Ganguren Mendi Taldeak Galdakaoko lehen orientazio zirkuitu iraunkorra aurkeztu du; kirola eginez udalerriko ondarea, historia eta kultura balioan jartzen dituen logika eta estrategia jokoa. Bizkaiko bigarren orientazio zirkuitu iraunkorra da Aperribai inguruan sortu dena eta Galdakaoko Udalaren babesean jarri da martxan. Hain zuzen, hainbat eragileren arteko elkarlenaren emaitza da egitasmoa eta horren erakusgarri da aurkezpenean parte hartu duen ordezkaritza. Bertan batu dira Asier Korta, Galdakaoko Kirol zinegotzia; Eduardo Olea, Ganguren MTko presidentea; Joseba Bolaños, Bizkaiko Orientazio Klubeko (COBI) presidentea; Alberto Boveda, Bizkaiko Orientazio Klubeko kide eta mapak egiteko arduraduna; Ainara Ibarra, Orbelako ordezkaria, eta Xabier Valencia, historialaria.

Kortak eskerrak eman dizkie bertaratutako guztiei emandako laguntzagatik eta orientazio zirkuitu iraunkorrak, kirola egiteaz gain, Galdakaoko ondarearen, historiaren eta kulturaren ezagutza sustatzen dituela nabarmendu du. Bakarka, lagunekin edo familiarekin gozatzeko aisialdi modu berri bat da, gaineratu du.

Ganguren MTko presidenteak adierazi duenez, 2019an elkartea udalerrian seinaleztapen lanak egiten hasi zenetik, 200 kilometro inguru seinaleztatu dira udalerrian Udalaren laguntzari esker. Ildo horretan, azaldu du iaz sortu zirela zirkuitu honen ideia eta laguntzaileak bilatzeko lanak.

Horien artean, Xabier Valencia historialari galdakoztarra dago, proiektuarekin bat egitea berehala onartu zuena, bere hitzetan kultur ondareari, leku historikoei, toponimiak berreskuratzeari eta abarri balioa emateko asmoz. Orbelak ere ekimenean parte hartu du, seinaleak diseinatuz, fabrikatuz eta jarriz, Ainara Ibarra ordezkariak azaldu duenez. Era berean, erronka hau Udalaren laguntzari esker aurrera atera dela azpimarratu du eta paisaiaz eta naturaz errespetuz gozatzearen garrantzia gogorarazi du.

Hiru ibilbide

Azkenik, Alberto Boveda COBIko kideak proiektuaren bidez orientazioa ezagutarazteko aukera nabarmendu du eta zirkuituaren dinamika azaldu du.

Galdakaoko orientazio zirkuitu iraunkorrak mailaka bereizitako hiru ibilbide ditu: horia, Jugu-Aperribai, 2,1 kilometrokoa; laranja, Aperribai-Olabarrieta-Txistulanda, 3,5 kilometrokoa; eta gorria, Jugu-Aperribai-Olabarrieta-Txistulanda, 5,5 kilometrokoa. Plano batean markatutako ibilbidea egin behar da. Horretarako, orientazioa oinarri hartu, eta kontrol puntuak bilatu beharko dira. Kasu honetan, zentzu ludikoari erabilera didaktikoa gehitu zaio, izen, toponimia eta leku ez oso ezagunak eta interes kultural eta historikoren bat dutenak ezagutarazten saiatuz. Kontrol puntuetatik igarotzen dela egiaztatzeko, app bat erabil daiteke mugikorrean, bai eta balizetan jarri diren QR kodeak ere. Informazio guztia eta planoak Ganguren MTren webgunean daude eskuragarri.