Doako webinar batek tresna eta baliabide praktikoak eskainiko ditu adimen artifiziala (AA) kirol erakundeen eguneroko kudeaketan txertatzeko. Online saioa azaroaren 23an izango da, 9:30etatik 11:30etara, IFH Consulting-eko Isabel Fernández Hidalgok gidatuta.

Adimen artifiziala hainbat erakunderen lan egiteko modua eraldatzen ari da, eta aukera berriak irekitzen ditu eraginkortasuna hobetzeko, baliabideak optimizatzeko eta zereginak sinplifikatzeko. Kirol-erakundeek ere jaso ditzakete teknologia horiek, kudeaketa errazteko eta beren jarduera eta helburuei denbora gehiago eskaintzeko.

Aukera horiek kirol-eremura hurbiltzeko asmoz, adimen artifizialari buruzko doako webinar bat egingo da, kirol-erakundeen kudeaketari aplikatua, AAren tresnek kirol-kluben eta -erakundeen eguneroko funtzionamendua hobetzen eta arintzen nola lagun dezaketen jakiteko.

Topaketan adimen artifizialeko hainbat tresna aurkeztuko dira, eta horien aplikazio praktikoak aztertuko dira, besteak beste, jardueren plangintzan, komunikazioan, barne-antolaketan eta erabakiak hartzean.

Prestakuntzak ikuspegi praktikoa eta parte-hartzailea izango du, kirol-erakundeen beharretara eta ezaugarrietara egokitutako adibideekin. Horrela, parte-hartzaileek aukera zehatzak identifikatu ahal izango dituzte teknologia horiek beren erakundeetan txertatzeko, haien tamaina edo eskura dituzten baliabideak edozein direla ere.

Jarduera hau 3K Programaren heziketa-zikloaren barruan sartzen da. Programa hori hiru Foru Aldundiek eta Eusko Jaurlaritzak sustatu eta diruz lagundutako prestakuntza- eta ekintza-ekimena da, eta Euskalit-Kudeaketa Aurreratuak koordinatzen du. Euskal Autonomia Erkidegoko (EAE) kirol-erakundeen kudeaketa hobetzen laguntzea du helburu, Kudeaketa Aurreratuaren eredua erreferentziatzat hartuta.