Elixabete Etxanobe Bizkaiko Ahaldun Nagusiak zenbait topaketa egingo ditu hurrengo hiletan Bizkaiko herritarrekin. Ekimen hori herritarrek parte hartzeko Foru Aldundiaren estrategiaren barruan dago, eta, horrenbestez, politika publikoak definitzeko herritarrek egindako ekarpenak bideratu nahi dituzten beste ekimen batzuen osagarria da.

Ahaldun Nagusiarekiko topaketa horiek Bizkaiko eskualdeetan egingo dira, bertan sortzen den elkarrizketari esker Foru Aldundia hurbildu dadin parte-hartzaileen eguneroko errealitatera eta, hortaz, lurraldeko errealitate desberdinetara.

Asmoa da topaketa bakoitzean 25-30 pertsonak parte hartzea, kopuru hori nahikoa baita eskualde bakoitzeko egoera soziodemografikoaren lagin adierazgarri bat eratzeko. Horretarako, besteak beste, aldagai hauek hartuko dira erreferentziatzat: generoa, adina, lan-egoera edo ikasketa-maila.

Bi alderdien arteko elkarrizketa zintzoa eta eraikitzailea izan dadin, topaketak pribatuak izango dira. Metodologia zortzi-hamar laguneko taldeak osatzean datza. Talde horiek, moderatzaile batek dinamizaturik, Elixabete Etxanoberekin eztabaidatu eta partekatu ahal izango dituzte beren gogoetak, proposamenak edo kezkak.

«Herritarrekiko topaketen» egutegia

Lehenengo topaketa Bilboko Foru Jauregian egingo da, datorren maiatzaren 28an, eta, ondoren, topaketa bana egingo da Lurralde Historikoko hamabi eskualdeetan. Asmoa da 2025. urtea amaitu aurretik guztira sei ekitaldi egitea.

Eskualdeko hitzordu bakoitza amaitutakoan, txosten bat argitaratuko da Bizkaiko Foru Aldundiaren webgunean, hitzaldi horietan lortutako ondorio nagusiak jasotzeko.

Lehenengoak Bizkaiko errealitatean sakontzea izango du helburu; hori dela eta, bertan elkartzen diren pertsonek lurraldeko gizartearen isla izango den lagin soziodemografiko bat osatu beharko dute.

Topaketa horietan parte hartu nahi dutenek Aldundiaren webgunean eman dezakete izena (www.bizkaia.eus), horretarako jarritako inprimakia betez.