Zuzendaritzaren Jarraibidea Identifikazio zenbakia: 900001866
Berrinbertsioaren ziozko salbuespena. Etxebizitza eskualdatzeko eta eskuratzeko eguna
Etxebizitza eskualdatzeko eguna zehazteko, berrinbertsioa egiteko epea mugatzeko erreferentzia-puntua markatzen duena, etxebizitza horren gaineko jabetza osoa besterentzeko unea hartu beharko da aintzat (une hori eta hori eskuratzailearen ondarean gehitzen den unea bera izango da).
Horretarako, doktrinako eta Auzitegi Goreneko gehiengoaren iritziz, gure antolamendu juridikoak tituluaren teoria eta modua jasotzen du, eta, horren arabera, saldutakoaren jabetza edo jabaria ez dira eskualdatzen erosleari ematen ez zaion bitartean.
Ondorioz, zergadunari berrinbertsioa egiteko emandako epea konputatzeko unea eta ohiko etxebizitzaren gaineko jabetza osoa eskualdatzen duen eguna bat etorriko dira.
Beste alde batetik, ohiko etxebizitza, oro har, eskuratu dela ulertuko da higiezin osoaren edo zati baten jabetza osoa lortzen den unean; beraz, aurretik laburtutako tituluaren teoria eta moduari jarraiki, higiezina eroslearen esku eta jabetzan dagoenean.
Hori, normalean, erosketa-eskritura publikoa formalizatzeko unean gertatuko da, aurretik higiezinaren salerosketaren (titulua) eta entregatzearen edo tradizioaren (modua) kontratua dagoelako konkurrentzia egiaztatu ezean, horretarako dagoen moduren batean (giltzak ematea, etab.).
Hori guztia, Jarraibide honen hurrengo puntuan xedatutakoari eta puntu horretan ezarritako antzeko kasuetan ondorioztatu beharrekoari kalterik egin gabe (eraikitzen ari den etxebizitza eskuratzea).
2026ko urtarrilaren 1etik aurrera erositako etxebizitzak.
2026ko urtarrilaren 1etik aurrera erositako etxebizitzei dagokienez, Zergari buruzko Foru Arauaren 49. artikulua berridatzi da, Bizkaiko Lurralde Historikoko zerga-sistemaren zerga-berrikuspenerako neurriak onartzen dituen apirilaren 9ko 2/2025 Foru Arauaren 3. artikuluaren hirugarren paragrafoaren bidez, azken xedapenetako hirugarrenaren arabera, eta honako hau arautu da: "1. Zergadunaren ohiko etxebizitza eskualdatzeagatik lortutako ondare-irabaziak kargatik kanpo utzi ahal izango dira, betiere etxebizitza-aldaketa justifikatzen duen inguruabarren bat gertatzen bada eta eskualdatzean lortutako zenbatekoa ohiko etxebizitza berri bat erosteko berrinbertitzen bada, erregelamendu bidez zehaztutako baldintzetan. Etxebizitza-aldaketa justifikatzen duten zirkunstantziatzat hartuko dira: eskualdatutako etxebizitza zergadunaren edo bizikideen familia-premietara ez egokitzea; lan-lekualdaketa edo lehen enplegua edo enplegu berria lortzea; ezkontza egitea edo izatezko bikotea eratzea, bai eta ezkontza-banantzea edo izatezko bikotea azkentzea ere; etxebizitzaren ordainketa ordaintzea eragozten duten inguruabar ekonomikoak edo antzeko beste inguruabar batzuk. Erregelamendu bidez, aurreko lerrokadan aipatutakoez bestelako inguruabarrak ezarri ahal izango dira. "
Horrenbestez, 2026ko urtarrilaren 1etik aurrera eskuratutako etxebizitzek berrinbertsioagatik aplikatzen den salbuespena edukiko badute, ezinbestekoa izango da etxebizitza-aldaketa justifikatzen duen zerbait gertatzea, kontuan edukita legerian edo araudietan ezartzen diren arrazoiak.
Horregatik, etxebizitza 2026ko urtarrilaren 1a baino lehen edo ondoren eskuratu den zehazteko, aurrean aipatutako tituluaren eta moduaren teoria aplikatu behar da.
Berrikuspen Fiskalerako Foru Arauaren azken xedapenetako hirugarrenaren aplikazioa.
Aurreko paragrafoan arautzen denaren arabera etxebizitza 2026ko urtarrilaren 1a baino lehen eskuratu dela zehaztu ondoren zergadunak egiaztatu behar du bere ohiko etxebizitza izan dela 2026ko urtarrilaren 1ean, ohiko etxebizitzaz Zergaren Araudiaren 67. artikuluan ezartzen dena kontuan edukita.
Hain zuzen ere, zergaduna etxebizitzan bizi behar da modu iraunkorrean hamabi hilabetez, eskuratu denetik zenbatuta, edo obrak amaitu direnetik (eskuratu arren 2026ko urtarrilaren 1ean okupatu gabe egon diren etxebizitzak), eta gero bertan bizi behar da 3 urtez (arautegian salbuespenak ezartzen dira). Jakina, Zergaren Foru Arauaren 49. artikuluaren testu berriaren murrizketa saihesteko, ezinbestekoa da etxebizitza ohiko etxebizitza izatea, bai 2026ko urtarrilaren 1s baino lehen, bai egun horren ostean, eta kontuan eduki behar da Zergaren Araudiaren 67. artikuluaren 4. apartatuan arautzen dena: Zergaren Foru Arauaren 49. artikuluko salbuespena aplikatzeko, zergadunak bere ohiko etxebizitza eskualdatu duela pentsatuko da eraikina une horretan beraren ohiko etxebizitza denean edo, bestela, eskualdatu aurreko bi urteetan ohikoa izateari utzi dionean .
Loturak
8.18 Ogasun Zuzendaritza Nagusiaren jarraibideak