Gasolio profesionala

Ordaindutako edo jasandako hidrokarburoen gaineko zergaren itzulketa partzialari aplikatzen zaio, ibilgailu jakin batzuen motorrean erregai gisa erabili den erabilera orokorreko gasolioari dagokionez.

Itzulketarako eskubidea

Honako ibilgailu mota hauen titularrek dute itzulketarako eskubidea:

  • Salgaiak errepide bidez besteren kontura edo norberaren kontura garraiatzeko bakarrik diren ibilgailu motordunak edo akoplatutako ibilgailu-taldeak, 7,5 tonako edo gehiagoko baimendutako gehieneko pisua dutenak.
  • Bidaiariak garraiatzeko ibilgailu motordunak, (garraio erregularra edo noizbehinkakoa), M2 kategoriakoak (pertsonak garraiatzeko ibilgailuak, gidariaren eserlekuaz gainera gehienez ere zortzi plaza dituztenak) edo M3 kategoriakoak (pertsonak garraiatzeko ibilgailuak, gidariaren eserlekuaz gainera zortzi plaza baino gehiago izan eta gehienez ere 5 tonako masa dutenak).
  • Nahitaezko garraio-txartela eta taximetro-aparatua dituzten taxiak.

Estatuko itzulketa-tasa, 1.000 litroko eurotan adierazia, zenbateko positibo hau izango dena: 1.3 epigrafeko tasa orokorretik 306 euro kendu eta tasa positiboko 48 euro gehitzearen ondoriozko zenbatekoa (itzulketarako eskubidea sortzen denean indarrean dauden tasak).
Hau da, gasolio profesionalaren onuradunentzako itzulketa 1000 litroko 49 € izango da.

Itzulketaren gehieneko zenbatekoa Ibilgailuko eta urteko 50.000 litrori legokiokeena izango da, taxien kasuan izan ezik; kasu horretan, itzulketaren gehieneko zenbatekoa ez da izango taxiko eta urteko 5.000 litrokoa baino handiagoa.

  1. Gasolio profesionalaren kontsumoen aurretik, itzulketaren onuradunaren zerga-egoitzari dagokion Zerga Administrazioari eskabide bat aurkeztu behar zaio, non ibilgailuaren edo ibilgailuen onuradun titularra eta ibilgailuen matrikula identifikatu behar baitira. Eskabidea Internet bidez aurkeztu behar da, nahitaez.

    Eskabide horretan, Espainiako matrikula duten ibilgailuen kasuan, Garraioko, Mugikortasuneko eta Hiri Agendako Ministerioak emandako salgaien edo bidaiarien garraio-txartelaren (garraio-lizentzia) zenbakia jasoko da, edo taxiaren udal-lizentziaren zenbakia eta hura dagokion udalerria.

  2. Hornigaiaren ordainketa, nahitaez, gasolio profesionalaren txartelaren bidez egin beharko da. Txartel hori Zerga Administrazioak gasolioa erosteko berariazko ordainbide espezifiko gisa erabiltzeko baimentzen duen zordunketa-, kreditu- edo erosketa-txartela da; erositako gasolio hori dela-eta eskatzen da zergak itzultzeko. Gasolio profesionalaren txartelak bertan adierazitako ibilgailu baimendua gasolioz hornitzeko bakarrik balio du. Txartelean, ondo ikusteko moduan, honako adierazpen hau agertuko da: «gasolio profesionala».

    Gasolioa hornitu ohi dizun erakundearen bidez jakingo duzu nola lor dezakezun txartela.

    Gasolio profesionalaren txartela erabiltzeak honako hau dakar berez:

    • Hala egindako ordainketak tributu-aitorpenaren balioa du, zeinaren bidez zergadunak itzulketa eskatuko baitu.
    • Itzulketak hiru hilean behin egingo dira, eta zergadunak adierazitako kontuan sartuko dira.

  3. Itzulketarako eskubidea duten onuradun guztiek urteko aitorpena aurkeztu beharko dute Bizkaiko Foru Aldundiaren egoitza elektronikoaren bidez, urte naturala amaitu eta hurrengo urteko hogeita bost egunen barruan. Aitorpenean, aurreko urtean onuradunen erroldan inskribatuta egon diren titulartasuneko ibilgailuetako bakoitzak egindako kilometroen kopurua adieraziko da; zehazki, aitorpenari dagokion urteko urtarrilaren 1ean eta abenduaren 31n egindakoen kopurua.

    Takografoa nahitaez erabili behar duten ibilgailuei dagokionez, takografotik lortuko da datu hori. Ibilgailuak ez badira izan ekitaldi osoan onuradun berarenak, zerrenda ibilgailuak benetan titulartasunean izandako aldiari bakarrik egokituko zaio.

Garraiolariak aukera al du bere elkarte, sindikatu edo aholkularitza-bulegoaren bidez jarduteko?

  • Garraiolariak —pertsona fisikoa edo juridikoa— Bizkaiko Foru Aldundiaren egoitza elektronikoan izapideak egiteko ordezkaritza pertsona edo erakunde bati eman badio, pertsona edo erakunde horrek haren izenean jardun ahal izango du erroldan altak, bajak edo aldaketak eskatzeko edo beste jarduketa batzuk egiteko.
  • Onuraduna elkarte edo sindikatu bateko kidea bada, elkarteak edo sindikatuak eman ahal izango diote alta edo baja sisteman, Foru Ogasunak baimena eman ondoren.

Hornidura propioko instalazioak

  1. Erabilera orokorreko gasolioa hartzeko establezimendua joko da hornikuntza-instalazio propiotzat, baldin eta titularra gasolio profesionalaren onuradunen erroldan inskribatuta badago, eta establezimendu horretatik gasolioz hornitzen badira instalazioaren titularraren ibilgailuak.
  2. Instalazio horien titularrek honako betebehar hauek izango dituzte:
    • Bizkaiko Foru Ogasuneko zerga berezien atalean dagoen erregistroan izena eman behar dute – kontsumoko instalazio propioa Bizkaian badute–, jarduera- eta establezimendu-kodea lortzeko. Horretarako, dagokion eskabidea aurkeztu beharko dio Foru Ogasunari.
    • Establezimendu bakoitzeko, Bizkaiko Foru Aldundiaren* egoitza elektronikoan aurkeztu behar dute titular gisa dituzten eta adierazitako baldintzak hiruhileko natural bakoitza amaitu eta hurrengo hogeita bost egunen barruan betetzen dituzten ibilgailuei egindako horniduren zerrenda Jaso beharreko datuak hauek dira: horniduraren identifikazioa, hornitutako litroen kopurua, erregai-mota, lekua, data, ordua eta ibilgailuaren matrikula. * Itzulketaren onuradunak helbide fiskala Bizkaian badu
  3. Aurkeztutako zerrendetan oinarrituta, onuradunaren zerga-egoitzari dagokion zerga administrazioak itzulketa erabakiko du eta banku-transferentzia egingo du onuradunak adierazitako kontura.