusia da kontsumitzaileei egokitutako zerbitzu, marka edo esperientziak eraikitzeko prozesu estrategikoak integratzeko beharrean, berrikuntzan eta integrazioan. Diseinuaren metodologiak eta tresnak proiektu bateko faseetan txertatzen direnean, proiektuaren tipologia edozein delarik ere, giza beharrekin lotzen da eta erabilera-esperientzia optimizatzen duten soluzio eraginkorrak lortzen dira.

Hala, egungo gizartearen motorra den teknologiak ezinbesteko rola du. Diseinuak balioa eransten dio teknologiari, hori giza beharrekin lotzen baitu. Batzuetan teknologiak arazoak handitzen dituen arren, zentzuz erabiliz gero, egin litekeen apustu onena da. Pertsonek eta teknologiak bat egiten dutenean, beti izan behar dira pertsonak erdigunean: pertsonentzako diseinatuz eta pentsatuz, pertsonen asebetetze-mailak eta, ondorioz, bizi-kalitateak hobera egingo dute.

Moldagarritasuna eta markek duten inklusibitate gaitasuna hobetzen dituzten diseinuak eta teknologiak. Edozein produkturen edo esperientziaren (digitala zein ez) garapenaren hasierako faseetan izan ditzakegun oztopoak ezagutzen ditugunean, garaiz konpon ditzakegu, eta beharrezko aldaketak egin. Eta, kasu horretan, ezinbestekoa da desgaitasunen bat duten pertsonekin lan egitea azken produktua irisgarria eta egokitua izan dadin.

Ezinbestekoa da diseinu-jarraibide batzuk gehitzea eta, ez hori bakarrik, albait ikuspegi zabalena erabili behar da: mezutik hasi eta erabilerara arte, dena da moldagarria. Estetika, erabilgarritasuna edo sinpletasuna kontutan hartzeak ez du soilik produktuaren eta zerbitzuaren erabilgarritasuna bermatzen, alegia, beste testuinguru guztietara hurbiltzea ere bermatzen du. Horrek guztiak diseinuaren azken mugara eramango gaitu: ahalik eta pertsona gehienetara heltzea.

DISEINU-PROZESUETAKO EBALUAZIO-TEKNIKAK

Praktikan, diseinu inklusiboko tresna eta metodologia ugari daude, eta horiek lan-fase eta -prozesuetan aplika daitezke. Diseinu estrategikoko aholkulari garen aldetik, Zorraquinon erabiltzaileen portaera ikertzen eta aztertzen dugu, erabilgarritasun-analisien eta ebaluazio heuristikoen bidez. Gainera, produktuak modu independentean ikuskatzen ditugu diseinu-printzipioen arabera, produktuen urritasunak identifikatuz eta erabilera-esperientzia hobetuko duten soluzioak eskainiz.

Era berean, erabiltzaileen eta, ondorioz, bezeroen esperientzia irudikatzen dugu customer journey maps deritzen mapa batzuetan. Mapa horiek, egiazki, denbora-lerroak dira eta horietan bezeroak produktu edo zerbitzuarekin izan ditzakeen interakzioak zehazten ditugu, beharrak kontuan hartuz.

Analisiari dagokionean, egiaztapenak eta probak (A/B test) egiten ditugu bertsioen eraginkortasuna alderatzeko, eta, horrez gain, elkarrizketak eta erabilera-testak ere egiten ditugu. Halakoetan, bezeroak ezagutzeko aukera izaten dugu, egiten ari garen guztia hobetzeko helburuarekin. Modu horretan, emaitzak kontuan hartuta eta ikuspuntu global batetik (perspektiba holistikotik), diseinu-erabaki onenak hartzeko moduan egongo gara.

Hemendik aurrera, ikus-entzule guztiek antzeko erabilera- eta irisgarritasun-esperientziak izango dituztela bermatzea da helburua. Aniztasunean eta inklusioan oinarrituta diseinatzeak balioa ematen dio pertsona bakoitzari, bere egoera eta testuingurua errespetatuz, eta biztanle guztientzako bidezkoak diren emaitzak lortzen ditugu.

KASU BAKOITZARI, BEHAR DUEN ESPERIENTZIA

Etengabe optimizatzen jarraitze aldera, joera sozial nagusiak aztertu eta hautematen ditugu, eta horiek erabiltzaileen kezkak eta portaerak ezagutzera eramaten gaituzte. Ulermena eta hausnarketa beharrezkoak dira erabiltzaileen behar zehatzei erantzuteko.

Hala, irisgarritasunari dagokionez, hiperpertsonalizazioa da produktuak eta soluzioak egokitzeko lehentasunezko ildoetako bat, behavioural design (jokabide-diseinua) deritzonean. Dagoeneko ez da nahikoa erabiltzaileen beharrak kontuan hartzea; horrez gain, funtsezkoa da erabilera-esperientzia areagotzea, konexio hobea ezartzeko.

Nahiz eta tradizionalki gailu eta webguneak egokitzearekin lotuta egon den, gaur egun, pertsonalizazioaren ardatza datu-bilketa eta ikaskuntza automatikoa dira, diseinu egokituak eta moldagarriak eskaintzeko gai direnak. Elementuak, itxura, ordena, maiztasuna… erabiltzaileek dena pertsonalizatu dezakete esperientzia uneoro doitzeko. Funtsezko apustua da marka baten diseinuari eta pertzepzioari balio handiagoa emateko.

ZERBAITETARAKO DISEINATZEA

Zalantzarik gabe, marka batek izan dezakeen aktibo handiena bere audientzia da. Premisa horrekin, diseinu inklusiboan esperientzia, zerbitzu edo marka egokitu eta irisgarriak eraikitzean, erabiltzaileen, autonomiaren, aukera-berdintasunaren eta diskriminaziorik ezaren aldeko apustua egiten da. Helburu batekin diseinatzea, azken batean, etorkizunaren aldeko apustua egitea da.