Amaia Antxustegi: "Zuen etxea irekitzen duzue, bai, baina, batez ere, aukera bat irekitzen duzue: segurtasunez, egonkortasunez eta maitasunez haztea"

Bizkaiko Foru Aldundiak, Gizarte Ekintza Arloko Familia Harrerari laguntzeko programako profesionalen taldearen bitartez, harrera-familien urteroko topaketaren beste edizio bat egin du gaur. Jardunaldia harrera-programa forala osatzen duten pertsonen arteko bizikidetzarako, aintzatespenerako eta loturak sendotzeko gune gisa egiten da. 2012tik familia harreragileak eta ume eta nerabeak biltzen dituen topaketak 50 familia baino gehiagoren parte-hartzea izan du gaur Bilbon, eta 200 pertsona inguru bildu ditu Itsasmuseumaren inguruan. Familia-harreraren egutegiko hitzordu garrantzitsu gisa finkatu arte urte hauetan zehar lurraldeko hainbat udalerri zeharkatu dituen jardunaldian Amaia Antxustegi foru diputatuak eta Maite Iturrate Administraziorako eta Gizarte Sustapenerako zuzendariak parte hartu dute.

Topaketa honek, gainera, ohiko esku-hartze edo prestakuntza testuinguruekin bat egiten duen espazioa eskaini du, non familiek eta, bereziki, umeek  antzeko egoerak bizi dituzten beste pertsona batzuekin esperientziak partekatu ahal izan dituzten. Espazio mota hauek kide izatearen zentzua indartzen eta hartutako adingabeen nortasuna bezalako funtsezko alderdiak lantzen laguntzen dute.

Goizean zehar txikienek adin taldeen arabera museoko hainbat gunetan antolatutako tailerretan parte hartu dute, eta familiek ere dinamikak partekatu dituzte auditorioan. Topaketan zehar une bereziki esanguratsuak sortu dira, hala nola harrera familia ezberdinetan bizi diren anai-arreben, harrera egonkorretan dauden umeen eta lehen urteetan zaindu dituzten larrialdiko familien arteko topaketa. Testuinguru horretan  nerabeek rol protagonista izan dute, jarduerak dinamizatzen lagundu dute eta txikienentzako erreferente gisa jardun dute, horrela, kide izatearen zentzua eta berdinen arteko harremanak indartuz. Beste alde batetik, jardunaldia harrera-familientzat ere bizipenak partekatzeko aukera izan da, familia-harreraren konplexutasuna eta balio erreparatzaile sakona bateratuz.

Amaia Antxustegik, Gizarte Ekintzako foru diputatuak, berariaz eskertu du familia horien guztien lana, eta familia-harreraren balio erreparatzailea azpimarratu du: "Gaur eskerrak eman nahi dizkizuet, bihotzez. Zuen etxea irekitzen duzue, bai, baina, batez ere, aukera bat irekitzen duzue: segurtasunez, egonkortasunez eta maitasunez haztea". Ildo horretatik harreraren esanahi sakonean jarri nahi izan du arreta: "Familia-harrera ez da bakarrik babes-neurri bat. Batez ere aukera bat da. Umeak eta nerabeak afektuzko, egonkortasunezko eta zaintzazko ingurune batean hazi ahal izateko aukera bat; pixkanaka konfiantza berreraikitzeko aukera bat, eta, askotan, baita berriro hasteko ere".

Halaber, topaketaren osagai emozional eta sinbolikoa nabarmendu du, harrera egiten dutenen konpromisoa aintzatesteko eta balioesteko gune gisa: umeen eta nerabeen ongizateari modu erabakigarrian laguntzen dion laguntza.

Antxustegik, gainera, harrerak komunitate osoan duen eragin eraldatzailea azpimarratu du: "Ez du soilik harreran hartzen denaren bizitza eraldatzen. Hartzen duena ere eraldatzen du. Izan ere harrerak erakusten digu zaintzea erantzukizun partekatua dela, haurtzaroa ezin dela zoriaren mende egon eta gizarte gisa maila eman behar dugula".

Babes-neurria eta lagundutako prozesua

Familia-harrera beharrezko babes-neurri onuragarria da harrera-araubidean dauden umeentzat, eta familien, adingabeen eta profesionalen arteko konpromiso partekatua eragiten du.

Bizkaian harrera mota desberdinak daude: urgentziazkoak (6 urtetik beherakoentzat, gehienez ere 6 hilabeteko iraupenarekin), aldi baterakoak (2 urtera arte, interes altuagoagatik luzatzeko aukerarekin), iraunkorrak (bi urte baino gehiagoko aurreikuspenarekin egiten diren harrera egonkorrak) eta espezializatuak (premia edo egoera bereziak dituzten umeentzat, prestakuntza edo esperientzia espezifikoa duten familietan egiten dena).

Prozesuaren barruan informazio-faseak (informazio-solasaldiak), prestakuntza, balorazio psikosoziala eta bizikidetzan laguntzea, gainbegiratze eta laguntza profesional espezializatuarekin, sartzen dira.  

Esparru horretan Gizarte Ekintzako foru diputatuak umeekiko konpromiso kolektiboaren garrantzia azpimarratu du, familia-harrerak inplikatutako gizartea behar duela azpimarratuz: zaintzen duen, laguntzen duen eta etxe bat behar duten umeak daudenean beste aldera begiratzen ez duen komunitate bat.

Ildo horretatik dei egin die bizkaitarrei urratsa emateko eta familia-harrerarekin bat egiteko, gogoraraziz ez dagoela familia perfekturik, baizik eta prestutasuna, konpromisoa eta laguntzeko gaitasuna duten familiak. Era berean keinu txiki bakoitzak garrantzia duela eta familia bakoitzak ume baten bizitzan desberdintasun esanguratsua markatu dezakeela azpimarratu du.

Diputatuak, gainera, laguntza-mezu bat helarazi nahi izan die aukera hori baloratzen ari direnei, azpimarratuz harrera-prozesuak babes profesional espezializatua, laguntza-egiturak eta esperientziak partekatzen dituzten eta elkarri eusten dioten familien sarea dituela.

Interesdunek 94 447 07 37 telefonoan edo acogimientofamiliar@bizkaia.eus posta elektronikoan eska dezakete informazioa edo programaren webgunean.