SILICIE. Zerga Berezien Kontabilitate-liburuen Berehalako Horniketa

Kontabilitateko idazpenak zergapekoaren euskarri informatikoko kontabilitate-sistemaren bidez ematea.

• Kontabilitatea egoitza elektronikoaren bidez eramatera behartuta dauden establezimenduen titularrek euskarri informatikoko barruko kontabilitate-sistema propioa badute, sistema horretan erregistratutako idazpenen bidez eman ditzakete idazpen horiek?

  Bai, euskarri informatikoko beren kontabilitate-sistema sistemaren bidez eraman ahal izango dute kontabilitatea, eta sistema hori erabili ahal dute kontabilitateko idazpenak elektronikoki emateko, betiere zerga berezien xede diren produktuei eta, hala badagokio, produktu horiek lortzeko beharrezkoak diren lehengaiei dagozkien mugimenduak, prozesuak eta izakinak erregistratzen badituzte sistema horretan.

  Kasu honetan, Zerga Berezien Erregelamenduaren 50. artikuluan ezarritako zerga berezien xede diren produktuen kontabilitatea elektronikoki eman diren kontabilitateko idazpenek osatuko dute.

• Bizkaiko Foru Aldundiko Ogasun eta Finantza Sailari kontabilitateko idazpenak emateko nahitaezkoa den euskarri informatikoko barruko kontabilitate bat izan behar dut?

  Ez.

  Establezimenduan kontabilitatea eramateko eta kontabilitateko idazpenak emateko euskarri informatikoko kontabilitate-sistema bat erabiltzea aukerakoa da.

  Establezimenduaren titularrak euskarri informatikoko kontabilitate-sistema hori badu, haren bidez eman ahal izango ditu kontabilitateko idazpenak.

  Ez badu aukera hori baliatzen, zuzenean Bizkaiko Foru Aldundiaren egoitza elektronikoan eman beharko ditu kontabilitateko idazpenak.

• Zer abantaila ditu zerga berezien xede diren produktuen kontabilitatea euskarri informatikoko barruko kontabilitate-sistema baten bidez eramateak?

  Kontabilitatea euskarri informatikoko barruko kontabilitate-sistema baten bidez eramatea aukeratzen bada, kontabilitateko idazpenak Bizkaiko Foru Aldundiaren egoitza elektronikoren bidez emateko epea luzeagoa da:

  1. Aukera hori egin ez duten establezimenduek zuzenean egoitza elektronikoaren bidez eraman beharko dute kontabilitatea, eta idazpenari dagokion mugimendua, eragiketa edo prozesua gertatu eta hurrengo 24 orduen barruan eman beharko dituzte kontabilitateko idazpenak.
  2. Euskarri informatikoko kontabilitate-sistema bat izanda, kontabilitatea eramateko eta idazpenak emateko sistema hori erabiltzea aukeratu duten establezimenduek idazpenari dagokion mugimendua, eragiketa edo prozesua gertatu eta hurrengo 24 orduen barruan erregistratu beharko dute idazpena sistema horretan, eta 5 egun balioduneko epea izango dute idazpena emateko. (2020an, epe hori 8 egunekoa izango da)

• Zer baldintza eskatzen du Bizkaiko Foru Aldundiko Ogasun eta Finantza Sailak barruko kontabilitate-sistemarako?

  Establezimenduaren barruko kontabilitate-sistemak euskarri informatikoa izan behar du, eta establezimenduan egindako mugimendu, eragiketa edo prozesu guztiak erregistratzeko aukera eman behar du. Halaber, sistema horretatik abiatuta, kontabilitateko idazpen idazpenak Bizkaiko Foru Aldundiaren egoitza elektronikoaren bidez ematea ahalbidetu behar du.

  Establezimenduan euskarri informatikoko kontabilitate-sistema izatea aukerakoa da; ez du formatu jakin bat izan behar eta ez du baimenik behar.

• Barruko kontabilitate-sistema Administrazioaren eskura egon behar da?

