Kontsulta osoa
Data
22.03.2016
Erreferentzia
Mugaz haraindiko langilea. Zerga-egoitza.
Galdera
Kontsultagileak zerga-egoitza Angelura (Frantzia) eraman zuen 2015. urtean.Mugaz haraindiko langilearen baldintza onartzea nahi du.
Ebazpena
Kontsulta-idazkian planteatutako gaiari dagokionez, lehenik eta behin, mugaz haraindiko langilearen baldintza izateko, errentaren eta ondarearen gaineko zergetan zergapetze bikoitza saihestu eta zerga ihesa nahiz iruzurra prebenitzeko Espainiako Erresuma eta Frantziako Errepublikaren arteko Hitzarmenak, Madrilen 1995eko urriaren 10ean sinatutakoak (Espainia-Frantzia Hitzarmena), xedatzen duenerako, zergadunak zerga egoitza zerbitzuak eskaintzen dituenarekiko (kasu honetan, itxuraz, Bizkaian) estatu desberdinean izan behar du.
Horregatik, kontsultagilearen zerga-egoera mugatzeko, Bizkaitik kanpo joaten den urtean (2015. urtean) eta ondorengoetan zerga-egoitza zehaztu behar da lehenengo, hain zuzen ere, egoitza horrek definituko baitu Bizkaian zergapetzea, bai Pertsona Fisikoen Errentaren gaineko Zergari, bai Ez Egoiliarren Errentaren gaineko Zergari buruz. Era berean, zerga-egoitza berak zehaztuko du zergadunari Espainia-Frantzia Hitzarmenean aurrez ikusitakoa aplikagarria al zaion eta, ondorioz, mugaz haraindiko langileei dagokienez, hitzarmenaren tratamendua izan al dezakeen.
Hala, kontu horri dagokionez, lehenik eta behin, ekitaldi horietan indarrean zegoen Pertsona Fisikoen Errentaren gaineko Zergari buruzko abenduaren 5eko 13/2013 Foru Arauaren (PFEZFA) 2. artikuluan ezarritakoa aplikatu behar da. Hona: "Foru arau honetan xedatutakoa Pertsona Fisikoen Errentaren gaineko Zergaren honako zergapeko hauei aplikatuko zaie: 1. Zergadunaren mailan: a) Hurrengo artikuluan xedatzen denaren arabera, beren ohiko egoitza Bizkaian duten pertsona fisikoei. (...)".
Horren ondoreetarako, PFEZFAren 3 artikuluan hauxe ezarri da: 1. Subjektu pasiboak ohiko egoitza Bizkaiko Lurralde Historikoan duela ulertuko da ondoko erregela hauek betetzen baditu: 1. Zergaldiko egun gehienak Euskal Autonomia Erkidegoan emanik, Bizkaian egindako egun kopurua Euskal Autonomia Erkidegoko beste bi lurralde historikoetako bakoitzean egindakoa baino handiagoa denean. Lurralde jakin batean zenbat denbora eman den zehazteko, konputagarriak izango dira kanpoan eman diren aldi baterako egonaldiak, salbu eta zergadunak frogatzen badu zerga-egoitza beste herrialde batean duela. Zerga-egoitza paradisu fiskaltzat hartzen diren herrialde edo lurraldeetako batean dagoenean, Zerga Administrazioak galdatu ahal izango du urte naturaleko 183 egun han eman direla frogatzeko. Bestelakorik frogatzen ez bada, pertsona fisiko bat Bizkaian bizi dela joko da pertsona horren ohiko egoitza lurralde honetan dagoenean. 2. Interesen gune nagusia Bizkaian duenean. Zergadun batek bere interesen gune nagusia Bizkaian duela ulertuko da, zerga-oinarriaren zatirik handiena Euskal Autonomia Erkidegoan lortzen duenean eta, gainera, Bizkaian lortutako zerga-oinarriaren zatia handiagoa denean beste lurralde historikoetako bakoitzean lortutakoa baino. Dena dela, ondorio bietarako, irizpide horretatik kanpo geratuko dira kapital higigarriaren errentak nahiz ondare-irabaziak eta egotzitako zerga-oinarriak. 