Bizkaiko Foru Ogasunak Zerga Iruzurraren aurka Borrokatzeko 2026rako Plana onartu du, hiru jarduera-ildo nagusiren inguruan egituratzen dena: zergadunentzako informazioa eta laguntza indartzea, Batuz sistemaren behin betiko ezarpena amaitzea eta informazio-iturri berriak garatzea. Gidalerro hauek lurraldean zerga iruzurra prebenitzera, hautematera eta erregularizatzera bideratuta daude.

Zergadunentzako informazioa eta laguntza indartzea

Lehenengo jarduketa-ildo honen helburua zergadunek euren gain hartzen dituzten administrazio-kargak murrizten jarraitzea da, zerga-betebeharrak borondatez betetzea erraztuz eta ez-betetze egoerak prebenituz. Horretarako arreta kanal presentzial, telefoniko eta telematikoen bidez indartzen jarraituko da.

Era berean, zerbitzuaren kalitatea hobetzeko eta erantzuteko denborak murrizteko, informazioaren teknologia berrien eta adimen artifizialeko tresnen erabilera bultzatuko da. Ildo beretik, egoitza elektronikoaren funtzionaltasunak eta edukiak zabalduko dira, aholkularitza fiskaleko profesionalen beharretara egokituz.

Ekonomia Itunaren zazpigarren xedapen gehigarrian xedatutakoa betetzeko prozesua amaituko da eta foru-zergadunek inportazioei dagokien BEZaren sarrera geroratzeko aukera izango dute; horrela, foru-zergadunek sistema horren finantza-abantailak eskuratu ahal izango dituzte, lurralde erkidekoen baldintza berberetan.

Foru Ogasunaren eta eragileen arteko kooperazio-harremana sendotzeko Foro Bateratuak lantzen jarraituko da lankidetzarako eta zergen arloko betebeharrak hobeto betetzeko gune gisa.

Batuz sistemaren behin betiko ezarpena amaitzea

2026an zehar Batuz sistema behin betiko ezartzeko prozesua amaituko da, irabazi-asmorik gabeko erakundeak, lehen sektoreko pertsona fisikoak eta juridikoak eta irakaskuntza- edo arte-jarduerak egiten dituztenak sartuta.

Gainera proiektuaren hasierako irismena osatuko da Sozietateen gaineko Zergaren autolikidazioen zirriborroak eskatzeko eta lortzeko prozedura abian jarriz, horretarako garatutako web aplikazio berri baten bidez.

Eragiketa Ekonomikoen Erregistro Liburutik (EEEL) ateratzen den informazioa anomalia fiskalak detektatzeko balio handiko iturri gisa finkatuko da.

2026an zehar TicketBAIren betetze-mailari buruzko informazio-komunikazioak mantenduko dira proforma fakturak edo preticketak jaulkitzen diren kasuetan, behin betiko faktura ez egitearen ondorioez ohartaraziz. Jarduketa hauek osatzeko informazioa lortzeko aurrez aurreko jarduerak egingo dira, eta softwarea garatzen duten enpresa bermatzaileek baldintzak betetzen dituztela egiaztatuko da.

Halaber neurri arauemaile eta informatiko berriak hartuko dira irabazi-asmorik gabeko erakundeen kasuan sistema betetzea malgutzeko.

Informazio-iturri berriak

Foru Ogasunak informazio iturri berriak sartuko ditu inkongruentzia fiskalen detekzioa hobetzeko. Besteak beste, txanpon birtualetako saldoei buruzko informazio-betebeharrak, banku-transakzioen kontrola indartzea eta txartel edo gailu mugikorren bidezko kobrantza-sistemen bidez enpresaburuei eta profesionalei egindako ordainketei buruzko informazioa.

Era berean, urtero mota guztietako txartelekin egindako eragiketei buruzko informazioa emateko betebeharra ezartzen da, karguen eta abonuen urteko zenbatekoa 25.000 eurotik gorakoa denean.

Planaren egitura

Plana berrantolatu eta sinplifikatu egin da, zerga-egiaztapenaren eta -kontrolaren operatibarekin lerrokatzeko. Hiru multzotan egituratzen da: prebentzio-jarduketak; informazioa lortzeko eta erregularizatzeko jarduketak; eta kobratzeko jarduketak, prebentzio-neurriak lehenetsiz.

Prebentzio-jarduketak

Prebentzio-jarduketen helburua betetze-kultura indartzea eta iruzurra gertatu aurretik jokabide arriskutsuak saihestea da. Jarduketa hauen barrua sartzen dira, besteak beste, heziketa eta kontzientziazio fiskaleko neurriak, zergadunari laguntzeko tresnak hobetzea, prozedurak sinplifikatzea eta zergen arloko web aplikazioak azken arau-aldaketetara egokitzea.

