Laespada: "Funtsezkoa da aztertzea nola gizarteak modu desorekatuan moldatu duen historian zehar emakume eta gizon sortzaileen aintzatespena"

Bizkaiko Foru Aldundiak «Jeinuak?» zikloaren beste edizio bat eskaintzen du urrian, euren bikotekideen gerizpean kokaturiko emakumeen garrantzia aldarrikatzeko. Oraingoan, Concha Méndez eta Teresa León idazleengan jarriko dute hitzaldiek arreta.

Emakumeen eta gizonen berdintasuna sustatzeko Emakumeak estrategiaren esparruan, Concha Méndezek eta Teresa Leónek Luis Buñuel eta Rafael Albertirekin izaniko harreman afektiboek bi emakumeon aintzatespen literarioan nola eragin zuten aztertuko dute bi hitzaldik. Oraingo honetan, bi emakume horien eta 27ko Belaunaldiko zein XX. mendeko abangoardietako beste emakumeen oroimena, ekarpen literarioa eta ikusgarritasuna izango dituzte ardatz bi saioek.

Lehenengo hitzordua urriaren 13an izango da, asteartean, 18:00etan. Mercedes Gómez Blesa Filosofiako doktore eta saiakeragileak «Concha Méndez y Luis Buñuel» hitzaldia emango du. Saioan, sakon aztertuko da modernitatean giltzarri izan ziren bi pertsona ospetsuk Madrilen hogeiko hamarkadan izan zuten harreman bizia; horretarako, azalduko da nola baldintzatu zuten bakoitzaren ibilbide profesionala gizarte-konbentzioek, garaiko aurreiritziek eta askatasunaren kontzepzio desorekatuak.

María Zambrano Fundazioko patroi Gómez Blesak, zeina aditua baita Zilarrezko Aroko emakume intelektualetan, aztertuko du nola aldi hartan bizitza eta zinema adierazpen artistikorako promes berri gisa azaleratu ziren.

Bestalde, urriaren 20an, asteartean, 18:00etan, Laura Freixas idazle eta saiakeragileak «María Teresa León y Rafael Alberti» hitzaldia eskainiko du. Hitzaldiaren abiapuntua biak 1977an erbestetik itzuli zirenekoa izango da; une hartan, erakundeek eta iritzi publikoak aintzatespena eman zioten poetari, eta, hala, León bigarren mailan geratu zen.

Freixasek, haien lan autobiografikoen azterketa konparatiboa eginez (Memorias de la melancolía, Leónena, eta La Arboleda perdida, Albertirena), xehe-xehe azalduko du zer desberdintasun sotil eta sakon izaten diren gizarteak emakume sortzaileak eta gizon sortzaileak espazio publikoarekin duten harremanari, sexualitateari eta erreferenteei dagokienez moldatzen dituen eraren inguruan.

Ahaldun nagusiorde eta Enplegua, Gizarte Kohesioa eta Berdintasuna Sustatzeko foru-diputatu Teresa Laespadaren esanetan: «Funtsezkoa da aztertzea nola gizarteak modu desorekatuan moldatu duen historian zehar emakume eta gizon sortzaileen aintzatespena. Autobiografia eta ibilbide horiek berrikusteak aukera ematen digu kultura-arrakalen jatorria ulertzeko, eta Concha Méndez, María Teresa León eta halako egileei berezko eskubidez dagokien lekua emateko».

Bi hitzaldiak Bizkaiko Foru Aldundiak Emakumeak estrategiaren bidez (www.emakumeak.eus) bultzatzen dituen sentsibilizazio-jardueretako batzuk dira. Estrategia instituzional hori lurraldean emakumeen eta gizonen benetako berdintasunaren inguruko gogoeta kritikoa eta haren sustapena bultzatzeko sortu da; horretarako ohiko diskurtso historiko eta kulturalak zalantzan jartzen dituzten prestakuntza-ekimenak, erakusketak eta eztabaidaguneak eskaintzen ditu.