3. Zerga honen ondorioetarako aitortutako azken egoitza Bizkaian dagoenean. Lehenengo erregela aplikatuta ere ezinezkoa gertatzen bada zergadunaren ohiko egoitza zein lurraldetan -komun edo foralean- dagoen zehaztea, bigarren erregela aplikatuko da. Lehen eta bigarren erregeletan xedatutakoa aplikatu ondoren, inguruabar bera gertatzen bada, hirugarren erregela aplikatuko da. 2. Espainiako lurraldean egoiliar diren pertsona fisikoek ez badute bertan ematen 183 egun baino gehiago urte naturalaren barruan, Euskal Autonomia Erkidegoko egoiliartzat hartuko dira, baldin eta beren enpresa- edo lanbide-jardueren edo interes ekonomikoen gune nagusia edo basea lurralde horretan kokatzen bada. Aurreko lerroaldean jasotakoaren arabera pertsona fisikoen ohiko egoitza Euskal Autonomia Erkidegoan dagoenean, pertsona horiek Bizkaian bizi direla joko da, baldin eta beren enpresa- edo lanbide-jardueren edo interes ekonomikoen gune nagusia edo basea lurralde horretan kokatzen bada. 3. Pertsona fisiko bat lurralde espainiarreko egoiliarra dela uste bada, legez banandu gabeko ezkontideak eta honen menpe dauden adingabeko seme-alabek ohiko bizilekua Bizkaian dutelako, pertsona fisiko horren ohiko bizilekua Bizkaian dagoela ulertuko da. Presuntzio horren aurka kontrako froga aurkez daiteke. (...)".
Bestalde, PFEZFAren 5. artikuluan hauxe ezarri da: "Foru arau honetan xedatutakoa gorabehera, Espainiako barru antolamendua osatzera etorri diren nazioarteko itunbe eta hitzarmenetan xedatutakoak indarrean jarraituko du". Puntu honi dagokionez, Espainiak Frantziarekin indarrean Hitzarmena sinatua du, nazioarteko zergapetze bikoitza saihestu eta zerga-iruzurra prebenitzeko.
Halaber, PFEZFAren 6. artikuluan hauxe ezarri da: "1. Zergadunak errenta bat lortzea hartzen da zerga-egitatetzat, errenta hori non sortu den eta ordaintzailearen egoitza non dagoen kontuan izan gabe. (...)".
Horrekin guztiarekin bat etorriz, Bizkaiko egoiliartzat hartuko da kontsulta egilea (eta, beraz, lurralde historiko honetako Pertsona Fisikoen Errentaren gaineko Zergari lotuta egongo da) baldin eta PFEZFAren 3. artikuluko 1.-3. idatz-zatietan ezarritako inguruabarretako baten bat gertatzen bazaio.
Hala, arau orokor gisa, bertan egotearen irizpide nagusiari erreparatuz, pertsona batek ohiko bizilekua Bizkaian duela eta, beraz, Pertsona Fisikoen Errentaren gaineko Zerga Bizkaian ordaindu behar duela ulertuko da baldin eta, zergaldiko egun gehienak Euskal Autonomia Erkidegoan egiten dituela, Bizkaian egun gehiago egiten baditu EAEko beste bi lurralde historikoetako bakoitzean baino. Aurrekoan xedatutarako, Bizkaian zenbat egun egin dituen zehazteko, aldi baterako absentziak ere zenbatu behar dira, salbu eta zergadunak frogatzen badu beste herrialde bateko egoiliarra dela zergen arloko ondorioetarako, eta herrialde hori zerga-paradisutzat jotzen ez bada. Era berean Bizkaiko egoiliartzat jotzen dira goian transkribatu den PFEZFAren 3. artikuluko 2. idatz-zatian ezarritako betekizuna (ekonomia edo lanbide jardueren edo interes ekonomikoen gune nagusi edo baseari dagokiona) betetzen dutenak edo artikulu bereko 3. idatz-zatian araututako presuntzioa betetzen dutenak.