Beste ekimen batzuen artean, Errenta kanpainako laguntza-programak foru aldundien azken aldaketen arabera eguneratuko dira eta hobekuntzak egingo dira autolikidazioak egiteko laguntzetan, abisu pertsonalizatuak eta datuen kontraste automatikoak eskaintzeko. Gainera  berariazko erregistro jakin batzuen kontrola indartuko da, hala nola gordailu fiskalen erauzgailuena, eta horien esparru operatiboa garatuko da hidrokarburoei lotutako eragiketen kontrol handiagoa bermatzeko.

Zerga Hezkuntzako programari eutsiko zaio, eta finkatu egingo dira ikastetxeetan egiten diren dibulgazio-ekintzak. Horrekin batera, informazio-jarduketa sektorialak eta kolektibo jakin batzuentzako prebentzio-komunikazioak bultzatuko dira errore errepikakorraren ereduak atzematen direnean, ez-betetze formalak edo materialak sortu aurretik jokabideak zuzentzeko.

Informazioa lortzeko eta erregularizatzeko jarduketak

Multzo honetan zerga-arloan garrantzia duen informazioa lortzera, araztera eta aztertzera bideratutako jarduketak biltzen dira, ez-betetzeak detektatzeko eta, hala badagokio, erregularizatzeko. Datuen kalitate-kontrolak indartuko dira autolikidazio eta aitorpen informatiboetan, baliozkotze automatikoen, informazio-gurutzatzeen eta kasu jakin batzuetako xehetasun-eskakizun berrien bidez, adibidez ondare-sozietateek higiezinak alokatzea.

Nazioarteko truke automatikoetatik, txanpon birtualei buruzko informazio-betebehar berrietatik eta bitartekaritza-plataforma digitalek emandako datuetatik datorren informazio berria integratuko da. Hau guztia datu-analisi masiboko ingurune teknologikoetan txertatuko da, arrisku fiskalen hautaketa, zergadunen arteko loturen azterketa eta egiaztapen-jarduketen plangintza hobetzeko.

Jarduketa espezifikoak aurreikusten dira ekonomia digitalean, kriptoaktiboetan, merkataritza elektronikoan eta sare sozialetako eduki-sortzaileen jardueran. Halaber, fakturazio-sistemen eta eragiketen erregistro-sistemen erabilera zuzena kontrolatzeko planak garatuko dira, bai eta eduki ekonomiko errealik gabeko fakturazioaren egiaztapenak ere.

Era berean egiaztapenak areagotuko dira ezkutuko ekonomiaren arrisku handiagoa duten sektoreetan, eskudiruaren erabilera intentsiboa duten jardueretan, higiezinen arloko negozioetan —apartamentu turistikoak barne—, eta ondare-sozietateen tributazio egokia egiaztatzeko jarduerak egiten jarraituko da, bai eta gehiengoan jarduera ekonomiko bati lotuta ez dauden ondasunez osatuta dauden aktiboen kasuan ere.

Nazioarteko fiskalitatearen eta enpresa-talde handien esparruan, berregituraketa-eragiketen, kenkarien eta pizgarri fiskalen eta plangintza fiskaleko balizko egitura artifizialen azterketa indartuko da.

Kobratzeko jarduketak

Kobrantza-jarduketen helburua zerga-zorren eraginkortasuna bermatzea da eta, behin horiek detektatuta, ez-betetze egoerak erregularizatzea. Jarduketa hauen barruan sartzen dira erantzukizuna erantzule solidarioei edo subsidiarioei bideratzea, kautelazko neurriak hartzea eta ondasunak eta eskubideak enbargatzeko eta besterentzeko prozedurak bultzatzea.

Ondare-betearazpena sustatuko da enkanteen bidez eta aktiboak egiteko beste formula batzuen bidez, zorra benetan berreskuratzeko eta hirugarren zordunekiko disuasio-efektua indartzeko. Aldi berean, kaudimengabezia diruditen baina zeharkako titulartasunen, ordainketa-txartelen edo xedapen-baimenen bidez ahalmen ekonomikoa duten zordunen ondare-ikerketa areagotuko da.

Jarduketa hauek finantza-informazioa gurutzatzean eta ondasunak ezkutatzeko edo errentak desbideratzeko zantzuak identifikatzeko aukera emango duten analisi-tresnetan oinarrituko dira, zerga-bilketaren eraginkortasuna hobetzeko eta zerga-sistemaren ekitatea bermatzeko.