"Homofobiarik ez, No a la homofobia" izenburupean, ekimen honek, aurten, komunikabideen mundua du oinarri. Komunikabide idatziek, irratiek, telebistek eta agentziek parte hartuko dute kanpaina honetan, erakundearen adierazpenera atxikita. Era berean, Aldundiak apirilaren 29ko Gobernu Kontseiluan onartutako adierazpenarekin batera erantsi den jardunbide onen edo gomendioen ildoak bereganatu dituzte.

Komunikabideetako profesionalen kolektiboa ordezkatuz, África Baeta (EITB), Begoña Beristain (Noticias taldea), Olatz Barriuso (Correo taldea) Jabi Onaindia (Bizkaia Irratia) eta Fede Merino (Radio Popular) izango dira aurtengo karteleko protagonistak.

Bizkaiko ahaldun nagusiak, José Luis Bilbao jaunak, eskerrak eman nahi izan dizkie kanpainan parte hartu dutenei, bai kartelean agertu direnei, bai aurtengo adierazpenera atxiki diren eta beren argitalpenetan gomendioen katalogoa sartu duten komunikazio-enpresa guztiei. Komunikabideetako arduradunei Foru Jauregian eman zaie harrera, aurtengo kanpainaren aurkezpen ofiziala baino lehen.

Giza Eskubideekin bat datorren errealitatea eraikitzea

Maiatzaren 17an nazioartean ospatzen da Homofobia, Lesbofobia eta Transfobiaren aurkako eguna eta erakunde honek, zehazki Gizarte Ekintzako Pilar Ardanza diputatuak, sexu-orientazioaren eta genero-nortasunaren ondoriozko bereizkeriaren kontrako borrokarekiko konpromisoa azpimarratu nahi izan du.

Horretarako, eta 2010ean abiarazitako ekimenari jarraiki, aurten gaur aurkeztu dugun kanpaina antolatu da, Bizkaiko LGTBI elkarteekin adostu den sexu-aniztasunari buruzko adierazpen instituzionala oinarri hartuta.

Bizkaiko Foru Aldundiak udal eta mankomunitateak gonbidatu ditu kanpaina honetara eta erakundearen adierazpenera batzera.

Hala ere, aurten komunikabideak izan dira protagonista nagusiak. Gizarte Ekintzako diputatuak azaldu duenez, komunikabideen estaldura bidezko, objektibo eta egiazkoak zeregin garrantzitsua izan du LGTBI pertsonei buruzko kontzientzia publikoa sortzen.

Argi dago azken urteetan LGTBI erkidegoaren aldarrikapenetan bizi izan dugun gizarte-aldaketa garrantzitsuak zerikusi handia daukala komunikabideen (oro har) babes irmoarekin. Hala ere, Pilar Ardanzak dio eskubideen "aldeko" edo "kontrako" estaldura sinpleaz harago joan beharko litzatekeela.

"LGTBI pertsonen bizitzari buruzko diskurtsoa familia, fede, eliza, politika, ekonomia, kirol eta bestelako gaiei buruzko estaldurarekin uztartzen den aro honetan behar-beharrezkoa da komunikabideek, edo zehatzago, kazetariek beren-beregi bereiztea LGTBI gaiei buruzko aurkako ikuspegiak eta aurreiritziak eta difamazioa sor ditzaketen erretorika", azaldu du Ardanzak.

Hori guztia dela eta, Aldundiari garrantzitsua iruditu zaio komunikabideei hainbat tresna eskaintzea, gaiak modu arduratsuan islatu edo landu daitezen, hiritar batzuen buruan oraindik ere dirauten ideia  baztertzaileak betikotzen direla saihesteko. Eta tresna horietako bat gomendioen dekalogoa izan liteke.

10 gomendio

1. Erkidegoaren giza kapitala balioztatzea. Erkidegoaren testigantzari eta esperientziari azterketa-gaitasuna ematea, difamazioa eta bereizkeria eragiten duten pentsamenduak ezabatzeko.
2. LGTBI pertsonen bizipenak, beharrizanak eta ekarpenak gizartearen parte gisa sartzea eta zeharkako material bihurtzea informazioaren ildo desberdinak lantzeko orduan.
3. Hiritarrek osasun, segurtasun eta partaidetzako gaietan tratamendu egokia jasotzeko dituzten eskubideak aldarrikatzea, kolektiboak horien betearazpenean agente aktibo bihurtuz.
4. Komunikabideekiko lankidetza sustatzea gai guztietan; baita kolektiboei buruzko gai zehatzetan, gizartearen erretratu egokituagoa egin dadin, LGTBI kolektiboaren irudi zehatzagoa lortuz.
5. LGTBI kolektiboa talde heterogeneoa da. Hori dela eta, komunikabideen erantzukizuna da estereotipo negatiboak sortzen ez laguntzea. Horrenbestez, beharrezkoa litzateke helarazten diren iritziak eta adierazpenak zaintzea, gaien ikuspegi orekatua eskaintzeko asmoz.
6. Komunikabideak LGTBI elkarte eta kolektibo desberdinetara hurbiltzen direla sustatzea, gai eta edukien tratamendu, terminologia eta ikuspegiak adostuz, estilo-eskuliburu bat egin ahal izateko.
7. Komunikabide sozialek homofobia, lesbofobia eta transfobiaren aurkako borroka aldarrikatzen parte hartu behar dute, guztion kontuan baita, eta LGTBI pertsonek jarrera estigmatizatzaileak eta oldarkorrak ezabatzeko egiten dituzten lan eta ekintzak hedatu eta balioztatu behar dituzte.
8. Homofobiaren edo desinformazioaren gaitza jasan duten talde eta pertsonei laguntza ematea jabekuntza pertsonalerako prozesuan, hiritarrei helaraziko zaizkien jardunbide onak eta ereduak aurkeztuz.
9. LGTBI erkidegoa aktiboa izan behar da informazio, komunikazio edo teknologia berriei dagokienez, kolektiboen, LGTBI pertsonen eta komunikabideen artean partaidetza, lankidetza eta laguntzarako elkarrekiko konpromisoak sustatuz.
10. Komunikabideek eta erakunde publikoek ez dituzte homofobia eta LGTBI pertsonen eskubideen aurkako gainerako jarrerak segurtasunaren edo hezkuntzaren arloko gai gisa jorratu behar soilik; pertsonen bizitzako alderdi guztiei zeharka eta era positiboan eragiten dieten jarrera eta iritziak sortzen lagunduko duten agente bihurtu behar dira.