  Euskarri informatikoko kontabilitate-sistema bat izanda, kontabilitatea eramateko eta idazpenak emateko sistema hori erabiltzea aukeratu duten establezimenduek Administrazioaren (zerga berezien arloko ikuskapen-zerbitzuak edo kontu-hartzailetza zerbitzuak) eskura izan behar dute euskarri informatikoko kontabilitate-sistema hori, establezimenduan bertan.

• Euskarri informatikoko kontabilitate-sistema bat izan eta idazpenak haren bidez emanez gero, zein da kontabilitateko informazio balioduna, erregistratutakoa ala emandakoa?

  Oro har, Zerga Berezien Erregelamenduaren 50. artikuluan ezarritako betebeharrak direla eta, kontabilitate balioduna Bizkaiko Foru Aldundiaren egoitza elektronikoaren bidez emandako kontabilitateko idazpenek osatuko dute.

  Hala ere, epe barruan emateko dauden mugimendu, eragiketa eta prozesuetarako baino ez, Zerga Berezien Erregelamenduaren 50. artikuluan ezarritako betebeharrak direla eta, euskarri informatikoko kontabilitate-sistema horretan erregistratutako kontabilitateko idazpenek osatuko dute kontabilitate balioduna.

• Nola eta noiz aukeratu ahal da idazpenak establezimenduaren euskarri informatikoko kontabilitate-sistemaren bidez ematea?

  Kontabilitatea egiteko eta kontabilitateko idazpenak emateko, establezimenduaren euskarri informatikoko kontabilitate-sistema erabili ahal izateko, aukera hori egin beharko da, elektronikoki, Bizkaiko Foru Aldundiaren egoitza elektronikoaren bidez.

  Behin-behinean, eskabide bat aurkeztu beharko da, Zerga Berezien eta Ingurumen Zergen Atalari zuzenduta, Bizkaibai –Bizkaiko Foru Aldundiaren bulego birtualaren bidez.

  Salbuespen gisa, 2020. urteari dagozkion idazpenak emateko, aukera hori 2020ko ekainaren 30era arte egin ahal izango da.

  Aukera hori ondorioak izango dituen urte naturala hasi baino lehen egin beharko da.

  Hala ere, jarduerak uneko urte naturalean hasi dituzten establezimenduek jardueraren hasierari buruzko aitorpena aurkezterakoan bertan egin ahal izango dute aukera, eta jarduera hasten denetik aurrera izango ditu ondorioak.

• Ez badut aukeratzen kontabilitatea eramateko eta idazpenak emateko euskarri informatikoko barruko kontabilitate-sistema erabiltzea, nola egin behar dut zerga berezien kontabilitatea?

  Kontabilitatea eramateko eta idazpenak emateko euskarri informatikoko barruko kontabilitate-sistema erabiltzeko hautua egiten ez baduzu, kontabilitateko idazpenak zuzenean eman beharko dituzu Tributu Agentziaren egoitza elektronikoan, idazpenari dagokion mugimendua, eragiketa edo prozesua gertatu eta hurrengo 24 orduen barruan.

• Idazpenak establezimenduaren euskarri informatikoko kontabilitate-sistemaren bidez emateko hautua berritu egin behar dut?

  Kontabilitate-liburuak sistema hori erabiliz egiteko hautua egiten dutenek gutxienez hautu hori egin duten urte naturalean zehar mantendu behar dute.

  Hautu hori hurrengo urteetarako ere badela ulertuko da, harik eta uko egiten ez zaion arte.

• Idazpenak establezimenduaren euskarri informatikoko kontabilitate-sistemaren bidez emateko hautua eginda, uko egin ahal diot hautu horri eta kontabilitatea zuzenean eraman Bizkaiko Foru Aldundiaren egoitza elektronikoren bidez?

  Hautua egin ondoren, gutxienez egin den urte naturalean zehar mantendu behar da, baina uko egin ahal izango zaio hurrengo urte naturalaren hasieratik aurrera.

  Uko egitea Bizkaiko Foru Aldundiaren egoitza elektronikoaren bidez bideratu beharko da.