Hortaz, egonaldiaren irizpide nagusiari dagokionez, Bizkaian emandako eguntzat hartzen dira lurraldetik kanpo aldi baterako egondako egunak ere, salbu eta zergadunak frogatzen duenean zerga-paradisutzat jotzen ez den beste lurralde batean duela zerga-egoitza.
Horregatik, abiapuntutzat hartuta kontsultagileak Bizkaian duela bizilekua, ez dio hemengo egoiliarra (eta Pertsona Fisikoen Errentaren gaineko Zergaren ziozko zergaduna) izateari utziko ez baditu baldintza hauek betetzen: urte naturalean 183 egun baino gehiago egitea Espainiako lurraldetik kanpo, zerga-egoitza paradisu fiskala ez den beste herrialde batean -kasu honetan, Frantzian- duela frogatzea bertako zerga-agintariek egindako ziurtagiriaren bidez, eta bere enpresa edo lanbide jardueren edo bere interes ekonomikoen gune nagusia edo basea atzerrian izatea. Hortaz, espainiar lurraldean 183 egunetik gora geratzen den ekitaldietan, edo zerga ondorioetarako beste herri bateko egoiliarra dela frogatzerik ez duenetan, bere munduko errentagatik lurralde historiko horretan jarraituko du zergapetuta (kasuan kasu, zergapetze bikoitzari buruzko hitzarmen aplikagarrietan xedatutakoa kaltetu gabe).
Kontsultagileak, ordea, ez du egoiliarraren baldintza izango (eta hemen ez da Pertsona Fisikoen Errentaren gaineko Zergaren mendekoa izango, Ez Egoiliarren Errentaren gaineko Zergaren araberakoa baizik) honakoak betetzen dituen ekitaldietan: a) Espainiako lurraldean urte naturalaren 183 egun baino gehiago ez ematea; b) zerga-egoitza beste herrialde batean egiaztatzea, zerga-paradisutzat jotzen ez bada eta, horretarako, bertako zerga-agintariek zerga-ondorioetarako egoitzari buruzko ziurtagiria egitea; eta c) FPEZFAk 3. artikuluko 2. puntuan finkatutako egoera ez ematea eta, ondorioz, bere enpresa edo lanbide jardueren ala interes ekonomikoen gune nagusia edo oinarria hemen ez izatea.
Azkenik, aurreko guztiaz gainera, zergadun bat Espainiako lurraldeko eta, horren barruan, Bizkaiko egoiliarra dela uste izan behar da, baldin eta beraren mendeko seme-alaba adingabeek eta legez banandu gabeko ezkontideak lurralde historiko horretan badute ohiko bizilekua.
Egoiliartzat edo ez-egoiliartzat urte natural bakoitzean hartuko da zergaduna, bakarra da ekitaldi bakoitzean eta bereiz zehazten da urtez urte. Beraz, baldintza hori, banan-banan, Bizkaitik kanpo egoitza aldatzen den ekitaldirako (planteatutako ustezkoan 2015erako) eman behar da, baita hurrengo urteetarako ere.
Kontsultagileak kontsulta 2015. urteko bigarren seihilekoan aurkeztu zuen eta bertan ez zuen zehaztu zer unetan aldatu zuen egoitza Frantziara. Hortaz, erantzuna egiteari begira, 2015. urteko 183 egun baino gehiago igarota gertatu zela uler daiteke.
Ildo horri eutsiz, kontsultagileak zerga-egoitza Bizkaian mantenduko du eta bertan bete beharko du Pertsona Fisikoen Errentaren gaineko Zergaren eskakizuna 2015. urtean zehar. Gainera, 2016. urtean ere Bizkaiko lurraldean egoiliarra izango da, gutxienez, urteko 183 egunak igaro arte. Epe hori igarotzen denean, kontsultagilea 2016. ekitaldi guztirako ez-egoiliar bihurtuko da (eta, beraz, Pertsona Fisikoen Errentaren gaineko Zergaren mende egotetik Ez Egoiliarren Errentaren gaineko Zergaren mende egotera pasako da), herrialde horretako zerga-agintariek egindako ziurtagiriaren bitartez zerga-egoitza Frantzian egiaztatzen duen heinean.
