Bizkaiko Foru Aldundiak lurralde historikoko udalentzako dirulaguntzen lehen deialdi bat onartu du, foru-errepideen sarearekin konektatzen diren udal-sarbideetako bide-segurtasuna hobetzeko proiektuak idazteko.

Laguntza-lerro berri hori Azpiegituretarako eta Lurralde Garapenerako Sailak kudeatzen du, eta 200.000 euroko zuzkidura du. Laguntza-lerro horren helburua da udalerriei erraztasunak ematea aukera izan dezaten teknikoki diseinatzeko beren sarbideen segurtasuna, funtzionaltasuna eta integrazioa hobetzeko jarduerak.

Sarbideen hobekuntzarako eraikuntza-proiektuak idazteko kostuak estaliko dituzte laguntzek, eta diruz lagundu daitekeen gehieneko zenbatekoa 40.000 eurokoa izango da proposamen bakoitzeko, 95/2025 Foru Dekretuaren bidez onartutako oinarri arautzaileetan ezarritakoaren arabera.

Programak aukera emango du funtsezko gaietan aurrera egiteko, hala nola bidegurutzeetako ikuspena eta maniobrak hobetzeko, sarbideak berrantolatzeko, bira arriskutsuak ezabatzeko, drainatze-gabeziak zuzentzeko edo ingurune sentikorretan irisgarritasuna hobetzeko.

Deialdia joan den asteartean Bizkaiko Aldizkari Ofizialean argitaratu ondoren, udalek 20 egun baliodun izango dituzte euren eskabideak Azpiegituretarako eta Lurralde Garapenerako Sailaren Bulego Birtualaren bidez aurkezteko.

Udalerri bakoitzak eskabide bakarra aurkeztu ahal izango du, gehienez hiru proiektu-proposamenekin, eta horiek banaka baloratuko dira, lehia-konkurrentziaren araubidearen arabera.

Ekimen horrekin, Bizkaiko Foru Aldundiak udalekiko lankidetza indartzen du, horrela mugikortasun seguruagoa, funtzionalagoa eta tokian tokiko ingurune bakoitzaren beharretara egokituagoa sustatzeko, eta, aldi berean, sendotu egiten du bide-sarearen etengabeko hobekuntzarekiko eta foru-sarearen eta tokiko sarearen arteko konexio-puntuetako segurtasunarekiko duen konpromisoa.