Bizkaiko ex situ flora mehatxatuaren kontserbazioa

2024. urtean jarraitu da& flora mehatxatuaren ex situ kontserbazioan eta Batasunaren interesezko habitaten lehengoratzean lan egiten. Germoplasma bilketan (hazi, espora, errizoma…) oinarrituta, hozitze protokoloen garapenak eta landare hazkuntzak gero eta garrantzi handiagoa hartu dute, ex situ kontserbazioa in situ kontserbazioaren osagarri gisa indartuz.

Urtean zehar EAEko germoplasma bilketak egin dira, 9 espezie mehatxaturen 12 akzesio jasoz, eta LEGBn gordetako laginen kalitatea bermatzeko ahalegin berezia eginez. Bildutako materialaren bideragarritasuna eta genetika aniztasuna mantentzea lehentasun izan dira, baita ex situ gordetako germoplasma erabiliz espezie mehatxatuak indartzeko proiektuak ere.

Gainera, hozitze testak eta protokoloak burutu dira 2024ko hazi berriekin. Proba horiek laginen kalitatearen jarraipenerako ezinbestekoak dira, eta beharrezkoa den kasuetan lagin berriak bilduko dira ordezkapenak egiteko.

Azpiegitura digitaletan, datu baseen etengabeko eguneraketarekin jarraitu da, eta gordetako akzesioen informazioa AIMJB eta GBIF plataformetan eskuragarri dago. LEGBko herbarioan dagoeneko 450 plegu baino gehiago daude, eta Phylopyr proiektuan bildutakoekin osatu da. Argazki-bilduma ere aberastu egin da.

Eusko Jaurlaritza eta Aldundien finantziazioaz gain, beste baliabide ekonomiko batzuk lortzeko egindako ahaleginari esker, LEGBren jarduera finkatu eta garrantzia indartzea lortu da.