Datorren azaroaren 8an, igandea, beste hitzordu bat izango dugu 100 Mendietako Ermandade Egunean. Derioko kanpoko udal pilotalekuan, Arantzazu kaleko 4. zenbakian, elkartuko gara, 08:30ean, handik Berreaga mendira (363 m) igotzeko.

Mendi ibilbidea leku berean hasi eta amaituko da. Antolakuntzan laguntzaile den Untza Mendi Taldeak prestatu du ibilbidea, eta hemen kontsulta daiteke.

Ohi bezala, ibilbidea amaitu ondoren, Ermandadeko kide berriei ongietorria egingo diegu Derion, ospakizun txiki batekin. Bertan, diplomak eta sariak banatuko dira.

Aurten, Ehun Mendien Lehiaketako 130 ehuneko osatu izana aitortuko da. 63 lagunek lehen aldiz osatu dute lehiaketa, eta 100 Mendietako Ermandadeko kide direla egiaztatzen duen diploma jasoko dute. Beste 67 laguni, berriz, beste ehuneko bat osatu izana aitortuko zaie.

Horrez gain, Mendeurreneko Ehuneko Bereziaren diplomak jasoko dituzte 5 lagunek, eta «600 Gailurrak» erronkari dagokion EMFren aitortza ere egingo da.

Era berean, opari bat jasoko dute bai Ermandadeko kide berriek, bai beste ehuneko bat osatu dutenek. Oparia ez zaio beste inori emango hartzailearen ordez, eta jardueran parte hartzen ez dutenei ere ez zaie etxera bidaliko.

Banaketa amaitutakoan, pintxopoteaz gozatzeko aukera izango dugu.

Izen-ematea doakoa da, baina derrigorrezkoa jardueran parte hartzeko. Jarraian aurkituko duzu izena emateko formularioa. Izena emateko epea: azaroaren 5a.

Ehun urte baino gehiago igaro dira euskal mendizaletasunaren aitzindariek gaur egun mendi lehiaketa deitzen diegunak sortu zituztenetik. 1914ko irailaren 30eko gauean, Bilboko Club Deportivoko mendizale talde bat Ganekogortako tontorrera igo zen, isilpeko itun batean bezala, Euskal Herriko lehen mendi lehiaketa gisa historiara igaroko zena abian jartzeko. Antxon Bandrés Azkueren eskutik, tontor hartan diseinatu zuten mendizale talde batentzako lehen erronka, mendizaletasuna modu sistematiko, jarraitu eta planifikatuan sustatzeko helburuarekin.

Ehun Mendien Lehiaketa Euskal Herriko Mendien Katalogoan jasotako ehun mendi desberdinetara igotzean datza, EMF-FVMren batzarrak onartutako araudian ezarritako baldintzak betez. Gaur egun, Ermandadeak 7.785 mendizale eta 5.051 historial ditu guztira.