Bizkaiko Foru Aldundiak gaur egindako Gobernu Kontseiluan 2024ko ekitaldirako Ertibil-Bizkaia Ikusizko Arteen Erakusketa Ibiltaria egiteko deialdia onartu dela iragarri du.

Deialdiaren helburu nagusia sortzen eta hazten ari diren artisten karreren lehen etapan  sormen-ekimenak bultzatzea  da, artista horiei euren lanak erakusteko, beste artista gazte batzuekin loturak ezartzeko eta euren ibilbide profesionalen garapenean aurrera egiteko aukera emanez. Ekimen honen helburua da, halaber, artista horien jarduera sortzailea suspertzea eta ikusizko arteen esparruan egiten duten lana bultzatzea.

Aurtengo ediziorako Aldundiak guztira 46.000 euro bideratuko ditu sortzen eta hazten ari diren artisten talentua ikusarazteko. Erakusketak 18 artelan izango ditu gehienez, eta Bizkaiko  hainbat udalerritan egongo dira ikusgai.

1983an lehen edizioa egin zenetik ERTIBILek sorkuntza-lana Bizkaian garatzen duten artista berrien laguntza eta sustapenarekiko konpromisoa hartu du.

Hautatutako lanek, gehienez ere 15, 2.000 euroko saria jasoko dute euren sorkuntza artistikoari laguntzeko eta arte bisualen esparruan sustatzen laguntzeko. Aldi berean sari bereziak emango zaizkie hautatutako hiru obrari: 7.000 euro, 5.000 euro eta 4.000 euro, hurrenez hurren, lortutako puntuazioen arabera.

Bizkaiko Foru Aldundiak, sari hauek emanez eta arte bisualetako erakusketa ibiltariak antolatuz, kultura sustatzeko eta sorkuntza artistikoa bultzatzeko konpromisoa berresten du.

Eskaerak eta agiriak aurkezteko epea 2024ko otsailaren 21etik 2024ko martxoaren 1eko 13:30ak arte egongo da zabalik. Eskaerak Bizkaiko Foru Aldundiaren egoitza elektronikoaren bidez egin ahal izango dira: www.ebizkaia.eus.

Halaber, lanak emateko epea 2024ko martxoaren 18, 19, 20 eta 21ekoa izango da, 9:30etatik 13:00etara, Basauriko Elkartegian (Cervantes etorbidea 49, 33. modulua).