Bizkaiko Foru Aldundiak Artxandako Tuneletako Gau Krosa aurkeztu du.  

Artxandako Tuneletako Gau Krosa lasterketa urriaren 3an egingo da, 20:30etik aurrera, eta 750 kirolarik parte hartuko dute.

Probak kirol-esperientzia berezia eskainiko du, parte-hartzaileei Bilboko errepide-tunel nagusietako batzuk zeharkatzeko aukera emanez, guztiz kontrolatutako eta okasiorako bereziki prestatutako ingurune batean.

Irteera eta helmuga puntu berean egongo dira, Ugasko–Artxanda tunelean, Artxandarako goranzko noranzkoan. Handik, parte-hartzaileek hiru tunelok zeharkatuko dituen zirkuitua egingo dute: Ugasko–Txorierri tunela, Txorierri–La Salve tunela eta La Salve–Ugasko tunela; azkenik, Ugaskoko abiapuntura itzuliko dira.

Horrela, probak aukera emango du hiru tunelak zirkuitu zirkular batean zeharkatzeko, irteera eta helmuga puntu berean izanik.

Zirkuituak 3,5 kilometro inguruko luzera izango du eta bi aldiz osatu beharko da; guztira, 7 kilometro inguruko distantzia egingo da. Formatu horri esker, ibilbide osoa bi itzulitan egin ahal izango da, eta jarduera guztia, bai irteera bai helmuga, espazio berean kontzentratuko da.

Proba hasiko da tunelak trafikoari itxi eta ekitaldia behar bezala garatuko dela bermatzeko beharrezko egiaztapen guztiak egin ondoren. Ibilbidea behar bezala mugatuta, seinaleztatuta eta argiztatuta egongo da, eta antolakuntzako, segurtasuneko, osasun-laguntzako eta kontroleko langileak izango dira ibilbideko hainbat tartetan.

Segurtasun-arrazoiak direla eta, eta tunelen barruan joan-etorri arina bermatzeko, irteera mailakatuta antolatu ahal izango da, taldeka edo irteera-kaxoien bidez, behin betiko parte-hartzaile kopuruaren eta aurreikusitako erritmoen arabera. Horrela, lasterketa osoan zehar esperientzia segurua, ordenatua eta guztiz kontrolatua bermatuko da.

Artxandako Tuneletako Gau Krosa gaueko herri-lasterketa berezia eta ikusizko inpaktu handikoa da. Artxandako hiru tunelak zeharkatzea du helburu, 7 kilometroko zirkuitu itxi batean, Bizkaian inoiz egin gabeko kirol-esperientzia batean.

Modu berezian, azpiegitura estrategiko bat irekiko zaie herritarrei, hain zuzen ere haren eraldaketa-prozesuaren une erabakigarri batean.

Probak aukera emango du barrutik eta modu erakargarrian erakusteko zenbaterainokoa den abian den birgaitze integrala.

Lasterketa bat baino gehiago da.

Gau batez, azpiegitura handi bat esperientzia bihurtu nahi da hala herritarrentzat nola kirola egingo dutenentzat.