Albisteak

Bizkaimovek zerbitzuak areagotzen jarraitzen du, baita erabiltzaileei webgunearen eta Android eta IOS aplikazioen bidez eskaintzen dien informazioa hobetzen ere. Imanol Pradales Azpiegituretarako eta Lurralde Garapenerako diputatuak trafikoaren egoerari buruzko informazio atariaren azken eguneratzea aurkeztu du gaur. Atari horren hobekuntzek Bizkaiko errepide gehiagori buruzko informazioa ematea dute helburu. Trafikoari buruzko informazioa duten eremuak % 35 areagotu dira, eta ibilbide-denboren berri ematea ahalbidetzen duen funtzionalitate berri bat ezarri da.

Bizkaiko Foru Aldundiak 62 baliza jarri ditu foru-errepideetako kokapen estrategikoetan, eta horien bidez kalkulatzen dira ibilbide-denborak, hau da, erabiltzaileen ibilgailuetako Bluetooth gailuak detektatzen dituzte, modu anonimoan. Hala, Bizkaimoven txertatuko den informazio berria ibilbide-denbora horietan oinarritzen da.

Dagoeneko instalatuta dauden Bluetooth gailuen hedapen horri esker, informazioa denbora errealean emateko eremua zabalduko da, eta zerbitzuak bide-zati gehiago jasoko ditu: A-8 autobidea, Kantabriako mugaraino; BI-631, Mungiaraino; AP-68, Arrigorriagaraino; N-240, Zeanuriraino, eta N-634, Irubidetik Mirafloreseraino.

Modu horretan, Bluetooth gailu horietako bat abiapuntu eta helmuga izan dezaketen ibilbideen bidaia-denbora ezagut dezakegu. Helburua erabiltzaileei Bizkaiko errepideen egoerari buruzko informazio gero eta zabalagoa eta zehatzagoa eskaintzea da. Eta hori posible da berrikuntza planari eta Azpiegituretarako eta Lurralde Garapenerako sailak errepideak eta horien kudeaketa modernizatzeko egin dituen inbertsioei esker, Imanol Pradalesen esanetan.

Gainera, sistema berri horri esker, mapan ohiko bidaia-denborak gora egin duenaren alertak agertzen dira, ikono espezifiko berri baten bidez: "Auto-ilarak". Erloju forma du ikonoak, eta bi punturen artean zenbat minutu igo den adierazten du. Alerta horiek bistaratze-menutik aukera daitezke, ikono hori bera agertuko baita une horretan dauden auto-ilaren kopuruarekin.

Bertsio berri horrekin, web-orrian, Bluetooth gailu horiekin sentsorizatutako ibilbideen bidaia-denborak kontsultatu ahal izango dira "Nire ibilbideak" ataletik. Horretarako, mapan irudikatuko diren jatorriko eta helmugako Bluetooth gailuen kokapenak hautatu behar dira.

Aplikazio berrian, "Nire ibilbideak" atalean, erabiltzaileak ibilbideak sortzen jarraituko du, jatorria eta helmuga adierazita, eta jakinarazpenak zer ordutan eta egunetan jaso nahi dituen zehaztuko du. Gainera, sentsorizatutako bide-zati berriekin lotu ahal izango du ibilbidea, eta, web-orrian bezala, jatorriko eta helmugako gailuak aukeratu ahal izango ditu; horrela, bidaia-denborak gora egin duenaren alertak jaso ahal izango ditu, eta bere ibilbidearen iraupena ezagutu ahal izango du, kontsultaren unean eguneratua, eta obren eta gorabeheren jakinarazpenak jasotzen jarraituko du.

Bizkaimoveri buruz

Bizkaimoveren trafiko-mapa Google Maps-en barruan dago, eta horri esker, xehetasun handiagoko informazio lor daiteke trafikoaren egoerari dagokionez, bai eta obrak eta gorabeherak kokatzeko orduan ere. Horrela, Bizkaimovek hainbat zerbitzu erabilgarri eskaintzen ditu erabiltzaileentzat:

• Lurraldeko ibilbide nagusien egoera jasotzen duen mapa, denbora errealean eguneratua.
• Bizkaian egiten ari diren obrak eta trafikoan izan daitezkeen gorabeherak.
• Dauden auto-ilarak eta ohiko bidaia-denborak gora egitea.
• Neguan, mendateren baten egoeraren berri ematen da.
• Bilboko sarbide nagusien eta gure errepideetako beste puntu garrantzitsu batzuen egoerari buruzko informazioa.
• Bide nagusietan trafikoak duen egoera erakusten duten kamerak.
• Erabiltzaileak sareko puntu sentsorizatuen artean definitutako ibilbideetarako bidaia-denboren kontsulta.
• Mapako gune bat gogoratzeko aukera, erabiltzaileak aurrez zehaztutakoa edo gogokoen duena bistaratzea, adibidez.