Bizkaiak araugintzako herri-ekimenak aurkezteko aukera 16 urtetik gorako gazteei eta erroldatutako europar batasuneko eta atzerritar pertsonei ireki die

Lehenik eta behin, 1985eko Foru Arauak eskatzen zituen 20.000tik 5.800era jaitsi du beharrezko sinadura kopurua, eta 16 urtetik gorako gazteek mota horretako ekimenak sinatzeko aukera eman die. Horrela, gazteei politika egiteko tresnak hurbiltzen dira, foru-erakundeak haien beharretara eta eskaeretara irekiz.

Gainera, arau berria bat dator egungo gizarte-errealitatearekin. Bizkaia anitza da, eta Bizkaian hainbat nazionalitatetako pertsonak bizi dira, politika publikoen eta zerbitzu publikoen hartzaile ere badirenak. Horregatik, Bizkaiko udalerriren batean bizi diren eta erroldatuta dauden 16 urtetik gorako pertsona guztiek herri-ekimenak sustatu eta izenpetu ahal izango dituzte euren sinadurarekin.

Arau berriaren beste berrikuntzetako bat da lehen aldiz herritarrei hitza ematen diela Batzar Nagusien Osoko Bilkuran, baina orain arte ezinezkoa zen hori, Gernikan hitza hartzeko ahalmena zuten pertsona bakarrak alderdi politikoen ordezkariak baitziren.

Bestalde, aurrerapen teknologikoekin bat etorriz, sinadurak biltzeko kanal digitalak erabiltzeko aukera arautzen da, baina paperezko sinadurari eusten zaio arrakala digitala saihesteko.

Era berean, emakumeen eta gizonen ordezkaritza orekatua sustatzen da ekimenaren batzorde sustatzailean, arau-proposamenak egitean emakumeen parte-hartzea sustatzeko neurri gisa eta Datuen Babesari eta Eskubide Digitalen Bermeari buruzko legeria betetzen dela bermatzen da, eta hori beharrezkoa da sinadurak bildu eta autentifikatzea bezalako eremu batean.