Tributu itunduak direla eta, 8.039,5 milioi euro bildu dira irailera arte, hau da, 2025ean epe berean bildurikoa baino 163,2 milioi euro gehiago; beraz, % 2,1 egin du gora zerga-bilketak. Datu hori 2026ko ekitaldirako aurrekontuan jasotako tributu-sarrera guztien % 73,8 da (10.891,0 milioi euro).

Zuzeneko zergetan, aurreko hilabeteetako portaera onari eutsi zaio, % 6,7 hazi baita; zeharkako zergetan, berriz, % 3,3ko jaitsiera izan da. Bestalde, tasak eta beste diru-sarrera batzuk % 20,4 hazi dira.

Zuzeneko zergapetzearen ondoriozko bilketa 4.391,1 milioi eurora iritsi da, hau da, 276,7 milioi euro gehiago iazko aldi beraren aldean; hau da, % 6,7ko igoera izan du. Atxikipenei dagokienez, datu positiboak dituzte oraindik ere lanaren gainekoek (+% 5,4), kapital higiezinaren gainekoek (+% 3,1) eta, batez ere, ondare-irabazien gainekoek (+% 64,0). Alde negatiboan, hauek daude oraindik ere: batetik, kapital higigarriaren gaineko atxikipenak –berriro jaitsi dira, kasu honetan % 5,4–, eta, bestetik, sarienak, 6,8 milioi izan baitira –aurreko ekitaldian 42,6 milioi bildu ziren–. Zifra horiek izanik, PFEZa, oro har, % 5,8 hazi da (+173,3 milioi euro); sozietateena, berriz, % 11,2 (+79,3 milioi).

Aurrekoaz gain, zuzeneko zergapetzean izandako datu positiboak osatzen dituzte ez-egoiliarren errentaren gaineko zergak (+% 0,8), kreditu-entitateen gordailuen gaineko zergak (+% 4,8) eta interes eta komisioen marjinaren gaineko zergak (+% 57,1). Bitartean, behera egiten jarraitzen dute oinordetza eta dohaintzen gaineko zergak (–% 5,1) eta energia elektrikoaren ekoizpenaren gaineko zergak (–% 39,1), Ekialde Ertaineko krisiari aurre egiteko hartutako neurriek eraginda.

Zeharkako zergapetzeari dagokionez, irailera arte 3.023,2 milioi euro bildu dira, 2025eko denboraldi berean baino 103,4 milioi gutxiago; hau da, zerga-bilketan % 3,3ko jaitsiera izan da. Horrela, bere horretan dirau krisiaren aurkako neurrien eraginpean dauden zergen beherakadak: BEZa (–% 3,5), hidrokarburoen gaineko zerga (–% 16,6) eta elektrizitatearen gaineko zerga (–% 16,1).

Irailean, ondare-eskualdaketen gaineko zergak (–% 2,8) eta berotegi-efektuko gas fluordunen gaineko zergak (–% 0,9) ere behera egin dute.

Honako hauek, berriz, zifra positiboak dituzte: alkoholaren gaineko zergak (+% 0,9), garagardoaren gaineko zergak (+% 23,2), tabakoaren gaineko zergak (+% 1,8), finantza-transakzioen gaineko zergak (+% 21,2), zenbait garraiobideren gaineko zergak (+% 11,8), aseguru-primen gaineko zergak (+% 4,5) edo joko-jardueren gaineko zergak (+% 20,9).

Tasak eta beste diru-sarrera batzuk 54,6 milioi euro dira, hau da, 2025eko denboraldi berean baino 9,2 milioi euro gehiago. Joko-tasak % 0,5 jaitsi dira, baina premiamendu-errekarguen (+% 45,5) eta berandutze-interesen (+% 46,6) bilakaera positiboak konpentsatzen du hori.

Kudeaketa propioari, Estatuarekin eginiko doikuntzak gehitu behar zaizkio: BEZa (713,7 milioi), zerga bereziak (–143,4 milioi) eta berotegi-efektuko gas fluordunak (0,2 milioi).

Horrela, tributu itunduen guztizkoak % 2,1eko hazkundea metatu du aurreko ekitaldiaren aldean, eta horrek esan nahi du 163,2 milioi euroko hazkundea izan dela.