Bizkaiko Eskola Kiroleko Programan parte hartzen duten kirol-erakunde guztiek inguruabarrei ondoen egokitzen zaizkien neurriak hartu behar dituzte, haurrek eta nerabeek kirol-jardueretan segurtasunez parte hartzen dutela bermatzeko.

Heldu guztiek ulertu behar dute euren ardurapean dituzten haur eta nerabeak zaintzeko betebeharra dutela.

Gure kasuan, honako hauek ezartzen dute zaintzeko betebeharra:

• Haurrak eta nerabeak indarkeriatik begiratzeko babes integralaren Lege Organikoak.
• Bizkaiko Foru Aldundiko Kirol Zerbitzuak, 2023-2024 denboraldiaren hasieratik eskatzen hasi den eskakizunen bidez.
• Kirol-erakundeen barruan haur eta nerabeekin lan egiten duten profesional guztien kode etikoetan ezarri beharko litzateke.

Beraz, kirolaren arloan haurrak indarkeria-mota orotatik babestearekin zerikusia duen guztian, bi elementu hauek hartu behar ditugu kontuan:

Zaintzeko legezko betebeharra

Legean argi eta zehatz deskribatzen da nola jokatu behar duzun erakunde edo partikular gisa. Zaintzeko legezko betebeharra ez betetzeagatiko erantzukizuna kasu honetan bakarrik sortuko litzateke: gertakariren bat jazo, eta frogatu ahal izango balitz arriskua aurreikusteko modukoa zela, baina ez zela hura eragozteko neurririk hartu.

Baldin eta une jakin batean norbaitek jokabide desegokiren bat edo ustez jazotako gertaeraren bat salatzen badu, honako kasu hauetan agertuko litzateke pertsonaren edo erakundearen erantzukizuna:

• Ageriko arriskua zegoen.
• Ez zen identifikatu edo, identifikatu arren, ez zen neurririk proposatu minimizatzeko.
• Erakundeak eta pertsonak arriskua kontuan hartu beharra zuten, baina ez dute halakorik egin.
• Haur edo nerabe bati kalteak eragin zaizkio.

Aitzitik, beste gertaera, istripu edo egoera batzuk izan dira, nahiz eta horiek eragozteko baliabide guztiak jarri diren. Beraz, ez da pertsonen edo kirol-erakundeen erantzukizunik sortzen.

Zaintzeko betebehar morala

Erakunderen baten barruan eskolako kirol-jarduera bat egiten duten haur eta nerabeek ingurune seguru eta babesle batean daudela sentitu behar dute. Pertsona edo erakunde orok kirol-esparruan duen zaintzeko betebeharra eta profesionalek eta erakundeek beste eremu batzuetan (hezkuntza, osasuna, eskolaz kanpokoa, etab.) duten zaintzeko betebeharra berdin-berdinak dira.

Helduek eta kirol-erakundeek aztertu behar dituzte kirolean haurrekin lan egiteak dakartzan arriskuak. Zaintzeko erantzukizunarekin lotutako elementuak baloratu behar dira. Zaintzeko betebehar etikoak zerikusia du zure ardurapean dauden haur eta nerabeen segurtasuna eta ongizatea bermatzeko AHAL DEN GUZTIA EGITEArekin.

Nolanahi ere, Bizkaiko Foru Aldundiko Kirol Zerbitzuak laguntzeko hainbat neurri jarri ditu abian; besteak beste, bienestar.dudas@kunina.org helbide elektronikoa, harremanetan jartzeko zuen erakundean gorabeherarik izanez gero.

Itzuli