Zergaldi berdinean kontsultagilea (aurreko guztiarekin bat) Bizkaian eta, aldi berean, Frantzian zerga-egoiliarra bada, herrialde horretako barneko legeria aplikatuz (alderdi hori ezezaguna da), zergaldi bakoitzean gatazkan dauden bi administraziotatik bere eskumenak erabiliz egoiliar bezala nori dagokion zerga kargatzea zehaztu beharko da, munduko errenta izateagatik, nor sortu eta zein den ordaintzailearen egoitza alde batera utzita. Horretarako, Espainiaren eta Frantziaren arteko Hitzarmenaren 4. artikuluan aurrez ikusitako arauak aplikatu beharko dira eta hala diote: "2. 1. ataleko xedapenen babesean, pertsona fisiko bat bi estatu hitzarmengileetan egoiliarra denean, bere egoera honako moduan ebatziko da: a) Pertsona etxebizitza egonkorra eskura duen estatuko egoiliarra izango da; etxebizitza egonkorra eskura bi estatuetan badu, harreman pertsonal eta ekonomiko estuagoak (bizi interesen zentroa) mantentzen dituen estatuko egoiliarra izango da. b) Pertsonak bizi interesen zentroa zer estatutan duen ezin bada zehaztu edo estatuetan etxebizitza egonkorra eskura ez badu, ohiz bizi den estatu hitzarmengilean egoiliarra izango da. c) Ohiz bi estatuetan bizi bada edo ez badu hala egiten, nazionala den estatuko egoiliartzat joko da. d) Bi estatuetan nazionala izanez gero edo ez batean, ezta bestean ere, bi estatu hitzarmengileetako agintariek elkarren arteko adostasunez ebatziko dute kasua".
Espainiako eta Frantziako Hitzarmenak aurrez ikusten duenerako, kontsultagileak bakarrik mugaz haraindiko langilearen baldintza izango du, bere zerga-egoitza Frantzian duen heinean, aurreko irizpideekin bat (eta bakarrik Frantzian zerga-egoiliartzat jo daitezkeen ekitaldietarako).
Aurreko guztia argitu ostean, Espainiaren eta Frantziaren arteko Hitzarmenak 15.1. artikuluan aurrez ikusitakoari erreparatu behar zaio: "1. 16., 18., 19. eta 20. artikuluetan ezarritakoa gorabehera, Estatu hitzarmengile bateko egoiliar batek enplegu batengatik lortutako soldatak, lansariak eta antzeko ordainsariak bakarrik estatu hitzarmengile horretan zergapetu ahal izango dira, harik eta enplegua beste estatu hitzarmengilean burutzen ez bada. Lana hemen egiten badu, kontzeptu horrengatik jasotako ordainketak beste Estatu honen zergen menpe jar daitezke".
Frantzia-Espainia Hitzarmen horri erantsitako protokoloaren 12. idatz-zatian hau jasotzen da: "15. artikuluko 1. eta 2. idatz-zatietan ezarritakoa eragozpen izan gabe, Estatu kontratatzaileen artean bestelako xedapenik adosten ez den bitartean, indarrean egongo da Espainiak eta Frantziak errentaren gaineko eta ondarearen gaineko zergen arloan zergapetze bikoitza saihesteko 1973ko ekainaren 27an sinatutako Hitzarmeneko 4. atalean xedatutakoa. Honela dio testu horrek: "4. Estatu kontratugileen arteko erabaki partikularri jarraikiz sortutako mugako dokumentuaren bidez ezaugarri hori justifikatzen duten mugako langileak zergapetzearen pean daude kontzeptu horrengatik jasotzen dituzten soldata, lansari eta beste ordainsari batzuengatik, bizilekua daukaten estatu hitzarmengilean baino ez. Estatu kontratugileetako agintaritza eskudunek aurreko xedapenak aplikatzeko modua zehaztuko dute, beharrezkoa denean, eta halaber, beharrezkoa bada, xedapen horien helburuetarako mugako gutunaren izaera daukan egiaztagiria adostuko dute modu berezian".
