Laespada: "Bilatu gabeko bakardadearen aurkako urratsak ematen ari gara, giza eta gizarte-sare indartsuagoak lortzeko"

Bizkaiko Foru Aldundiak BizkaiSarearen aurrerapen baten berri eman du gaur: bilatu gabeko bakardadearen prebentziorako eredu aitzindaria bultzatzen duen gizarte-kohesiorako foru-estrategia. Teresa Laespadak, Enplegua, Gizarte Kohesioa eta Berdintasuna Sustatzeko foru diputatua eta ahaldun nagusiordea denak, estrategiaren mugarriak aurkeztu ditu, Leioa, Ermua eta Zallako alkateekin batera. Izan ere, udalerri horiek beren lehenengo tokiko planak garatzen ari dira "BizkaiSare herriz herri" programaren barruan.

Aurkezpenean, Laespadak honako hau adierazi du: Bizkaia aurrera egiten ari da bilatu gabeko bakardadearen aurkako politiketan, ekintzetan eta programetan. Eta legealdi honen hasieratik, bilatu gabeko bakardadearen aurkako urratsak ematen ari garela gaineratu du, komunitatean oinarritutako gero eta giza eta gizarte-sare indartsuagoak lortzeko.

Diputatuak nabarmendu du estrategiak fenomeno hori abordatzeko moduarekiko aldaketa dakarrela, hain zuzen ere, isolamendua goiz antzemateari lehentasuna ematen diola: "ez dugu nahi inor isolatuta edo komunitatetik kanpo geratzea. Pertsonen ongizatea nahi dugu, hori da BizkaiSare".

18 proiektu aurkeztu dituzte 15 erakundek

Enplegua, Gizarte Kohesioa eta Berdintasuna Sustatzeko Sailak 1.100.000 euro bideratu ditu tokiko eta eskualdeko proiektuetara, gizarte-loturak eta hurbiltasuneko zainketak indartzeko. Dekretua apirilaren 10ean onartu zuen Gobernu Kontseiluak eta lurraldeko gizarte-sarearen parte-hartze handia izan du.

Balorazio teknikoa egin eta gero, 15 gizarte-erakundek bultzatutako 18 proiektu finantzatuko dira eta bakardadea prebenitzeko eta kohesio komunitarioa indartzeko jarduerak egingo dira. Egindako kalkuluen arabera, ekimen horiek 10.000 lagun baino gehiagorengan izango dute eragin zuzena Bizkaian.

Proiektuek lehentasuna ematen diete adineko emakumeei, laguntza-sarerik gabeko gazteei, migratzaileei, indarkeria matxistaren biktimei edo desgaitasuna duten pertsonei.

Leioan hasi da jada

Estrategia lurraldean hedatzeko fasean sartu da Agintzari eta Home Care Lab (SSI) enpresekin egindako hitzarmen baten bidez.

Inplikatutako lehen udalerriak Leioa, Ermua eta Zalla dira, eta horiei beste udalerri eta Amankomunazgo bat gehituko zaizkie. Leioan, gizarte-isolamenduaren diagnostikoa eta detekzio goiztiarra egiteko tresnaren lehen aplikazioa egin da eta hainbat udal-arlok eta komunitateko eragilek hartu dute parte.

Laespadaren hitzetan: "udal eta eskualde mailan tresnak sortu nahi ditugu bilatu gabeko bakardadearen aurka borrokatzeko eta komunitate-garapen hobea lortzeko". BizkaiSareak aurreikusten du 2026an Bizkaiak metodologia erreplikagarria eta lehen udal-plan osoak izango dituela.

BizkaiSare web berria

Laespadak www.bizkaisare.eus webgunearen berri ere eman du. Horretan, proiektu finantzatuak, dokumentazioa, tresnak eta tokiko planen egoera kontsultatu ahal izango dute herritarrek.

Diputatuaren hitzetan, "estrategia garatu ahala sortzen dugun informazio eta berritasun guztiak aurkitu ahal izango dituzte herritar guztiek webgune berri honetan".

Bihar, BizkaiSare jardunaldia Euskalduna Jauregian

Gainera, Bizkaiak udal ordezkariak, gizarte erakundeak eta profesionalak bilduko ditu bihar Euskalduna Jauregian egingo den "Komunitatea eta Bakardadea. Udal eta komunitate mailako estrategiak" jardunaldian.

Topaketan, Elisa Sala Mozos ikerlariak hartuko du parte, eta Bilatu Gabeko Bakardadearen Estatuko Behatokiak (ONCE Fundazioa) bakardadearen aurkako politika publikoen dekalogoa aurkeztuko du. Emaus Gizarte Fundazioa, Mujeres con Voz, ADEMBI eta Inbiku elkarteen esperientziak ere partekatuko dira.

170 pertsona baino gehiago inskribatu dira eta jardunaldia zuzenean emango da Aldundiaren YouTubeko kanalaren bidez.

Gizarte-kohesioari buruzko monografikoen bilduma berria

Estrategiak transferentziara eta udal-praktikara bideratutako argitalpenen bilduma jasotzen du. Lehenengo bi azterlanak Matía Fundazioaren "Ante el enigma de la soledad" eta SiiS Fundazioaren "Fortalecimiento de enlaces comunitarios" dira.