Inguruko mendi ibilbideak balioan jartzen dituen argitalpen berria du Galdakaok; liburuxka herriko ingurune naturala ezagutarazteko eta seinaleztatzeko helburuarekin egindako urteetako lan kolektiboaren fruitua da. Ganguren Mendi Taldeak argitaratua, Udalaren lankidetza eta babesarekin, ekimenak inguruarekiko konpromisoa duten pertsona eta erakundeen ahalegin partekatua biltzen du.

Gidak ibilbide ezberdinen mapak jasotzen ditu, Ganguren, Arrizuriaga, Artetagana eta Kukuzburukoak adibidez, eta kirolarientzat garrantzitsuak diren datu praktikoak eta informazio zehatza eskaintzen ditu, hala nola luzera, zailtasun maila, malda, aholkuak eta hainbat bitxikeria. Argitalpena gaur aurkeztu da udaletxean. Bertan, Ganguren Mendi Taldeko lehendakari Eduardo Oleak eta erakundeko idazkari Ane Alvarezek Udaldeko Kirol zinegotzi Asier Kortarekin batera argazki ofiziala egin dute, proiektuaren garrantzia eta aldeen arteko lankidetza irudikatuz.

Galdakaoko zenbait herritarrek eta klubeko kidek bultzatu zuten proiektua, duela urte batzuk seinaleztatutako ibilbideak sustatzen hasi zirenean. 2012an Ganguren Mendi Taldeko zuzendaritzak onartu zuen proposamen bat prestatu zen, eta gerora, 2020an Udalarekin lankidetza hitzarmen bat egin zen, egitasmo horren garapena ahalbidetu zuena.

Proiektua faseka egin da, eta ordutik argitalpen berri honetan jasotzen den bide sarea egonkortzen joan da. Halaber, dokumentuak beste proposamen batzuk ere jasotzen ditu, hala nola Altamira Ibilbidea eta Burdin Hesiko ibilbidea, udal esparrutik bultzatuak.

Guztira 1.000 ale inprimatu dira, bai Udalean bai Ganguren Mendi Taldearen egoitzan (Gipuzkoa kalea 11) herritarrentzat eskuragarri egongo direnak, doan.

Hazkundean dagoen proiektua

Proiektua ez da hemen gelditzen. Etorkizunera begira honako proiektuekin jarraitzeko asmoa du mendi taldeak: Ibaizabal ertzetako eta adarretako ibilbideen seinaleztapena, herriko beste eremu batzuetara zabaltzea, eta ondasun kulturalak berreskuratzea, hala nola euskal labe tradizionalak.

Ganguren Mendi Taldeak proiektuan parte hartu duten pertsona eta erakunde guztiei eskerrak eman dizkie, baita aurreko lanean parte hartu dutenei ere, ekimena errealitate bilakatzeko aukera eman baitu. Udalak, bere aldetik, herritarrak animatzen ditu halako ekimenetan parte hartzera eta etorkizunean Galdakaoko ingurune naturalaren balioa handitzen jarraitzeko proposamen berriak garatzen laguntzera.