1961eko urtarrilaren 25eko Akordio Osagarrian eta 1964ko uztailaren 3ko eta 1965eko maiatzaren 21eko eta ekainaren 1eko ohar trukeetan, mugaz haraindiko langileen definizioa aplikatu behar zitzaien Frantziako eta Espainiako udalerrien zerrenda itxia ezarri zen, "Mugaz haraindiko Zirkulazio Txartela" lortzeko aukerarekin lotuta. Hala ere, aldaketak izan dira araudiaren bilakaeran (1993ko urtarrilaren 1ean Europako merkatu bateratua indarrean jarri, eta langileen joan-etorri askea eta EBko herrialdeetan kokatzeko askatasuna ezarri ziren), baita ekonomian eta gizartean ere (komunikazio sareen, garraioaren eta abarrekoen hobekuntza). Hori dela eta, 1960ko hamarkadan ezarritako udalerri zerrenda dagoeneko ez da eraginkorra eta ez du zentzurik; ez da beharrezkoa Frantziako lurraldean bizi den eta Euskal Herrira lanera datorren ezein espainiarrentzat "Mugaz haraindiko Zirkulazio Txartela" lortzea gaur egun. Beraz, hitzez hitzeko aplikazioak edukirik gabe utziko luke manu hori.
Aurretik idatzi den Hitzarmenari erantsitako Protokoloaren 12. idatz-zatian ezarritakoa garatu ez denez, interpretazioaren aldetik zalantza egon daiteke "mugaz haraindiko langileak" adierazpenaren norainokoa zehazteko orduan, bertan xedatutakoaren ondorioetarako.
Gipuzkoako Lurralde Historikoan abenduaren 10eko 90/1996 Foru Dekretua aldarrikatu zen, Ogasun eta Finantza Sailean Mugaz Haraindiko Langileen Erregistroa sortu zuena (1996ko abenduaren 16ko GAO), eta hor "mugaz haraindiko langilea" kontzeptua beste modu batera definitzen da: eskatzen da, funtsean, Frantzian egoitza duen langilea izatea, Gipuzkoan lan egitea eta egunero eta aldian-aldian ohiko bizilekura itzultzea, erregistroan inskribatu ahal izateko eta indarreko hitzarmenari erantsitako protokoloaren 12. atalean araututako zerga tratamendua jasotzeko.
Gainera, errentaren gaineko zergen arloan zergapetze bikoitza saihestu eta ihes fiskalari aurrea hartzeko 1993ko urriaren 26an Espainiako Erresumak eta Portugaleko Errepublikak sinatu zuten Hitzarmena Berresteko Tresnak (1995eko azaroaren 7ko BOE) honako hau ezartzen du 15. artikuluko 4. zenbakian: "Hala ere, 1. eta 2. zenbakietan xedaturikoa gorabehera, mugaz haraindiko langile batek estatu kontratugile batean egindako lana dela-eta lorturiko ordainsariak direnean, hots, beste estatu kontratugilean ohiko etxebizitza duenaren eta beste estatu horretara egunero itzuli ohi denaren ordainsariak direnean, beste estatu horretan baino ezin dira zergapetu".
Adierazitakotik ondorioztatzen da Frantziaren eta Espainiaren artean sinatutako indarreko Hitzarmenari erantsitako Protokoloaren 12. idatz-zatia aplikatu beharreko denboraren interpretazio sistematikoak, teleologikoak eta errealitate soziala kontuan hartzen duenak eskatzen duela "mugaz haraindiko langiletzat" jotzea, zerga-ondorioetarako estatu batean bizi izanda, beste estatuko lurraldean zerbitzuak eskaintzen dituena eta egunero haren ohiko bizilekura itzultzen dena, lanaldia amaitutakoan. Hori guztia Bizkaiko Zergen Administrazioan eta ordaintzailearen aurrean egiaztatzeko, mugaz haraindiko langilearen aintzatespenari buruzko ziurtagiria aurkeztea exijitzen da, Frantziako zergen agintaritzak eta etekinen ordaintzaileak berak zigilatuta (azken agiri hori ez da aurkeztu). Zerga tratamendu hori jaso ahal izateko, jakina, zerga ondorioetarako Frantzian bizi izatea ere frogatu behar da.
