PRESTAKUNTZA EMAN ETA JASO

Metabertsoak eragin handia izango du gizartea osatzen duten sektore askotan, baina nire ustez, hezkuntza eta prestakuntzaren munduan, gauzak erabat aldatuko dituen faktore bihurtuko da.

Triangelu honetan, hiru adar aurki ditzakegu eta guztiak e-learningean oinarritzen dira. Lehenik eta behin, azter dezakegu metabertsoak zein eratara lagunduko dien pertsonei beraien prestakuntzan. Horrez gain, prestatzen duten horiek prestatzeko beharra ere badago, izan ere, beraien kargua erabat aldatuko da, eta ezin dezakegu imajinatu irakasle bat bere ikasleei klasea bere etxetik ematen, ahots eta errealitate birtualeko betaurrekoekin, aurretik formakuntzarik jaso gabe. Gainera, irakasle horiek izango dira pertsona egokienak eduki berriak sortzeko. Azkenik, amaiera ona izan dezan, ezin dezakegu ahaztu, metabertsoan oinarrituko den teknologia, oraindik garatze-prozesuan dagoela.

Garrantzitsua da guretzat, datozen belaunaldiei prestakuntza eskaintzea (metabertsoaren laguntzarik gabe, oraingoz), izan ere, beraien lana izango da tresnak, unibertsoak, abatarrak eta elementu horien guztien arteko harremanak sortzea. Bizitzeko modu berri horrek ekarriko dituen arauak eta legeak ezagutzea ere beharrezko dugu.

ERALDATZEKO

Hezkuntzaren arloan errealitate murgiltzaile batez ari garenean, ezin dezakegu pentsatu sistema sinple, metodologia edo tresna soil batekin premia guztiak betetzeko gai izango garenik. Hainbat ikerketaren arabera, errealitate birtuala erabiltzen duten prestakuntzek, prestakuntza tradizionala baino lau aldiz bizkorrago funtzionatzen dute, eta horrez gain, ikasleak gehiago fidatzen dira jasotzen duten informazioaz. Hala ere, ikerketa hau unibertsitateko ikasleekin landu zuten, eta emaitzak, seguruenetik ez ziren berdinak izango lehen hezkuntzan edo enpresetan ematen diren birziklapen ikastaroetan egingo balira. Oraingoz, teknologia horiek erabili dituzten proiektuetan, emaitzak oso arrakastatsuak izan dira.

Unibertsitate mailan eta bereziki medikuntzan, egin behar diren lanak modu birtualean egitean erabat jaitsi du prestakuntzaren kostua. Izan ere, etorkizuneko profesional horiek dagoeneko medikuntzarako beharrezkoa den ekipamendu garestia erabil dezakete, ebakuntzak egin edo laborategiko teknika espezifikoak praktikatu, guztiz birtuala den ingurune batean. Unibertsitateetan ematen zaion erabileraren alde ona, “egin egiten” filosofiaren aitzindariak izan daitezke. Izan ere, metabertsoa eraikitzen joango dira paraleloki, eta teknologiak hoberantz egiten duen heinean, ikasketa programetan aplikatzeko aukera izango dute.

PROBA - AKATSA (EDO EZ)

Lehen hezkuntzan teknologia horiek txertatzeko probak gehien egiten ari den herrialdea Txina da. Ez naiz ausartzen esperimentu hitza erabiltzen, baina momentu honetan, metabertsoaren inguruan egiten den guztia oro beta fasean dago. Historia ikastea, gaur egun, ez da datak ikastea, jada ez da beharrezkoa gatazkak edo gizateriaren momentu epikoenak gure buruetan imajinatzea. Teknologiak bide ematen digu leku eta momentu horiek gure ikaskideekin (eta ez soilik beraiekin, mundu osoko ikasleekin ere bai) lehen pertsonan bizitzeko, abatarren bitartez.

