Ekintza aukeratu:

• Europan dauden aukeren inguruko bulegoa irekitzea

  ×

  Europan dauden aukeren inguruko bulegoa irekitzea

  Aurrerapen-maila:

  %75

  2017an sortu zen Europako Orientazioko Bulegoaren helburua finantzaketa lehiakor europarreko proiektuen arloko parte-hartzea dinamizatzea da Bizkaiko Foru Aldundiari eta Lurralde Historikoko udalei dagokienez.

  Estrategia espezializatu bat ere diseinatu zen Bizkaiko 112 udalerrietarako, Erkidegoaren finantziazioa errazago eskura dezaten, eta jardunaldi bat antolatu zen Europako Orientazioko Bulegoa udalerriei aurkezteko, zerbitzu berri hori ezagut zezaten; eta diru-laguntzen beste dekretu bat prestatu da, 50.000 biztanle baino gutxiago dituzten Bizkaiko udalek Europar Batasuneko programa eta ekimenetan parte har dezaten sustatzeko (dekretu hori 2018an argitaratu eta zabaldu da). Horretaz gain, hiru lan-bilera egin dira Europar Batasunaren programa eta ekimenetan parte hartu nahi zuten Bizkaiko udaletako talde pilotuarekin.

  Halaber, web-atari bat egin da (bai BFArako, bai Bizkaiko udalerrietarako) ekintza hauetarako: interesgarriak diren deialdien berri ematea; proiektu europarretarako bazkideak bilatzea; sare telematiko europarrak ezagutaraztea; eta hautatu diren deialdietako gaiei lotuta dauden jardunaldi interesgarriak aurkeztea. Horretaz gain, deialdien abisuak jasotzeko zerbitzu pertsonalizatua jarri da martxan Bizkaiko udalerrietan. Zerbitzu horri esker, udalerriek Europako programa eta ekimenak modu pertsonalizatuan bidaltzeko eskaerak egin ditzakete, baita bazkideak bilatu ere, Europako Batzordeak proiektuak aurkeztu ahal izateko.

  Arlo honetako aukerei ahalik eta probetxu handiena ateratzeko, batetik, bilera bat antolatu da Madrilen Garapen Teknologiko Industrialeko Zentroarekin (CDTI) Horizon 2020 programak azpiegituren, ingurumenaren eta landa-garapenaren arloan zer aukera eskaintzen dituen eta eskainiko dituen jakiteko; eta, bestetik, ingurumenarekin erlazionatutako Europako deialdien inguruko prestakuntza-jardunaldi bat antolatu da BFAko teknikarientzat.

  Ekintza hau baloratu

• Enpresa txiki eta ertainak nazioartekotzeko laguntza-programak

  ×

  Enpresa txiki eta ertainak nazioartekotzeko laguntza-programak

  Aurrerapen-maila:

  %75

  Jarduketak bi laguntza-programa ditu:

  • ETEak nazioartekotzeko programa; xedea da enpresei herrialde berri batean sartzeko laguntza ematea. Norgehiagoka bidez aukeratutako enpresek 24 hilabete dituzte aukeratutako merkatuan sartzeko behar diren ekintzak egiteko. 2016 eta 2018 artean, nazioartekotzerako 234 proiektu babestu dira guztira programa honen bidez (2018. urtean aurreikusitako 50 proiektuak 2018-2019ko aldian garatzen joango dira).
  • Nazioarteko Partzuergoak Sustatzeko Programa kanpora elkarrekin irteteko lankidetza-proiektu batean parte hartzen duten enpresei laguntza emateko da. Proiektu hauek irabazi-asmorik gabeko erakundeek koordinatzen dituzte, besteak beste, elkarteek, klusterrek edo garapenerako agentziek. 2016an, guztira 46 lankidetza-proiektu babestu dira; haietatik 15 (2018an hautatutakoak) 2018-2019 denboraldian garatuko dira.

  Guztira, 2016 eta 2018 artean, lagundutako proiektuen inbertsioa ia 18 milioi eurokoa izan da, Bizkaian ETEn nazioartekotzea programa hauen bidez babesteko.

  Ekintza hau baloratu

• Bizkaiak nazioarteko foroetan duen presentzia bultzatzea

  ×

  Bizkaiak nazioarteko foroetan duen presentzia bultzatzea

  Aurrerapen-maila:

  %90

  Bizkaia inbertsio-leku eta kudeaketako ereduen erreferentzia bezala kokatzeko estrategiaren barnean, helburu horietarako garrantzitsuak diren foroetan parte hartzeko beharra txertatu da.

