• Gas isuriak oso arriskutsuak dira leherketak sor ditzaketelako.
• Butano-bonbonak toki aireztatuetan gorde behar dira, batik bat kanpoan.
• Goma laranjak, bridak eta erreguladoreak erregulartasunez berrikusi behar dira eta aldizka aldatu.
• Gas naturala teknikari aditu eta baimenduek bakarrik instala dezakete. Ez estali aireztatzerako zuloak.
• Oro har, itxi gasaren giltza gauetan eta etxetik irten behar duzunean; ez utzi konektatuta erabiltzen ez diren gas tresnak.
• Arduragabekeriekin arretaz ibili, batez ere giltzak irekita uztea ahaztu egin zaizulako.
• Kontuz, gas usaina nabaritzen baduzu ez piztu surik (pospoloa, zigarroa edo antzekoa), ezta gailu elektrikorik ere, txinparta bakar batek leherketa sor dezakeelako.
• Aireztatu gela, itxi giltza nagusiak eta deitu enpresa hornitzailea.

Egoera txarrean dauden instalazio elektrikoak, sarritan, suteak sortzeko arriskua izaten dute. Zirkuitulabur edo txinparta batekin hurbil dagoen objekturen batek sua har dezake eta, ondorioz, sua kontrolaezin bihur daiteke.

• Ez gehiegi kargatu entxufeak lapur askorekin. Kable elektrikoak potentzia jakin bat eramateko prestatuta daude, eta potentzia hori gaindituz gero, linea gainkargatu eta arrisku-puntu bat sortzen da.
• Ez egin lotura elektrikorik modu ezegokian edo behin-behinean. Ahal izanez gero, erabili konexio-blokeak eta ez zinta isolatzailea. Dena den, ez estali, bestela ezin izango baita akastun konexiorik aurkitu.
• Horman sartuta dauden etxetresna elektrikoen eta telebisten atzealdean utzi aireztatzerako hutsune bat, horrela, beroa xahutu egingo da.
• Ez utzi gailuak denbora luzean piztuta, berotzea gerta baitaiteke.
• Fusible bat aldatu behar baduzu, horren baliokideren bat ipini.
• Ezagutza handirik ez baduzu, ez ibili zure etxeko instalazio elektrikoekin eta gailuekin. Dei iezaiozu aditu bati.

Etxeetan gertatzen diren sute gehienak sukaldean bertan izaten dira, eta gehienetan arrazoi bera dela medio: zartagina plaka gainean piztuta gelditzen da eta sua hartzen du; sua ke-kanpairaino heldu eta, berau ez dagoenez behar bezain garbi, sua hedatu egiten da. Hortik aurrera ondorioak zein izan daitezkeen imajina dezakegu. Egoera hori saihesteko bi arau hauek jarraitu besterik ez da egin behar:

• Ez utzi ezer plaka gainean piztuta beste gauzaren bat egiten duzun bitartean. Telefonoz deitzen badute, umeak negarrez badaude edo ezustekoren bat gertatzen bada, zartagina sutik kendu eta itzali sukaldea.
• Kontuz ibili sukaldea ordu jakin batean pizten duten programagailuekin eta ez utzi umeei aginteekin ibiltzen.
• Ke-kanpaia garbi izan behar duzu, su txikiren bat hasiz gero eta iragazkietan hautsa eta koipea pilatzean oso erraz har dezakeelako su.

• Erretzaileek etengabe sorteen dituzte su-arriskuak.
• Kontuz ibili ahaztutako eta txarto itzalitako zigarroekin.
• Zaindu umeak, ez utzi laba eta sukaldeetan ibiltzen edo pospoloak erabiltzen.
• Etxeko gune-beroei arreta berezia eman, hala nola: berogailuak, sutontziak, tximiniak, etab. Izan ere, horiek sukoiak diren objektuetatik hurbil egonez gero konbinazio arriskutsua osatzen dute.
• Errezelak, mahai zapiak eta garbiketa-produktuak oso azkar hartzen dute su.
• Ez utzi arropak lehortzen erradiadore gainean.
• Arduragabekeriekin kontuz ibili: lisaburdinak arropa gainean utzi, sutan ontziak astuta utzi, etab.

Aipatu neurri guztiak balio dute, oro har, surik gerta ez dadin. Su-itzalgailua etxean izatea oso garrantzitsua da. Hala ere, sua gertatzen denean, lasaitasunez eta modu ordenatuan jardun eta hurrengo arauak jarraitu behar dituzu:

• Energiaren hornidura eten behar duzu, korronte elektrikoaren etengailu nagusia itzaliz. Gasaren bidez sua sorteen bada, itzaltzen saiatu baino lehen -ahal izanez gero- gasaren giltza itxi behar da. Askotan horrekin nahikoa da, erregairik eroaten ez duenez sutea automatikoki itzaltzen delako; baldin eta oraindik beste elementurik hartu ez badu.
• Itxi ateak eta leihoak. Horrela, oxigenorik ez egotean sua iraungi egingo da. Aitzitik, leihoak irekitzen badituzu keak irteteko, suak indar handiagoa hartuko du eta etxe osoan hedatuko da.
• Saiatu zaitez sua su-itzalgailuarekin amatatzen, edo holakorik ez baduzu, urez betetako ontzi batekin. Sua sukaldean hasten bada, sua hartu duen ontzia estali tapa batekin edo trapu heze batekin.
• Arau hauek guztiak etxeko sute txikietarako dira. Beraz, sua handia bada, arriskutik urrundu eta deitu berréala suhiltzaileei.
• Sua guztiz itzalita dagoenean soilik ireki leihoak, gela aireztatzeko.
• Baina gogoratu: beti da errazago sua eragoztea itzaltzea baino.