Pandemiaren ondorioz, online klaseak adin guztietako jendeari heldu zitzaizkion. Sistema hori ezartzean egin ziren akats guztiak, oso baliagarriak izango zaizkigu metabertsoaren ezarpena nola egin ulertzerako orduan.

Puntu garrantzitsu bat aipatzea falta zaigu derrigorrezko prestakuntzari (adin goiztiarrean) buruz hitz egiten dugunean. Herrialde orok, bere hezkuntza-legeak eta erlazio-modeloak ditu irakasleria eta ikasleriaren artean, eta horiek, ez dute zerikusirik etorkizunean etorriko den guztiarekin. Hezkuntza-planak itxiak dira, eta azterketak edota ikasleen arteko adin ezberdintasunak, zaharkitutako modeloak izango dira metabertsoaren ekosisteman.

Zenbat eta lehenago egokitzen diren legeak, edo gutxienez, zenbat eta lehenago hausnartzen den honi buruz, teknologiak orduan eta eboluzio azkarragoa izango du. Oraingoan teknologiak ez dezala egon ikuskatzaile baten baimenaren zain ikasgela batean aplikatu ahal izateko.

KLASEETATIK HARATAGO

Industriaren sektorea ere onuraduna da metabertsoaren barruan prestakuntzara heltzeko orduan. Tresna simulagailuek biki digital bat sortzea ahalbideratzen dute, adibidez, fabrika baten irudi perfektua lortu dezakegu. Honen bidez, etengabe funtzionatzen ari diren eta sekula apurtzen ez diren makinak erabil ditzakegu, nahi dugun horrekin probak egiteko. Errealitatean ia ukiezinak diren azpiegitura horiek nola konpondu ahal ditugun ulertzen lagunduko digu teknologia horrek, adibidez.

Gure produktuak hizkuntza ezberdin batean hitz egiten duten herrialde batean saltzea ere ez da traba bat izango jada, izan ere, hizkuntzekin lotutako prestakuntzaren helburuetako bat da metabertsoan murgiltzea eta modu honetan, beste abatar batek esaten duena norbere hizkuntzan ulertzeko gai izatea.

Edukiak eta hauek irakasteko moduak ere guztiz bestelakoak izango dira etorkizunean. Baliteke hasiera batean horrela izatea, baina ikasleak gusturago badaude klasea basoaren erdian ematen bere klaseetan baino, irakurtzea nahiago badu bideo bat ikustea baino edota modu erreal batean tiro parabolikoak nola funtzionatzen duen probatzeko beharra badu, ikasleentzako gida batean eraldatzen jakin beharko du, orientatzaile lana egin beharko du. Bere lana izango da eduki interesgarriak zein modutan aurkitu eta sartuko dituen ikastea.

EZ GAITEZEN ETORKIZUNERA BERANDU IRITSI

Gaur egun sortzen ari diren tresnei esker, irakasleek beraien rola aldatuko dute ikasgelaren barruan, irakasle eta ikasle izango baitira aldi berean. Gainera, metabertsoaren eboluzioa nolakoa den aztertzeko ezinbestekoa izango da beren iritzia; tresna horiek erabiltzen duten lehenak izango dira, eta aipatutako tresna horiek hobetzen lagunduko digute. Inor atzean geratu ez dadin, ordea, oraingo hezkuntza-eredua plan berriarekin bateratzen joan beharko dira, pixkanaka. Azken batean, honek, mundu erreala eta birtualaren arteko bateraketa bat ekarriko du.

Oraindik denbora asko geratzen da hau guztia errealitate izan dadin, baina pixkanaka, urrats txikiak ematen ari gara. Orain, galdera asko egitea geratzen zaigu: zenbat denbora falta da metabertsoa gure klaseetan erabiltzen hasteko? Zergatik ez diegu gure irakasleei oraindik metabertsoa zer den eta dena nola aldatuko duen azaldu? Zer egiten ari dira gobernuak beraien legeak eta hezkuntza-planak errealitate berri honetara egokitzeko?