Bizkaiko Foru Aldundiak behin-behinean onetsi du Galdakaoko udal-mugarteko Guturribai industrialdearen eta Bekea auzoaren artean bidegorria eraikitzeko proiektua. Bidegorria 0,8 kilometroko luzera duen azpiegitura berria da, eta txirrindularien eta oinezkoen joan-etorrietarako erabiliko da. Zehazki, Bizkaiko Bizikleta Bideen 2023-2035 aldiko Lurralde Plan Sektorialeko Ibaizabal Bilbo-Zaldibar ardatzeko 1. linearen parte da. Proiektuaren oinarrizko aurrekontua 3.175.758,72 eurokoa da, eta gauzatze-epea, berriz, hamabi hilabetekoa.

Bizkaiko Aldizkari Ofizialean argitaratu eta hurrengo egunean, jendaurrean jartzeko 30 egun balioduneko epea hasiko da, Bizkaiko Bizikleta Bideen Foru Arauari jarraikiz.

L1ak 42,7 km-ko luzera du guztira, eta 139,37 km-ko bigarren mailako sare batean oinarritzen da, Nerbioi–Ibaizabal–Arratia–Durangaldea bizikleta-eremuan, hain zuzen ere. Orain jendaurrean ikusgai dagoen tartea, Bengoetxe eta Erletxeraino doazen inguruko beste bi proiekturekin batera, Urbi-Erletxe igarobidearen barruan dago.

Bidegorriaren diseinuak bi plataforma bereizi ditu: lau metrokoa txirrindularientzat eta bi metrokoa oinezkoentzat. 30 km/h inguruko bizikleta-abiadura ahalbidetuko du, eta horrek joan-etorri eroso eta seguruak bermatuko ditu, bai eguneroko erabilerarako, bai aisialdirako.

Gainera, proiektuak urte osoan kalitate- eta iraunkortasun-estandar altuekin funtzionatzeko diseinatutako eguzki-luminaria hibrido orientagarriak ditu, integratutako xafla eta bateriarekin.

Era berean, AP-8 autobidearen paraleloan doan zatian gutxienez bi metroko altuera izango duen pantailatze-sistema aurreikusten da, zeina helburu bikoitza izango baitu: txirrindularien eta oinezkoen trafiko-zaratarekiko esposizioa murriztea eta ibilbide berria paisaian hobeto integratzea. Horrek bide-azpiegitura handi baten paraleloan doan zirkulazioaren ikusizko eragina murriztuko du.

Garraio-alternatiba bat

Guturribai-Bekea tarte berria A-8/AP-8 eta N-634 errepideen trazatuari jarraikiz diseinatu da, eta Galdakaoko jarduera- eta bizitegi-zentro nagusietatik oso gertu dauden espazioak zeharkatuko ditu. Horrela, udalerrien arteko distantzia labur eta ertaineko ibilbideetarako motordun joan-etorrien ordezko ibilbidea eratuko da, kirol-aisialdirako azpiegitura gisa ez ezik, edozein motatako eguneroko joan-etorrietarako benetako aukera gisa ere pentsatua.

Bizikleta-bide berriak oinez edo bizikletaz Bilbo Handiko, Basauriko, Galdakaoko, Zornotzako eta Txorierriko eta Arratiako haranen arteko sarbidea erraztuko du, eta intermodalitatea hobetuko du inguruan dauden eta aurreikusita dauden garraiobide publiko jasangarriekin: aldiriko trenak, autobus-lineak eta metroaren 5. linea, besteak beste.

Jarduketa hau Bizkaiko Lurralde Historikoko Bizikleta Mugikortasuneko Estrategiaren barruan kokatzen da, 2050eko Euskal Estrategian zehaztutako deskarbonizazio helburuekin eta klima-neutraltasunarekin lerrokatuta, Europar Batasunaren esparruarekin eta Parisko Akordioarekin bat etorriz. Bizikleta-bideen sarea garatzeak 2030erako berotegi-efektuko gasen emisioak gutxienez % 40 eta 2050erako % 80 murrizten lagunduko du, 2005eko emisio-mailak erreferentziatzat hartuta.

Bizkaiko Bizikleta Bideen Lurralde Plan Sektorialaren helburua Bizkaiko udalerriak eta eskualdeak lotuko dituen sare handia sendotzea da. Horrekin, bizikletaz egindako joan-etorrien kuota egungo % 0,7tik 2029ko % 3,3ra igo nahi da, 2035ean % 7,7ra iritsi arte.