Bizkaiko 32 herritarrek herritarren aktibazioa eta boluntariotza aztertu dute, eta 25 gomendio proposatu dituzte herritarren inplikazioan aurrera egiteko.

Martxoaren 16an, larunbatean, Bilboko Euskalduna Jauregian, Bizkaiko Foru Aldundiak antolatutako herritarren aktibazioari eta boluntariotzari buruzko eztabaida-foroa izan da.

Aldundiak bultzatutako hirugarren Eztabaida-Foroa da, 2022an Herritarren Arretarako zerbitzuarekin lotutako lehen foro bat garatu zuena. Foro horren bidez 22 gomendio jaso zituen. 2023an bigarren eztabaida-foroa egin zen partaidetza ereduari buruzkoa. Horren bidez 24 gomendio jaso zituen.

Aztertu ondoren, Aldundiak 19 eta 23 gomendio ezartzeko konpromisoa hartu zuen, hurrenez hurren.

Eztabaida-foroa herritarren partaidetzarako tresna aurreratua da. Bertan, aukera-berdintasunaren printzipiotik aukeratutako pertsona-talde bat biltzen da, interes publikoko gai bati buruz hausnartzeko eta hainbat gomendio egiteko. Ildo horretan, eztabaida-foro bat herritarrek politika eta zerbitzu publikoak hobetzera bideratutako lankidetza-ariketa bat da.

Foroa hainbat dinamikaren bidez garatzen da. Dinamika horiek adituen informazioa eta parte-hartzaileek taldean egiten duten eztabaida konbinatzen dituzte, herritarrek ematen dituzten gomendioek ikuspuntu guztiak kontuan har ditzaten eta, beraz, gomendio kualifikatuak izan daitezen.

Oihane Agirregoitia, Bizkaiko Foru Aldundiko Gobernamendu Onaren, Herritarrenganako Laguntzaren eta Zerbitzu Digitalen zuzendariak aurkeztu zuen foroa. Eztabaidatutako gaiak kultura-eragileen aktibazioari, gazteen aktibazioari, enpresen aktibazioari eta elkartetik kanpoko gizartearen aktibazioari buruzkoak izan ziren.

Lan-jardunaldi horren ondoren, eztabaida-foroak Bizkaiko herritarren aktibazioari eta boluntariotzari buruzko 25 gomendio zehatz adostu ditu. Gomendio horiek Foru Aldundiak aztertu eta baloratu beharko ditu, inplementatu ahal izateko.