Beraz, kontsultagileak bete egiten baditu aurreko lerroaldeetan aipaturiko baldintzak, lan egiten duen erakundeak mugaz haraindiko langiletzat hartu behar du nahitaez, eta ez dio Ez-egoiliarren Errentaren gaineko Zergaren konturako diru kopururik atxiki behar, hark jasotako ordainsariak kasu honetan ez daudelako zergaren kargapean Bizkaian. Halaber, ez dio inolako atxikipenik egingo Pertsona Fisikoen Errentaren gaineko Zergaren kontura, ez baita izango Zerga horren zergaduna. Hori guztia, hurrengo baldintzak betetzen dituen neurrian: a) zerga ondorioetarako Frantzian bizitzea eta lurralde historiko honetan lan egitea, eta egunero ohiko bizilekura itzultzea lanaldia amaitutakoan; b) lan harremana izatea erakunde ordaintzailearekin, eta harreman horren etekinak Hitzarmenaren artikulu hauen barruan sartzeko aukerarik ez izatea: 16. artikulua (kontseilariak), 17.a (artistak eta kirolariak), 18.a (pentsioak), 19.a (ordainsari publikoak) edo 20.a (irakasleak eta ikertzaileak); eta c) mugaz haraindiko langile izatea aitortu zaiola frogatzea, Frantziako agintariek beren-beregi emandako agiriaren bidez (agiri hori ez da aurkeztu).
Zerga-egoitza Frantzian edukitzearen baldintzari dagokionez, jada goian argitu den bezala, kontuan hartu behar da egoiliar bat, atzerrira joatearen ondorioz, Espainiako lurraldean ez-egoiliartzat jo ahal izateko, urte naturaleko, gutxienez 183 egun eman behar dituela Espainiako lurraldetik kanpo, eta frogatu egin behar duela beste herrialde batean (kasu honetan, Frantzian) duela zerga-egoitza, herrialde horretako zerga-agintariek beren beregi emandako ziurtagiriaren bidez. Horregatik, planteatutako ustezkoan, kontsultagileak bere egoitza Frantziara 2015. urtean eraman badu Bizkaian ekitaldiko 183 urte baino gehiago eman ondoren, 2015. ekitaldian hemengo egoiliarra izaten jarraituko du eta Pertsona Fisikoen Errentaren gaineko Zergaren eta bere atxikipen sistemaren araberakoa izango da, Espainiako lurraldetik kanpo, gutxienez, urte naturalaren 183 egun ez baita egon.
Arrazoi beragatik, egoiliar-izaera ere ez du galduko harik eta hurrengo urte naturaleko 183 egun, gutxienez, igaro arte (2016ko uztailaren 2ra arte) eta zerga-egoitza Frantzian duela frogatzeko herrialde horretako agintariek beren beregi emandako ziurtagiria aurkeztu arte. Hori dela eta, Ez Egoiliarren Errentaren gaineko Zergari buruzko abenduaren 5eko 12/2013 Foru Arauaren (EEEZFA) 32. artikuluan erregela berezi bat dago hasiera batean egoiliarrak diren baina, atzerrira joatekoak direnez, ekitaldi batean zehar ez-egoiliar bihurtuko diren zergadunentzat. Ildo horri jarraiki, arauak honakoa xedatzen du: "Zerga honengatik ordaintzen ez dutenak izanik atzerrira joango direlako halako bihurtuko diren besteren konturako langileek, Zerga Administrazioari jakinarazi ahal izango diote, espainiar lurraldetik irtengo direneko data agerraraziz, lan etekinen ordaintzaileak Zerga honen mendeko gisa har ditzan ondore hutsetarako. Arauz ezar dadin prozeduraren ildotik, Zerga Administrazioak eskatzen duten eta espainiar lurraldeko egoile diren edo ezarpen iraunkorra duten tokietako besteren konturako langileei frogagiri bat luzatuko die, beren lan etekinen ordaintzaileari jakinaraziko diotena, non atxikipenak eta konturako ordainketak Zerga horrengatik noiztik aurrera egingo zaizkien agerraraziko den. Arestian esandako horrek ez du langilea Zerga Administrazioaren aurrean bere zerga egoitza berria kreditatzeaz libratuko".
