Tributu itunduak direla eta, 6.820,1 milioi euro bildu dira uztailera arte, hau da, 2025ean epe berean bildurikoa baino 204,1 milioi euro gehiago; beraz,%3,1 egin du gora zerga-bilketak. Zerga-bilketaren datu hori 2026ko ekitaldi osoko zergen bidezko diru-sarreren aurrekontuaren %62,6 da.

Zuzeneko zergapetzeak bilakaera positiboari eutsi dio, %6,2 gehiago bildu baita; zeharkako zergapetzeak, berriz, iaz lortutako zifren antzekoetan mantendu da: %0,2 egin du behera. Tasen eta beste diru-sarreren bilketak %14,7 egin du gora, eta Estatuarekin egin beharreko doikuntzek, berriz, behera egin dute, % 3,3.

Zuzeneko zergen bilketak aurreko hilabeteetako joera onari eutsi dio, eta, zerga horien bidez, 3.784,1 milioi euro bildu dira: esan dugun moduan, iazko uztailean baino %6,2 gehiago (+221,6 milioi). Datuak PFEZaren kanpainaren emaitza positiboa islatzen du, haren kuota diferentzialak %16,1 egin baitu gora. Emaitza positiboa izan du, halaber, ondarearen gaineko zergak, %20,6 egin baitu gora. Sozietateen gaineko zergan ordaintzekoak izan diren autolikidazioek ere bilakaera positiboa izan dute (+%9,5). Atxikipenei dagokienez, datu positiboak dituzte oraindik ere lanaren gainekoek (+%4,7), kapital higiezinaren gainekoek (+%2,4) eta, batez ere, ondare-irabazien gainekoek (+%66,2). Lanbide- eta enpresa-jardueren ordainketa zatikatuek ere gora egin dute (+%6,2). Alde negatiboan, behera egin dute kapital higigarriaren gaineko atxikipenek (–%5,1), eta bere horretan mantendu da sarien gaineko geldialdia: 6,8 milioi lortu dira, eta aurreko ekitaldian, berriz, 42,6 milioi bildu ziren. Zifra horiek kontuan hartuta, PFEZak, orokorrean, %5,2 egin du gora, eta sozietateen gaineko zergak, %10,9.

Aurrekoaz gain, zuzeneko zergen bilketan izandako datu positiboak osatzen dituzte ez-egoiliarren errentaren gaineko zergak (+%3,9), kreditu-entitateen gordailuen gaineko zergak (+%4,6) eta berreskuratu den zenbait finantza-entitateren interes eta komisioen marjinaren gaineko zerga berriak (+%33,3). Behera egin du, berriz, oinordetza eta dohaintzen gaineko zergak, %11,7, baita energia elektrikoaren ekoizpenaren gaineko zergak ere (–%20,1), Ekialde Hurbileko krisiei aurre egiteko hartutako neurrien eraginda.

Zeharkako zergei dagokienez, uztailera arte 2.416,0 milioi euro bildu dira (2025ean baino 4,6 milioi gutxiago), lurralde arteko barne-doikuntzari lotuta dauden zergetan % 0,3 gutxiago bildu delako; zeharkako gainerako zergak, berriz, %1,6 egin dute gora. Lehenengoen artean, krisiei aurre egiteko neurriei lotutako zergen beherakada nabarmentzen da: hidrokarburoen gaineko zerga (–%7,4) eta elektrizitatearen gaineko zerga (-%23,9). Behera egin du garagardoaren gaineko zergak ere (–% 3,1). Bestalde, zifra positiboak izan dituzte dituzte BEZak (+%1,2), alkoholaren gaineko zergak (+% 2,0), tabakoaren gainekoak (+%2,7) eta finantza-transakzioen gaineko zergak (%31,3).

Zeharkako zergen gainerako kontzeptuei dagokienez, bilakaera positiboa izan dute zenbait garraiobideren gaineko zergak (%12,6), aseguru-primen gainekoak (+%5,0), joko-jardueren gainekoak (+%20,8) eta zenbait zerbitzu digitalen gainekoak (%12,2). Behera egin dute ondare eskualdaketen gaineko zergak (–%2,2) eta hondakinak zabortegietan uztearen gaineko zergak (–%8,2).

Tasetan eta beste diru-sarrera batzuetan, 49,5 milioi euro bildu dira, hau da, 2025eko aldi berean baino 6,3 milioi gehiago. Jokoaren gaineko tasetan bildutakoak apur bat behera egin du (–% 0,6), baina gainerako kontzeptuetan izandako bilakaera positiboak (+%14,7) konpentsatu du. Bilakaera hori premiamendu-errekarguek izan duten gorakada handiak (+%84,9) ekarri du.

Goian adierazi den bezala, Estatuarekin egin beharreko doikuntzek %3,3 egin dute behera orokorrean. Zerga bereziei eragiten dietenen beherakadaren ondorioz (–%19,3), batez ere hidrokarburoen gaineko zergari eragiten dionaren ondorioz (–%13,1), 2025ean baino 20,7 milioi gutxiago bildu baitira, eta tabakoaren gaineko zergari eragiten dionaren ondorioz, 2025eko 2,4 milioi euroko zifra positiboetatik 1,7 milioi euroko zenbateko negatibora pasatu baita. BEZaren gaineko doikuntzak %0,5 egin du gora, barne-eragiketei dagokienari esker (+%6,6); inportazio-eragiketei dagokien doikuntza, berriz, negatiboa izan da, –%2,7 .