Lointek-ek gaur goizean aurkeztu du energia biltegiratzeko epe luzeko proiektu estrategiko berria Highview enpresa britainiarrarentzat. Highview munduko liderra da energia biltegiratzeko eta malgutasunerako soluzioetan. Ekitaldia Lointek-ek Urdulizen duen egoitzan izan da.
Bizkaiko enpresa arduratu da sistema termikoak diseinatu, fabrikatu eta hornitzeaz, aire likidoaren bidez energia metatzeko instalazio berritzaile baterako, Erresuma Batuko mota horretako instalaziorik handiena.
Bizkaiko Ahaldun Nagusiak, Elixabete Etxanobek, eta Ekonomia Sustapeneko foru diputatuak, Ainara Basurkok, Bizkaiko instalazioetan egindako bisita instituzional batean ezagutu dituzte Highview proiekturako ekipamenduak. 

Elixabete Etxanobe Bizkaiko ahaldun nagusiak nabarmendu duenez, “energia sektore estrategikoa da Bizkaiaren orainerako eta etorkizunerako”. “Horrelako proiektuek erakusten dute industria berritzailea, espezializatua eta erronka global handiei irtenbide teknologiko aurreratuak emateko gai dena dugula”. “Lointek nazioarteko merkatuan tokikotik, ezagutzatik, ingeniaritzatik eta lurraldera sustraitzetik nola lehiatu daitekeen erakusten duen adibide bat da”. “Eta gure enpresek jauzi hori ematen jarraitu ahal izan dezaten, Bizkaiko Foru Aldundian berrikuntzarako, nazioartekotzeko eta hazkunderako duten gaitasuna laguntzen, babesten eta bultzatzen jarraituko dugu”.

“Lointek-entzat , bereziki adierazgarria da horrelako proiektu batean parte hartzea, bai alde teknologikoagatik, bai etorkizunean energia-metaketak eta energia berriztagarrien integrazioak izango duen eraginagatik”, adierazi dute Serafín eta Javier Loroño enpresako zuzendari nagusiek.

Iraupen luzeko energia-metaketa
LAES (Liquid Air Energy Storage) teknologiari esker, energia berriztagarria denbora luzez metatu daiteke airea hoztuz, sareko energia berriztagarri soberakina erabiliz, tenperatura oso baxuetan likido bihurtu arte.
Ondoren, aire likidoa gas-egoerara itzultzen da, eta energia sortzeko hedatzen da, energia-sistemak hala eskatzen duenean elektrizitatea sortzen duen turbina bati eraginez. Hala, energia berriztagarrietan oinarritutako sare elektrikoen malgutasuna, egonkortasuna eta segurtasuna bermatzeko funtsezko irtenbide bihurtzen da. “Gatz urtuen” bidezko metaketan oinarritzen da sistema.

LAES teknologia aitzindaria da, gaitasun industrial sendoak eta muturreko hozte-sistemetan eta aire likidoaren biltegiratzean esperientzia duten mundu osoko konpainia gutxik garatua. Testuinguru horretan, Lointek energia-sektorerako ekipo konplexuen fabrikazioan esperientzia espezializatua duten erakunde bakanetako bat da.

50 urte baino gehiagoko balio-bizitza
Highview-ren instalazioak 300 MWh-ko biltegiratze ahalmena eta 50 MW-eko potentzia izango ditu, sei ordu arteko tarteetan energia hornitzea ahalbidetuz eta Erresuma Batuko sare elektrikoaren egonkortasuna indartuz. 2027an hasiko dira lanean, eta azpiegiturak 50 urtetik gorako balio-bizitza izango du.

Proiektu honetan, Lointek-ek garatutako sistema termikoek funtsezko zeregina dute energia-eraginkortasuna optimizatzeko eta instalazioaren fidagarritasun operatiboa bermatzeko. Konpainiak diseinatu eta fabrikatutako ekipoak datozen asteetan entregatuko dira.
“Highview-ko proiektuak ingeniaritza-irtenbide oso espezializatuak eta gaitasun industrial aurreratuak behar izan ditu, eta Lointek-ek eskarmentu handia du alor horietan nazioartean”

Jabeek azpimarratu dutenez, “trantsizio energetikoak energia berriztagarria sortzea ez ezik, energia hori modu eraginkorrean biltzeko eta kudeatzeko gai diren teknologiak garatzea ere eskatzen du. Horrelako proiektuetan parte hartzeak energia-sistema malguagoa, erresilienteagoa eta jasangarriagoa eraikitzen aktiboki laguntzeko aukera ematen digu”
Energia-iturri berriztagarriak integratzeko eta Erresuma Batuko sistema elektrikoaren egonkortasuna indartzeko funtsezko energia-azpiegitura batean txertatuko dira sistema horiek.