Manu hori Bizkaiko Foru Aldundiaren apirilaren 15eko 48/2014 Foru Dekretuaren bidez onetsitako Ez-egoiliarren Errentaren gaineko Zergari buruzko Araudiaren (EEEZA) 21. artikuluan garatu da. Hauxe ezarri da bertan: "1: Inoren konturako langileek, zerga honen kargapean sartzekoak izanez gero, enplegatzaileak atzerrira aldatuko dituelako, inguruabar horren berri eman ahalko diote Zerga Administrazioari. 2. Berriemate horretan ondoko datuak jasoko dira: langilea eta lanaren etekinak ordaintzen dituena identifikatzeko datuak, langilea atzerrirantz irtengo den eguna, atzerrian lanean hasiko den eguna, eta atzerrira aldatzen den urtean bertan edo hurrengoan, lanaren ondorioz, 183 egun baino gehiago egin beharko dituela uste izateko datu objektiboak, lan harremanetan halako daturik badago. 3. Zerga Administrazioak, berriematea eta berarekin aurkeztutako agiriak aztertu ondoren, zerga honen ziozko atxikipenak zein egunetan hasiko zaizkio egiten adierazten duen frogagiria bidaliko dio langileari, bidezkoa bada, eta bidali ere berriematea aurkeztu eta hamar astegun igaro baino lehen. 4. Langileak lanaren etekinen ordaintzaileari Zerga Administrazioak emandako agiriaren ale bat emango dio, atxikipenak aplikatzean Ez Egoiliarren Errentaren gaineko Zergaren zergaduntzat har dezan bertan adierazitako egunetik aurrera. Frogagiri horiek ondoreak izango dituzte, Ez-egoiliarren Errentaren gaineko Zergaren araberako atxikipenak egiteari dagokionez, egutegiko bi urtetan gehienez ere, hau da, langilea atzerrira doan urtean eta hurrengoan, edo bestela, atzerrira doan urtea konputatzerik ez badago, hurrengo bi urteetan. 5. Prozedura hori bera erabili ahal izango da baldin eta, Bizkaian eskuratutako errentak kalkulatzen direnean, Zergari buruzko Foru Arauaren 13. artikuluan dauden arauak aplikatuta kalkulatu ere, lurralde horretan atxikipenak egitea bidezkoa ez dela ikusten bada. Horrelakoetan langile hauek kontuan hartuko dira Zergari buruzko Foru Arauaren 31. artikuluko 5. idatz-zatian ezarritako betebeharrei dagokienez. 6. Goian azaldutako prozeduraren bitartez frogagiria eskuratuta ere, langileak bere zerga egoitza berria non dagoen frogatu beharko dio Zerga Administrazioari".
Atzerrira joatearen ondorioz zergaduna ez-egoiliar bihurtzekoa den kasuetan, prozedura horren bidez ordaintzaileak atxikipena egin ahal izango dio zergadunari hasieratik, Ez Egoiliarren Errentaren gaineko Zergari buruzko araudian xedatutakoari jarraituz, Espainiako lurraldetik kanpo urte naturaleko 183 egun baino gehiago egin arte (eta zerga-egoitza berria frogatu arte) itxaron gabe. Bestela, atxikipenik ez egiteko aukera du, Zerga hori kargatzeko salbuetsiak dauden errenten kasuan. Prozedura horrek ez dio zergadunari kentzen bere egoitza berria Zerga Administrazioaren aurrean frogatzeko betebeharra.