  Modu horretan, interesekoak izan daitezkeen foroak aztertu eta aukeratu dira, eta horren ondorioz, 2016an Aldundiak Smithsonian Folklife Festival-en eta ICLEIn – Hiri eta Herri Iraunkorren 8. Biltzarra– parte hartu zuen. 2017an eta 2018an, nazioarteko foro hauetan parte hartzen jarraitu dugu:

  • Aldaketa demografikoari buruzko Aliantza
  • Zahartze Aktiboaren Indizearen Adituen taldea, NBE-ak eta EB-ak sustatutakoa
  • Zahartze Aktibo eta Osasungarrirako Berrikuntza lortzeko Europako Elkartea (EIP AHA)
  • SIMWOOD (Batzorde Aholkulariko kide bezala egindako parte-hartzea)
  • Zahartze aktiboaren eta zilarrezko ekonomiaren astean, AAL Forum izan zen Bizkaian irailaren 24tik 26ra, eta arlo horretako Europako aditu nagusiek hartu zuten parte.
  • IQNET – Azaroaren 23an IQNET jardunaldiak izan ziren Bilbon; arrakasta handia izan zuten, eta Europako herrialde nagusietako egitura-funtsetako sailen arduradunak ere izan ziren bertan. BFA IQNET sareko bazkidea da, eta jardunaldien anfitrioia.
  • MOIN – Mariana Mazzucato irakaslea buru duen sarean sartu da BFA, eta itzal handiko irakasle hori laster Bilbora ekartzeko lanak egiten ari da. Londreseko University College-ko (UCL) Institute for Innovation and Public Purpose institutuko zuzendaria ere bada Mazzucato.

  Ekintza hau baloratu

• Bizkaiko enpresei laguntzea negozio-aukera izan daitezkeen Estatu Batuak, Latinoamerika eta Asia bezalako lekuetan

  ×

  Bizkaiko enpresei laguntzea negozio-aukera izan daitezkeen Estatu Batuak, Latinoamerika eta Asia bezalako lekuetan

  Aurrerapen-maila:

  %90

  Bizkaiko enpresa- eta erakunde-sareak egin duen nazioartekotze-prozesuari laguntzeko eta etorkizunera begira potentzial gehien duten merkatuetan posizionatzen laguntzeko, enpresei bideratutako hainbat laguntza-ekintza egiten dira. 2016an, 3 bidaia egin ziren, Mexikora (Querétaro) eta AEBra (Idaho eta Washington). 2017an eta 2018an, enpresekin batera joan ginen AEBra prestakuntza eta unibertsitateko enpresa eta eragile kultural ezberdinekin harremanetan jartzeko nagusiki. Horrez gain, Londresera joan ginen automobilgintzaren eta energiaren sektoreetako enpresekin, baita Nevadara ere (AEB). Guztira, 2018tik, enpresei laguntzeko 7 misio gauzatu ditu Aldundiak.

  Misio horiez gain, 2016tik hainbat herrialdetako 23 ordezkariri harrera egin zaie etorkizuneko merkataritza-harremanak aztertzeko edo jada badauden harremanak baieztatzeko. AEBtik politika- eta merkataritza-alorretako ordezkariak etorri ziren; hain zuzen ere, Idahotik, Texastik, Nevadatik eta Bostonetik. Europa mailan Errumaniako, Danimarkako eta Eskoziako ordezkariei egin zitzaien harrera. Horrez gain, Paraguaiko ordezkarien, Aljeriar-Espainiar Merkataritza Ganberako ordezkarien eta Nigeriako Energia ministroaren bisita izan genuen. Hala, horiek lurraldeko enpresak bisitatu zituzten eta elkarrizketak izan zituzten horiekin. Era berean, erakundeetako bisitak izan ditugu harremanak sendotzeko helburuarekin eta merkataritza-harremanek emaitzak izan ditzaten. Helburu horrekin etorri ziren Suediako, Belgikako, Danimarkako, Brasilgo, Turkiako, Filipinetako eta Erresuma Batuko enbaxadoreak, Errumaniako eta Brasilgo kontsulak eta Moraviako (Txekiar Errepublika) eta Buzauko (Errumania) ordezkari politiko eta komertzialak.

  Azkenik, Biscay Start Up Bay egitasmoaren barruan, munduko ekosistema berritzaileenetako batzuk ezagutzeko misioak egin dira enpresekin.

  Ekintza hau baloratu