Jarraian, Bizkaiko Foru Aldundiak gai horiek argitzeko eta bestelako kontsultak egiteko eskaintzen dituen tresnak aurkeztuko dizkizugu.

Hirigintza-plangintzaren arloan, lurzorua osatzen duten elementu bakoitzak sailkapen bat eta kalifikazio bat izaten ditu. Bien arteko alde nagusia da sailkapena lurzoru motari dagokiola (hiri-lurzorua, urbanizagarria, urbanizaezina) eta kalifikazioa, berriz, lurraren erabilerari eta aukerei (bizitegitarako, jarduera ekonomikoak eta abar).

Lurzorua sailkatzeko motak:

• Hiri-lurzorua: hirigintzaren aldetik eraldaketaren bat izan du eta biztanleguneetako hiri-bilbean txertatuta egoten da.
• Urbanizagarria: hiri-bilbean txertatu gabe egon arren, etorkizuneko hirigintza-erabileretarako egokitzat jotzen den lurzorua.
• Urbanizaezina: hirigintzaren aldetik eraldatzeko egokia ez den edo eraldaketarik ez dagokion lursaila, dela babestuta dagoelako, dela arriskuren bat dakarrelako, dela landatar izaerari eutsi behar zaiolako.
• Geldiarazitako lurzoruak: Plan Orokorraren edo Arau Subsidiarioen behin betiko onespena geldiarazita duten eremuak dira.

Lurzoruaren kalifikazio orokor motak:

• Bizitegitarako lurzorua: hiri-lurzoruetan edo urbanizagarrietan sartzen diren lursailak, erabilera nagusia etxebizitzak izanik.
• Jarduera ekonomikoak: hiri-lurzoruetan edo urbanizagarrietan sartzen diren lursailak, erabilera nagusia jarduera ekonomikoak izanik, hala nola hirugarren sektoreko edo industriako erabilerak.
• Kategoria urbanizaezina: landatar erabilerak dituzten lurzoruak, hirigintzaren aldetik eraldaketarik behar ez dutenak.
• Sistema orokorrak: azpiegiturak edo ekipamenduak jartzeko erabiltzen diren lurzoruak, edozein motatakoak izanik.

Erabilera orokor horiek zehazte aldera, esate baterako, etxebizitza-dentsitateak zehazten dira, jarduera ekonomikoen barruan zer erabilera dituzten edo zer sistema orokor mota dauden.

Gainera, aurreikusitako garapen-eremuak biltzen dituen geruza bat dago; hau da, plangintzaren arabera lurzorua eraldatzea edo azalera eraikia handitzea aurreikusita dauden tokiak.

Funtzionatzeko modua

Bizkaian, Foru Aldundiak foru-lurralde osoko lurralde-antolamenduaren eta hirigintza-plangintzaren kontsulta egiteko geobisore osatu eta intuitibo bat eskaintzen die herritarrei.

Bisoreak hiri-plangintzari buruzko datuak ematen ditu, hala nola lurzoruaren sailkapena eta kalifikazioa, udalerriaren mugak edo foru-errepideen sarea, eta elementu kartografikoak uztartzeko aukera ere ematen du, hala nola hidrografia, erliebea, lurreko estalkia edo eraikinak. Horri guztiari Katastroko datuen geruza gehitzen zaio; noiznahi kontsulta daiteke geruza hori.

Erabiltzaileek erraz-erraz egin ditzakete honako hauek: distantzien eta areen neurketak, goraguneen profila, kotak lortzea, koordinatuak eraldatzea edo mapa 3Dn edo Street View erabilita ikustea.