Kontuan hartu behar da, ordea, enplegatzaileak atzerrira bidaliko dituelako (kanpoan zerbitzuak egitera) ez-egoiliar bihurtzekoak diren langileek bakarrik aplika dezaketela prozedura hori. Planteatutako ustezkoan baldintza hori ez da betetzen. Atzerrira ez da joaten lan-arrazoiak direla-eta (datuetatik ondorioztatzen da kontsultagileak zerbitzuak orain arte garatu dituen toki berean eskainiko dituela).
Horregatik guztiarengatik, kontsultagilearen lan-erakundeak mugaz haraindiko langiletzat jo beharko du eta Ez Egoiliarren Errentaren gaineko Zergaren kontura ez dio zenbatekorik atxikiko. Bakarrik hala egingo du Espainiako lurraldetik kanpo, gutxienez, urte naturalaren 183 egun daramatzala egiaztatzen duenean (baldintza hori ezingo du 2016ko uztailaren 2a baino lehenago bete) eta honakoak aurkezten dituenean: 1) zerga egoitza Frantzian duela dioen ziurtagiria; eta 2) mugaz haraindiko langilea izatea aitortzen dion ziurtagiria, Frantziako zerga agintaritzak zigilatuta. Hori guztia, noski, betiere, horiez gain, mugaz haraindiko langilearen tratamenduaz gozatzeko bestelako baldintzak (arestian garatutakoak) betetzen baditu. Ordura arte, Bizkaian eskaintzen dituen zerbitzuen ondorioz kontsultagileak lortutako errentek Pertsona Fisikoen Errentaren gaineko Zergaren kontura atxikipenak izango dituzte. Azkenik, kontsultagileak eskatu ahal izango du mugaz haraindiko langile izateko baldintzak betetzen eta frogatzen dituen ekitaldietan (kasu honetan, 2016. urtean) erakunde ordaintzaileak egiten dizkion atxikipenak itzultzeko, PFEZAren 20. artikuluan xedatutakoaren arabera: "4. Kontura sartutako kopuruak edo jasandako atxikipenak handiagoak badira zergapetze bikoitza saihesteko hitzarmen bat aplikatzetik datozenak baino, hitzarmena aplikatzeko eskatu ahal izango da, bai eta haren ondorioz egin beharreko itzulketa egiteko ere, lau urteko epean, sarrera egin den egunetik edo aitorpena egin eta atxikipena ordaintzeko epearen amaieratik zenbaturik. Elkarrekikotasunik eza dagoenean, Ogasun eta Finantzen foru diputatuak beste epe bat ezarri ahal izango du".
Halakoetan, hau da, ekitaldi berean egoitza aldatzen denean, Pertsona Fisikoen Errentaren gaineko Zergaren kontura hasieran jasanarazitako atxikipenak Ez Egoiliarren Errentaren gaineko Zergaren kontuko atxikipenak izatera pasako dira, EEEZFAk 46. artikuluan aurrez ikusitakoarekin bat: "Subjektu bat egoitza aldatzeagatik bihurtzen bada zergadun, Pertsona Fisikoen Errentaren gaineko Zergaren kontura egindako ordainketak zerga horren kontura egindako atxikipentzat edo sarreratzat hartuko dira, urte hasieratik Zerga Administrazioaren aurrean egoitza aldatu dela egiaztatzen den arte egindakoak, hain zuzen, baldin eta kontura egindako ordainketa horiek zergadunak jasotako eta zerga honen mendeko errentei badagozkie".
Araua
Abenduaren 5eko 13/2013 Foru Arauaren 2., 3., 5. eta 6. artikuluak.Abenduaren 5eko 12/2013 Foru Arauaren 32. eta 46. artikuluak.Espainiako Erresumak eta Frantziako Errepublikak Madrilen 1995eko urriaren 10ean izenpeturiko Hitzarmenaren 15 artikulua (BOE, 1967ko ekainaren 12koa).Hitzarmen horri erantsitako Protokoloaren 12. atala.Bizkaiko Foru Aldundiaren apirilaren 15eko 48/2014 Foru Dekretuaren 20. eta 21. artikuluak.