Amaia Antxustegik, Gizarte Ekintzako foru diputatuak, gaur Europako Parlamentuan egin duen esku-hartzean defendatu du beharrezkoa dela Europako Gizarte Funtsa Plus (EGIF+) indartsu, independente eta finantzaketa nahikoarekin mantentzea, gizarte-inklusioa mantentzeko, gizarte-zerbitzuak modernizatzeko eta Europako erronka demografiko eta sozial handiei erantzuteko funtsezko tresna delako. Bruselan egin den hurrengo Urte Anitzeko Finantza Esparruaren etorkizunari buruzko mahai-inguruan  Antxustegik 2028-2034 aldiko Europako aurrekontua zehazteko une garrantzitsuan Bizkaiko Foru Aldundiak duen jarrera azaldu du.

Europako Ganberako kideekin eta European Social Network (Gizarte Zerbitzuen Europako Sarea) erakundearen parte-hartzearekin bultzatu den topaketan Europako erakundeetako eta eskualdeetako eta tokiko administrazioetako ordezkariak eta gizarte-zerbitzu publikoetako arduradunak bildu ditu Batasunaren hurrengo aurrekontuaren etorkizuna eta,  bereziki, EGIF+ funtsek  gizarte-inklusioan eta gizarte-zerbitzuak indartzean duten zeregina eztabaidatzeko. Ekitaldiaren helburua hurrengo Urte Anitzeko Finantza Esparruaren  definizioan eragitea izan da, dimentsio sozialak pisua gal ez dezan eta lurraldeen ahotsa txertatuko duen gobernantza bermatzeko.

Eztabaida bereziki garrantzitsua da Urte Anitzeko Finantza Esparruak Europar Batasunaren aurrekontuaren lehentasunak finkatzen dituelako hainbat urtetarako, eta zahartzea, pobrezia, bazterketa edo iraupen luzeko zaintzak indartzeko beharra bezalako erronketan erantzuteko ahalmena zehazten duelako. Testuinguru honetan Antxustegik EGIF+ funtsen garrantzia azpimarratu du, enplegua, gizarte-inklusioa, aukera-berdintasuna eta babes-sistemen indartzea sustatzeko EBren finantza-tresna nagusia direlako.

Bizkairako eztabaida hau ez da abstraktua. Eragin zuzena du hurbiltasunean, prebentzioan, arreta komunitarioan eta zaurgarritasun handieneko egoeran dauden pertsonei laguntzean oinarritzen den gizarte-zerbitzu publikoen eredua finkatzeko gaitasunean. "Gizarte zerbitzuetan egiten den inbertsioa ez da gastua: inbertsioa da", azpimarratu du foru diputatuak.

Ziurtasun horretatik abiatuta Bizkaiak EGIF+ aurrekontu-tresna zabalagoen barruan desegiteak ekarriko lituzkeen arriskuez ohartarazi du. Antxustegik defendatzen duen eta European Social Networkek ere jasotzen duen posizioaren arabera, finantzaketa sozialak nortasun propioa galtzen badu, gizarte-inklusioarekin, pobreziaren aurkako borrokarekin edo pertsona zaurgarrienei laguntzearekin lotutako lehentasunak aurrekontuak bultzatzeko gaitasun handiagoa duten beste politika batzuen aldean baztertuta geratzeko benetako arriskua dago.

European Social Networken adierazpen ofizialak gogorarazten du, gainera, oraingo 2021-2027 aldian EGIF+ funtsak gutxienez baliabideen % 25 gizarte-inklusiorako gordetzen dituela, % 5 umeen pobreziaren aurkako borrokarako eta % 3 laguntza materialerako. Babes horiek ez dira argi jasota agertzen Europako Batzordearen proposamen berrian.

Lurralde-ahotsa duen Europa soziala

Bizkaiko Foru Aldundiaren ustez garrantzitsua da gizarte-funts espezifikoa zaintzea, ez bakarrik finantza-kontu batengatik, baita erakundeekiko eta ereduarekiko koherentziagatik ere. "Eskualdeentzat eta hirientzat  gizarte-inklusiorako funts espezifiko bat izateak lehentasun horiek agerikoak izatea, babestuta egotea eta modu eraginkorrean ezartzea bermatzen du", defendatu du Amaia Antxustegik.

Foru diputatuak berretsi du gizarte-beharrak, berez, hurbilekoak eta lurraldekoak direla, eta, horregatik, eskualdeetako eta tokiko administrazioek benetako garrantzia izan behar dutela Europako programen definizioan, inplementazioan eta jarraipenean. "Herritarrengandik hurbilen dauden administrazioak gara, zerbitzuak tokian bertan diseinatu eta ezartzen ditugunak", adierazi du, eta esan du parte-hartze hau ez dela soilik desiragarria, baizik eta ezinbestekoa Europako politiken eraginkortasunerako.

Bere esku-hartzean Antxustegik berariaz babestu du European Social Networken posizioa eta Bizkaiaren jarrera hiru eskaritan laburbildu du: EGIF+ sendoa eta independentea bermatzea, finantzaketa nahikoarekin eta gizarte-inklusiorako esleipen argiarekin; Gizarte Eskubideen Europako Zutabeari lotutako baldintza gaitzaileak berrezartzea; eta eskualdeetako eta tokiko agintariek Europako funtsen gobernantzan duten zeregina indartzea.

"Europa indartsuagoa, erresilienteagoa eta inklusiboagoa nahi badugu, anbizio hauek jasoko dituen aurrekontua behar dugu", adierazi du Amaia Antxustegik, eta gizarte-zerbitzuak eta pertsonak Europako proiektuaren erdigunean jartzea eskatu du.

Ildo horretatik, azpimarratu du Europa soziala defendatzeko beharrezkoa dela, halaber, tokikoaren zeregina indartzea, maila horretan eskubide sozialak benetan gauzatzen direlako zaintzak, etxebizitza edo inklusioa eskuratzearen bidez eta, era berean, nahitaezkoa dela lurraldeen arteko lankidetza eta ikaskuntza handiago batean aurrera egitea, partekatutako erronkei eraginkortasun handiagoz erantzuteko. Ildo betetik, ohartarazi du gizarte-premiek eboluzionatu egiten dutela eta gero eta konplexuagoak direla; beraz, zainketen erronkak politika publiko koordinatuagoak, malguagoak eta pertsonengan zentratuak eskatuko ditu.