Bizkaiko Foru Aldundiak "Azterlana-diagnostikoa. Bizkaiak Ekonomia Urdinaren eremuan duen posizionamendua” azterlana aurkeztu du. Azterlanak jasotzen du makrosektore honek 966 milioi euroko Balio Erantsi Gordina adierazten duela (Bizkaiko BEGd osoaren % 2,5), eta lanaldi osoko baliokidetzan  17.400 pertsonari ematen diela lana (enplegu osoaren % 3,3). Zifra hauek Estatukoak eta Europakoak baino pisu erlatibo handiagoa erakusten dute, eta agerian uzten dute itsasoari lotutako jarduerek Bizkaiko eredu ekonomikoan duten garrantzi estrategikoa.

Cristina Múgicak, Bizkaiko Foru Aldundiko Lurralde Lehiakortasuneko eta Kanpo Sustapenerako zuzendariak, txostena aurkeztu die gaur Bizkaia Orekan Sakonduz sarean sartuta dauden kostaldeko eskualde-garapeneko agentzietako —Lea Artibai Fundazioa, Bermeoko Behargintza eta Getxolan—  arduradunei eta teknikariei, baita Beaz enpresa lehiakortasunerako foru agentziaren ordezkariei ere. Topaketaren helburua parte hartzen duten erakundeen arteko lankidetza-konpromisorantz aurrera egitea izan da, Bizkaian ekonomia urdineko hub bat artikulatu eta bultzatzeko.

Azterlanak Bizkaiko 209 enpresa identifikatzen ditu, % 100eko jarduera ekonomia urdinarekin lotuta dutenak. Horietatik 28 enpresa bultzatzailetzat jotzen dira, inbertitzeko, nazioartekotzeko eta I+Grako gaitasun handia dutelako. Enpresa-sare hau azpiegitura estrategikoetan oinarritzen da, hala nola Bilboko, Bermeoko eta Ondarroako portuetan, itsaso zabaleko saiakuntza-plataformetan, zentro teknologikoetan eta unibertsitateetan, sektoreko klusterretan eta eskualdeko garapen-agentzietan. Balio erantsi handiko proiektuak garatzea eta enplegu kualifikatuak sortzea ahalbidetzen duen ekosistema osoa.

Kostaldeko turismoa nagusi den beste lurralde batzuetan ez bezala, Bizkaian sektorearen % 11 baino  ez da; horrek esan nahi du sektorearen oinarri nagusiak itsas-garraioa (% 44), portuetako jarduerak (% 18), itsas-baliabide biziak (% 10), itsasoko energia berriztagarriak (% 11) eta ontzigintza eta konponketak (% 8) direla. Egitura honek lurraldearen izaera industriala, logistikoa eta teknologikoa indartzen du, eta ETEen eta zerbitzu aurreratuen gaineko trakzio-ahalmena duten balio-kateak finkatzen ditu.

40 milioi euro I+G+b urdinean

Bizkaiko Ekonomia Urdina itsasoari lotutako jarduera ekonomikoa da eta bere osagairik garrantzitsuenak berrikuntza, digitalizazioa, trantsizio energetikoa, ingeniaritza, eta sektore estrategikoei aplikatutako material aurreratuak eta garapen teknologikoa dira. 2021etik 2023ra 40 milioi euro mobilizatu ziren I+Gn Ekonomia Urdina garatzeko, bereziki itsas-energia berriztagarrietan, portu-azpiegitura adimendunetan, material eta prozesu aurreratuetan eta adimen artifizialean eta industria-digitalizazioan. Itsasoko energia berriztagarriak inbertsio-ahaleginaren % 43 kontzentratzen du, eta zati esanguratsu horrek energia-trantsizioko eta industria-deskarbonizazioko nodo garrantzitsu gisa finkatzen du Bizkaia.

Dinamismo honek enpresen lehiakortasuna indartzen du, modernizazio teknologikoa bizkortzen du eta lurraldea Europan eta nazioartean hazteko ahalmen handia duten esparruetan posizionatzen du.

Lurralde-eragina: espezializazioa eta kohesioa

Bizkaiak 150 kilometroko kostaldea du, eskualde-aniztasun handikoa, Ekonomia Urdinaren barruan profil desberdinak eragiten dituena. Hala, Busturialdea-Urdaibai eta Lea-Artibai itsas-baliabide bizietan espezializatzeagatik eta lotutako balio-kateagatik nabarmentzen dira, erreferentziazko enpresekin, zentro teknologikoekin eta hazteko gaitasunarekin. Ezkerraldea-Meatzaldeak eta Eskuinaldeak profil dibertsifikatuagoa dute, energiari, itsas-mugikortasunari, nautikari eta portu-azpiegiturei lotuta. Beste eskualde batzuek azpiegiturei, enpresa-espazioei eta gaitasun teknologikoei lotuta dauden garapen-aukerak dituzte.

Txostenak agerian uzten du Ekonomia Urdina tresna bat dela itsasertzeko eskualdeetan aukerak sortzeko, eskualde horien ekoizpen-oinarria indartzeko eta lurralde orekatu eta kohesionatu baterantz aurrera egiteko.

Talentua eta inbertsioa erakartzea

Bizkaian Ekonomia Urdina talentu tekniko eta industriala garatu eta leialtzeko, trantsizio energetiko eta teknologikoari lotutako inbertsioa erakartzeko, enpresa-proiektu berritzaileak bultzatzeko eta lurraldearen nazioarteko posizionamendua sendotzeko aukera-eremu gisa eratzen da.

Subiranotasun energetikoak, deskarbonizazioak eta modernizazio industrialak lehentasuna duten Europako testuinguruan, Bizkaiak aktibo bereizgarriak ditu berrikuntza urdinean erreferente gisa finkatzeko.

Azterketa ekonomikoaz haratago, itsasertzeko industriarentzat eta zerbitzu aurreratuentzat trakzio-gaitasuna duten aukera-esparruak identifikatzen ditu azterlanak, lankidetza publiko-pribatua eta eskualdeen artekoa sustatuz. Ekonomia urdina sendotzen ari da eta palanka estrategikoa da Bizkaiko lurralde-lehiakortasuna indartzeko, gure industria-ehuna bultzatzeko, kalitatezko enplegua sortzeko eta eredu ekonomiko jasangarriago, berritzaileago eta orekatuago baterantz aurrera egiteko.

librado.