INDARKERIA MATXISTAREN BEHATOKIA

INDARKERIA MATXISTAREN INGURUKO POLITIKA PUBLIKOAK

Agintaritza publikoek indarkeria matxistaren arloan egiten dituzten jarduketak 3 ardatz hauetara bideratu behar dira: prebentzioa, arreta eta erreparazioa.

Jarduketa horiek modu honetan diseinatu, jarraitu eta ebaluatu behar dira:

  • Ikuspegi integral, koherente eta koordinatuarekin.
  • Ikuspegi feminista eta intersekzionalarekin.Emakume eta neskatoen bizi esperientziak konplexuak eta askotarikoak dira, eta beraiei laguntzeko prozesuen abiapuntua ahalduntze indibiduala eta kolektiboa izan behar da, eta prozesuok beraien beharretara egokituta egon behar dira.
  • Une oro bermatu behar zaie sufritutako kaltea erreparatzeko duten eskubidea.

GARAPENAREN JARRAIPENA

PDFa deskargatu Garapenaren jarraipena (PDF, 581 KB)

JARDUKETA BALIABIDEAK

Hemen kontsulta dezakezu udalerri bakoitzak emakumeen eta gizonen arteko berdintasunean lan egiteko eta indarkeria matxista prebenitu, artatu eta erreparatzeko dituen tresna eta jarduketei buruzko informazioa.

Ikus baliabideak eremuka

GIDAK ETA JARDUNBIDE EGOKIAK

ERREPARAZIOA

Indarkeria matxisten aurka jardutean biktimak sufritutako kaltea erreparatu behar da baita ere.

Indarkeria matxistaren biktima diren emakumeek kalte fisikoak eta psikologikoak sufritzeaz gain, beraien duintasunari eragiten dieten bestelako kalteak, mina, estresa, ongizate emozionalaren kaltetzeak eta abar sufritzen dituzte baita ere. Horretaz gain, enplegu aukerak, pentsioak, heziketa, diru-sarrerak lortzeko gaitasuna eta abar galtzen dituzte, eta beraien garapen profesionala kaltetzen da eta gastuei aurre egin behar izaten diete (juridikoak, medikoak, psikologikoak...).

Indarkeria matxista sufritu duten emakumeen bizitzetan sortzen den inpaktua izugarria da, eta kalte hori, ahal den neurrian, erreparatu egin behar dute erakundeek eta gizarte eragileek. Horregatik, beharrezkoa da neurri hauek eskaintzea:

Lehengoratzea:
Urratutako eskubideak (ukatuak, kenduak) itzultzea, indarkeriaren ondorioak kontuan hartuta eta biktimen ahalduntzetik abiatuta.
Indemnizazioa:
Biktima konpentsatzea sufritutako kalteengatik (moralak, ekonomikoak, lan aukerak galtzea, gastu medikoak, juridikoak...).
Errekuperazioa:
Bermatzea biktimek errekuperazio fisikoa, psikikoa eta soziala izan dezaketela arreta baliabideetan (justizia azkar eta doakoa eta osasun, psikologia eta abokatutza profesionalak eskuragarri izatea...).
Gogobetetzea:
Biktimei ahotsa eta sinesgarritasuna ematea. Biktimen erresilientzia estrategiak aitortzea. Biktimen duintasuna berrezartzea. Publikoki ikusaraztea biktimei ematen zaien babesa.
Ez errepikatzea bermatzea:
Erasotzaileak edo erasotzaileek ekintza horiek errepikatu ez ditzaten neurriak ezartzea. Adibidez, lanpostua aldatzea edo kaleratzea. Biktimak babesteko neurri eraginkorrez gain.

PREBENTZIOA

Prebentzioaren arloan, jarduketa publikoak bideratu behar dira honakoak ahalbidetzen dituzten prozesuak sortzera:

  • Indarkeria matxista identifikatzea eta horren inguruko kontzientzia hartzea, bere formarik sotil eta normalizatuenean.
  • Indarkeria matxistak jarraitzea ahalbidetzen duten egiturak eta sinboloak aldatzea.

ARRETA

Indarkeria matxistatik atera diren emakume biktimei arreta oso, feminista eta intersekzional batetik erantzun egokia emateko honakoak behar dira:

  • Baliabide egokiak eta kalitatezkoak
  • profesionalak biktimekin kontaktuan prestatzea eta
  • esku-hartzean parte hartzen duten zerbitzuen arteko koordinazioa.