Garraioak, Mugikortasuna eta Turismoa Sustatzeko diputatuak, Sonia Pérezek, Bizkaiko Batzar Nagusietako bidezko batzordean agertu da gaur goizean, berak hala eskatuta, Bizkaiko Bizikletaren 1. Barometroaren eta joan den urriaren 16an martxan jarri ondoren Bizkaibizi zerbitzuaren emaitzak aurkezteko.

Lehen Barometro honen emaitzen arabera bizikletak garrantzi handia du Bizkaiko gizarte-sarean.

Hala, Bizkaiko herritarren %50ek bizikleta propioa du, eta %38k garraiobide horren ohiko edo noizbehinkako erabiltzailetzat jotzen du bere burua.

Bizkaian bizi diren biztanleen %6k adierazi du bizikleta erabiltzen duela lanera edo ikasketa-zentrora joateko.

%92k adierazten du bizikletan ibiltzen badakiela, eta %71k uste du zuzen zirkulatzen badakiela.

Bizikletan ibiltzen dakitenen artean, gizonen artean %97 dira eta emakumeei dagokienez % 88. Bigarren kolektiboari dagokionez, zuzen zirkulatzen dakitela diotenak gizonen kasuan %90 dira, eta emakumeen kasuan %64.

Bizkaiko etxeetan batez beste 2,6 bizikleta daude, eta Mountain-Bike eredukoak dira ohikoenak (%70).

Bizikleta elektrikoak gero eta leku handiagoa hartzen ari dira ranking honetan. Bizkaiko herritarren %6k adierazten du horrelako bizikleta bat duela.

Bizikletaren erabilera, oro har, kirolarekin (%49) eta osasunarekin (%44) lotzen da, eta arrazoi gisa agertzen dira, halaber, mugikortasuna (%36) eta ingurumena (%31).

Oro har, ohiko erabiltzaileen artean bizikletak jarraitzaile gehiago ditu garraiobide azkarragoa delako.

%52k uste du bere udalerria abegikorra/segurua dela bizikletan ibiltzeko eta, era berean,  alde handiak nabarmentzen dira pertzepzio horretan eskualdeka. Horrela Ezkerraldea (%31) eta Busturialdea (%44) dira bizikletan ibiltzeko abegitasun/segurtasun gutxien duten eskualdeak, eta Enkarterriak (%77), Arratia-Amorebieta (%73) eta Eskuinaldea (%70) dira abegikorrenak.

Euren udalerria bizikletarentzat abegikorra/segurua ez dela uste dutenen artean, bizikleta bideen falta edo diseinu txarra (%73), gehiegizko trafikoa (%51), egokitu gabeko udalerria (%41) edo orografia (%37) nabarmentzen dira, besteak beste.

Herritarren %73k hirian bizikletaz mugitzeko zailtasun nagusien artean honako hauek nabarmentzen dituzte: gehiegizko trafiko motorduna; bidegorri gutxiegi; lapurreten arriskua; edo bizikletak aparkatzeko toki gutxiegi.

Ikerketa IKERFELek egin du 2023ko urria eta azaroa bitartean, Bizkaiko eskualdeetan bizi diren 14-70 urteko biztanleria orokorrari egindako 1.005 elkarrizketa oinarri hartuta. Eta, gainera, beste 551 elkarrizketa egin dira BizkaiBizik funtzionatzen duen 9 udalerrietan.

Politika publikoak

Azterlanak, halaber, administrazio publikoek bizikletaren erabileraren sustapenean duten zeregina aztertu du. %55ek uste du administrazioak erabilera asko eta dezente artean sustatzen ari direla.

Elkarrizketatutako pertsonen ustez bizikletaren erabilera bultzatzeko bizikletentzako aparkalekuak egokitu behar dira geltokietan eta garraio publikoko geralekuetan (%88); hiriarteko bidegorri gehiago eraiki behar dira (%88); edo aparkaleku gehiago zentro publiko eta pribatuetan (%83), beste ekimen batzuen artean.

Lehen aldia da hain azterlan zabala egiten dela Bizkaian bizikleta erabiltzeko ohiturak eta garraiobide honi buruz dagoen pertzepzioa aztertzeko. Beraz, aurreko daturik ez dagoenez, ezinezkoa da Bizkaiko bizikletaren lehen barometro honetan lortutako emaitzak alderatzea eta lurraldean bizikletaren erabilerak duen bilakaera baloratzea. Datu hori, nolanahi ere, hurrengo urteetan ebaluatu ahal izango dugu, azaldu du Sonia Pérez diputatuak.

BiziPark eta BiziPuntuen balorazioa

Hala ere, azpimarratzekoa da Sailak bizikletaren erabilera sustatzeko bultzatu dituen ekimenetako bik lortu duten nabarmentasun- eta balorazio-maila handia.

BiziPuntuak deiturikoak, bizikletak konpontzeko eta mantentzeko estazio txikiak, biztanleen %43k eta ohiko erabiltzaileen %62k ezagutzen dituzte, eta 7,7ko batez besteko balorazioa jasotzen  dute.

Dagoeneko BiziParkak dituzten  Ermuan  eta Derion bizi diren biztanleen %43k sustatu diren bizikletentzako aparkaleku seguruak ezagutzen dituzte. Eta %43 horretatik, %70ek oso positiboen edo nahiko positiboen artean baloratzen dute, 7,6ko balorazioa emanez.

Beste alde batetik, nabarmentzekoa da Bizkaiko herritarrek ez dutela BiciRegistro sistema ezagutzen, Bizikletaren aldeko Hirien Sarearen mende dagoen bizikleten erregistro nazionala. Hala eta guztiz ere erabiltzaileen % 86k adierazten du sistema hori erabiliko lukeela lapurreta  gertatuz gero bere Udalak bizikleta berreskuratzeko aukera errazteko ezarriko balu.

BizkaiBizi zerbitzuaren ehun egunak

Azterlanak Bizkaiko Foru Aldundiak eta Barakaldo, Berango, Bilbo, Erandio, Getxo, Leioa, Portugalete, Santurtzi eta Sestaoko udalerriek bultzatutako BizkaiBizi bizikleta publikoaren zerbitzuaz Bizkaiko herritarrek duten pertzepzioa ere aztertzen du. Zerbitzu honek gaur betetzen ditu lehen ehun egunak funtzionamenduan.

Biztanleen %72k diote ezagutzen dutela. Datu hori %80raino igotzen da ezarrita dagoen 9 udalerrietako batean bizi diren pertsonen artean. Nabaritasun-mailarik altuena Portugaleten (% 94) eta Barakaldon (%92) dago, eta baxuena Bilbon (%72) eta Erandion (%77).

Gainera udalerrian BizkaiBizi zerbitzua dutenen %58k adierazten du oso pozik edo nahiko pozik dagoela zerbitzuarekin, eta batez besteko balorazioa 6,4koa da. Kontuan hartu behar da inkesta 2023ko urria eta azaroa bitartean egin zela, BizkaiBizi martxan jarri eta gutxira, eta, hala ere, ezagutza eta onarpen maila oso handia izan zela hasiera-hasieratik, adierazten du foru diputatuak.

Bizikleta publikoa alokatzeko sistema ez erabiltzeko arrazoien artean premiarik eza eta bizikleta propioa izatea daude.