Bizkaiko Foru Aldundiak Bizkaibusen sarea indartzen jarraitzen du lurraldeko hainbat eskualdetan aurreikusitako zerbitzu-hobekuntza berriekin, oraingo honetan, bereziki Lea Artibain eta Enkarterrin. Hobekuntza hauen xedea  ordutegiak zabaltzea, osasun-konexioak hobetzea eta garraio-eskaintza herritarren benetako mugikortasun-beharretara egokitzea da.

Lehenengo neurriak 2026ko ekainaren 1etik aurrera hasiko dira ezartzen eta eskualde-garraio publikoa pixkanaka hobetzeko estrategia zabalago baten parte dira. Jarduketa horiek, halaber,  2026an zehar eta 2027ko hasieran ere garatuko dira.

Lea Artibain, Bizkaibusek A3512, A3513 eta A3523 lineetako hainbat zerbitzu zabalduko ditu, hala arratsaldeko azken orduko konexioak nola goizeko lehen orduko espedizioak hobetuz. Aurreikusitako jarduketen artean nabarmentzekoa da Bilbotik 21:05ean irteten den eta gaur egun Gernikan amaitzen den azken zerbitzua Lekeitiora arte luzatzea, eta urteko egun guztietan Gernika eta Lekeitio artean espedizio gehiago egitea goizeko eta gaueko ordutegietan. A3523 linearen goizeko lehen orduko zerbitzua jaiegunetan ere emango da. Hemendik aurrera  beste irteera bat egingo da Gernikatik, 7:05ean, Lekeitiora joateko. Orain arte Gernika eta Lekeitio arteko lehen lotura jaiegunetan Bilbotik 8:05ean ateratzen zen A3523 linearen espedizioa zen. Aldaketa honekin zerbitzua bi ordu baino gehiago aurreratzen da.

Azkenik azpimarratu behar da A3512 lineak zerbitzu berri bat izango duela Bilbotik 21:45ean, autobidez egiten den zerbitzuari dagokionez arratsaldeko azken orduko ordutegia ordubetez luzatzeko aukera ematen duena, gaur egun linea horren Bilbotik Lekeitiorako azken irteera 20:45ean egiten delako.

Hobekuntza hauei esker eskualdeko mugikortasun-aukerak zabalduko dira eta nabarmen aurreratuko dira jaiegunetan erabilgarri dauden lehen zerbitzuak, itxaronaldiak murriztuz eta barne-konektibitatea hobetuz.

Gainera, Foru Aldundia Lekeitio eta Gernika eta Usansolo/Galdakaoko ospitaleen artean lotura zuzen berri bat sortzeko lanean ari da, eskualde osoan osasun-sarbidea hobetzeko, gaur egungoa baino zerbitzu azkarragoa eta lehiakorragoa eskainiz.

Aldi berean, Sailak landa-garraioko eredu berria ezarriko du Lea Artibairako, hurbileko lineetan eta minibusetan oinarritua, 2025ean Busturialdean ezarritako esperientzia hedatuz. Sistema berriak Lekeitio eta Markina inguruko landaguneak eta udalerriak lotuko ditu  eguneroko mugikortasun-beharretara hobeto egokitutako ordutegi eta maiztasun handiagoekin.

2026ko irailetik aurrera Bizkaiko Foru Aldundiak Ondarroa eta Markina-Xemeinen arteko konektibitatea bultzatzea aurreikusten du Bizkaibusen zerbitzuak pixkanaka indartuz, bereziki enpleguari lotutako mugikortasuna hobetzeko helburuarekin.

Aurreikusitako jarduketak autobidez egiten den Bilbo – Ermua – Ondarroa A3916 linean finkatuko dira. Kasu honetan Markina-Xemein eta Ondarroa artean goizeko lehen orduko espedizio gehiago egitea planteatzen da, eguneko lehen orduetatik industrialdeetara eta lantokietara sartzea bideratzeko. Proposamenak egungo zerbitzuaren hasiera nabarmen aurreratzea aurreikusten du eta, horrela, lan-ordutegietan  eskualdeko barne-konektibitatea indartzea.

Era berean, asteburuetan konexioak hobetzea ere aurreikusten da, Bilbotik datozen lehen zerbitzuekin modu eraginkorragoan lotzeko eta inguruko erabiltzaileentzako mugikortasun-aukerak hobetzeko aukera emango duten goizeko espedizio berrien bidez.

Osagarri gisa, Aldundia A3915 linearen barruan  arratsaldeko ordutegian Bilbo eta Ondarroa artean zerbitzu zuzen berri bat sartzea aztertzen ari da, bi eremuen arteko laneko eta eguneroko joan-etorrietarako alternatiba lehiakorragoa eta erosoagoa eskaintzeko helburuarekin.

2027an zehar Bizkaiko Foru Aldundiak landa-mugikortasuneko eredu berri bat ezartzea aurreikusten du Enkarterrirako, berariaz herrigune sakabanatuenen desplazamendu-beharrei erantzuteko eta Karrantza, Lanestosa, Sopuerta, Artzentales, Galdames edo Turtzioz udalerriak Bizkaibuseko enbor-linea nagusiekin lotzeko diseinatua. Helburua hurbileko garraio-sarea eratzea da, gune eta auzo txiki sakabanatuak eskualde-buruekin, zerbitzu-zentroekin eta garraio publikoaren lotura estrategikoekin lotzeko gai izango dena.

Landa-garraioko eredu berriak Enkarterrin eta Lea Artibain minibus txikiagoak sartzea aurreikusten du, landa-ibilbideetarako eta tokiko errepideetarako egokiagoak direlako, bai eta egungo egoerarekin alderatuta zerbitzuaren ordutegi-tarteak nabarmen handitzea ere. Asteko zazpi egunetan estaldura, ordutegi zabalagoak eta maiztasun erregularrak izango dituen sistema baterantz aurrera egitea aurreikusten da, biztanleriaren eguneroko mugikortasuna hobetzeko, bereziki enpleguari, osasun-arretari, hezkuntzari edo oinarrizko zerbitzuetarako sarbideari lotutako joan-etorrietan.

Barne-konektibitatea hobetzeaz gain, ekimenak lurralde-kohesioa indartzea eta landa-eremu jakin batzuen isolamenduari aurre egitea du helburu, garraio publikorako sarbide orekatuagoa bermatuz eta mugikortasun-eskaintza geografikoki eta biztanleriari dagokionez sakabanatuta dagoen eskualde baten ezaugarri espezifikoetara egokituz.