Gobernu Kontseiluak behin-behinean onetsi du Nerbioiko bizikleta-bidearen trazatu-proiektua, Arrigorriaga (Martiartu)-Ugao tarteari dagokiona, eta erabaki du 30 egun baliodunean informazio publikoaren izapidea aplikatzea, bai eta bizikleta-bideen araudi sektorialean xedatutako entzunaldi-izapidea ere.

Jarduketak bizikleta eta oinezkoentzako ibilbide bat egiteko behar diren obrak definitzen ditu, trazatu-mailan. Ibilbideak Arrigorriagako Martiartu industrialdea Ugaoko hirigunearekin lotuko du, Zeberioko udal-mugaraino. Proiektua Nerbioi ardatzaren L1.2 bigarren mailako arteriaren parte da, eta 2023-2035 Bizkaiko Lurraldeko Bizikleta Bideen Plan Sektorialeko bizikleta-bideen xede-sarean jasota dago.

Azpiegitura honen helburua da inguruko hiriarteko bizikleta-sareari jarraitutasuna ematea; eguneroko joan-etorriak bizikletaz eta oinez egin daitezen bultzatzea, eta bizitegi-, industria- eta zerbitzu-eremuen arteko konektagarritasuna hobetzea. Gainera, ibilgailu pribatuekiko mendekotasuna murriztu nahi da, eta mugikortasun jasangarriagoa sustatu, bizikleta-bideen foru-planaren helburuei jarraikiz.

Proiektatutako ibilbidea noranzko biko bizikleta-zidor bat izango da, guztira 3,14 kilometrokoa, eta oinezkoentzako bide bat ere egingo da haren alboan. Sekzio tipoak 5 metroko zabalera izango du guztira (3 txirrindularientzat eta 2 oinezkoentzat), eta metro bateko areka.

Trazatuak lau tarte ditu: Martiartu-Arrigorriagako IATa; Arrigorriagako IATa-Ondategi auzoa; Ondategi auzoa-hilerria, eta hilerria-Zeberioko zubia. Bizikleta-bidea Nerbioi ibaiarekiko paraleloa izango da, eta, ahal den guztietan, lehengo bideak baliatuko ditu. Gainera, ibaiaren gaineko pasabide bat gehituko da, Txako industrialdetik irisgarritasuna hobetzeko.

Proiektuak 19.392.731,29 milioi euroren aurrekontua du, eta 24 bat hilabeteko egikaritze-epea. Informazio publikorako aldiaren ostean, proiektuaren hurrengo urratsa egin ahal izango da: eraikuntza-proiektua idatzi eta onestea.

Lurralde-esparrua

Jarduketa Bizkaiko bizikleta-sarearen foru-plangintzaren barruan dago, zeinak ardatz nagusiak eta bigarren mailakoak egituratzen baititu udalerrien eta eskualdeen arteko konektagarritasuna indartzeko. Kasu honetan, L1.2 linea Nerbioiko ardatzarekin lotuta dago, eta AP-68 eta BI-625 bide-azpiegiturak hartzen ditu erreferentziatzat.

Proiektuaren planteamenduak kontuan hartzen ditu mugikortasunaren, segurtasunaren, jarraitutasunaren eta irisgarritasunaren arloko efizientzia-irizpideak, eta lehengo azpiegituretan oinarritzen da, lurralde- eta ingurumen-eragina minimizatzeko. Gainera, bizikleta-sarea bultzatzea lagungarria da berotegi-efektuko gasen emisioak murrizteko eta deskarbonizazioaren eta mugikortasun jasangarriaren helburuetan aurrera egiteko.

Foru bizikleta-sarea 2023-2035 Bizkaiko Lurraldeko Bizikleta Bideen Plan Sektorialaren barruan dago, zeinak helburu baitu eguneroko joan-etorriak egiteko baliagarria den azpiegitura bat finkatzea, garraio publikoarekin konektatua eta bizikletarentzat kuota modala irabaztera bideratua.