www.bizkaia.eus/guregida

Zuzendaritzaren Jarraibidea Identifikazio zenbakia: 900007772

Aplikatu beharreko kenkariak eta tasak zehaztea. Bizkaiko zergadunek kenkariak aplikatu ahal izango dituzte Estatuko irabazteko asmorik gabeko erakundeei egitekotan?

Abenduaren 5eko 13/2013 Foru Arauko 91. artikuluan hauxe ezartzen da: Zergadunek irabazteko asmorik gabeko entitateen zerga araubidea eta mezenasgorako zerga pizgarriak arautzen dituen Foru Arauan zerga honetarako ezarritako kenkariak aplika ditzakete. Artikulu horretan aipatzen den kenkariaren oinarria gehienez zerga horren zerga-oinarriaren %35ekoa izan daiteke, eta halakotzat hartuko da Foru Arau honen 65. eta 66. artikuluetan aurreikusitako zerga-oinarri orokorrak eta aurrezkiaren oinarriak batuz ateratzen den zenbatekoa.

Martxoaren 20ko 4/2019 Foru Arauaren 19. artikuluak mezenasgoaren erakunde onuradunak zehazten ditu, eta adierazten du kenkaria egiteko eskubidea emango dutela martxoaren 20ko 4/2019 Foru Araua aplikatu behar zaien irabazi-asmorik gabeko erakundeei egiten zaizkien dohaintzek, baita martxoaren 20ko 4/2019 Foru Arau horren 4. eta 5. artikuluetan ezarritako baldintzak betetzen dituzten baina beste lurralde batzuetako araudiaren mende dauden entitateen alde egiten diren dohaintzek ere. Zehazki, honako legedietako baten mende daudenek:

• Bizkaian: 4/2019 Foru Araua, martxoaren 20koa, irabazteko asmorik gabeko entitateen eta mezenasgorako zerga-pizgarrien zerga-araubideari buruzkoa.
• Araban: 16/2004 Foru Araua, uztailaren 12koa, irabazteko asmorik gabeko entitateen eta mezenasgorako zerga-pizgarrien zerga-araubideari buruzkoa.
• Gipuzkoan: 3/2004 Foru Araua, apirilaren 7koa, irabazteko asmorik gabeko entitateen eta mezenasgorako zerga-pizgarrien zerga-araubideari buruzkoa.
• Nafarroan: 10/1996 Foru Legea, uztailaren 2koa, fundazioen eta babes-jardueren zerga-araubidea ezarri duena.
• Lurralde erkidean: 49/2002 Legea, abenduaren 23koa, irabazteko asmorik gabeko entitateen eta mezenasgorako zerga-pizgarrien zerga-araubideari buruzkoa.

Era berean, kenkariak aplikatu ahal izango zaizkie martxoaren 20ko 4/2019 Foru Arauaren II. tituluan ezarritako baldintzak betetzen dituzten eta, bereziki, Foru Arau horren 27. artikuluan (entitate ez-egoiliar jakin batzuen alde egindako ekarpenak justifikatzeari buruzkoa) xedatutakoa betetzen duten dohaintzek, baldin eta honako hauen alde egiten badira:

1. Martxoaren 20ko 4/2019 Foru Arauaren 4. artikuluaren c) letran aipatzen diren entitateak, arau horren 5. artikuluan ezarritako baldintzak betetzen badituzte. Azken batean, entitate horiek egoitza Europar Batasuneko edo Europako Esparru Ekonomikoko estatu kide batean izan behar dute, eta Espainiak estatu kide horrekin zerga- informazioaren truke eraginkorra izan behar du, Bizkaiko Lurralde Historikoko Zergei buruzko Foru Arau Orokorraren hogeita laugarren xedapen gehigarriaren 3. apartatuan ezarritako baldintzetan; horrez gain, entitateek Espainian dagoen establezimendu iraunkor baten bitartekaritzarik gabe jardun behar dute eta martxoaren 20ko 4/2019 Foru Arauaren 4. artikuluko a) letran aurreikusitako forma juridikoetako baten antzeko forma izan behar dute. Egoitza paradisu fiskaltzat kalifikatutako herrialde edo lurralde batean duten entitateak ez dira halakotzat hartuko, salbu eta haien eraketa eta jarduera baliozko arrazoi ekonomikoengatik izan direla egiaztatzen bada.
2. Europar Batasuneko edo Europako Esparru Ekonomikoko beste estatu kide batzuetan ezarrita dauden eta irabazi asmorik gabeko jarduera sozialak edo asistentzialak egiten dituzten entitateak, baldin eta martxoaren 20ko 4/2019 Foru Arauaren 19.1 artikuluaren b) eta i) letretan jasotako helburuak badituzte.

Bizkaiko Foru Aldundiaren maiatzaren 21eko 55/2019 Foru Dekretua Irabazteko asmorik gabeko erakundeen zerga-araubidea eta mezenasgorako zerga-pizgarriak aplikatzeko Araudia onesten du. Horren 8. artikuluan ezartzen da araubide berezia aplikatzeko eskubidea Ogasuneko zuzendari nagusiak onartu behar duela eta horrek eskaera aurkezten zergaldian bertan sortuko dituela ondorioak. Horregatik, entitate batek araubide berezia aplikatzeko eskatu badu 2023ko abenduaren 31 baino lehen eta horretarako eskubidea onartzen bazaio, 2023ko zergaldi osoan aplikatuko zaio araubide berezia. Horrek berekin dakar, halaber, 4/2019 Foru Arauaren III. tituluko zerga-pizgarriak aplikatzea zergaldi osoan, hau da, 2023ko urtarrilaren 1etik 2023ko abenduaren 31ra arte.

Beraz, entitateak 2023ko urtarrilaren 1etik aurrera aplikatzen badu araubide berezia, 4/2019 Foru Arauaren 20. artikuluko emariek eta gainerako ekarpenek, egun horretatik aurrera egindakoek, arau horretan ezartzen diren zerga-pizgarriak aplikatzeko eskubidea emango dute.

Horretarako, entitateak berariaz emandako epealdiaren barruan (2024ko urtarrila, 2023ko ekitaldiari buruz) 182 eredua aurkeztu beharko du (emariei, dohaintzei, zerbitzuen doako prestazioei, ekarpenei eta xedapenei buruzko aitorpen informatiboa), eta, horrez gainera, honako baldintza hau ere egongo da: araubidea onartu behar zaio, horretarako ebazpena eman ez bada.

Aplikatu beharreko kenkari-motak

Bizkaian indarrean dauden kenkari-tasak aplikatuko dira.

Itzuli