Gaur goizean, Bizkaia Euskaltel Digital Centerrek ateak ireki ditu ofizialki, Bilboko Euskadi plazan. Bizkaiko Foru Aldundiak eta Euskaltel Fundazioak bultzatutako gaikuntza digitala lantzeko zentro aitzindaria da. Horrela, Fundazioak euskal lurraldearen, haren kulturaren, hizkuntzaren eta biztanleriaren garapenarekin duen konpromiso irmoa berresten du.

Ekitaldian honako hauek izan dira: Meinrad Spenger, MasOrange taldeko CEOa; Ane Miren Ibañez, Bilboko Udala Eraberritzeko zuzendaria; Ainara Basurko, Bizkaiko Foru Aldundiko Ekonomia Sustatzeko diputatua; Jasone Altuna, Euskalteleko zuzendari nagusia; Nerea Enbeita, Euskaltel Fundazioko zuzendaria, eta Bizkaiko eta Euskadiko ekonomia-, hezkuntza- eta elkarte-sarearen ordezkari ugari.

Konpromisoa talentuarekin eta Euskadiko garapen sozioekonomikoarekin eta bertako herritarren eta enpresen garapenarekin
Bizkaia Euskaltel Digital Center Bizkaiko Foru Aldundiak EAEko hezkuntza-, enpresa- eta instituzio-arloko 43 erakunderekin lankidetzan bultzatutako Bizkaia with the talent ekimenaren barruan dago.

Euskaltel Fundazioa Euskadiko instituzio- eta enpresa-ingurunearen asmo handiko estrategia horretan sartuta, are gehiago indartzen da «Bizkaia with the talent» ekimenak STEM bokaziorik onena eta talentua bultzatzeko, trebetasun digitalak hobetzeko eta lurraldearen lehiakortasuna indartzeko duen konpromisoa, profil digitalen eta espezializatuen premia larriari erantzuteko.

Testuinguru horretan, zentro berria euskal komunitatean gaitasun digitaletarako sarbidea demokratizatzeko, talentua bultzatzeko, ekintzailetza teknologikoa sustatzeko eta inklusio digitala sustatzeko sortu da.

Elixabete Etxanobe Bizkaiko ahaldun nagusiak adierazi duenez, “Bizkaiak talentuaren aldeko apustua egiten du. Ez da eslogan bat. Enpresa, unibertsitate eta zentro teknologikoekin partekatutako konpromisoa da, Bizkaia with the talent estrategian. Bizkaia Euskaltel Digital Centerrekin, estrategia horrek beste urrats bat ematen du. Urrats garrantzitsua. Euskaltel Fundazioa sartzeak gure gaitasuna indartzen du. Publikoak eta pribatuak ikuspegi, konpromiso eta baliabideak partekatzen ditugunean lor dezakegunaren frogarik onena da zentro hau”.

Ahaldun nagusiak gaineratu duenez, «zentroak oso ondo islatzen du Bizkaia with the talent ekimenaren espiritua: erakundeak, enpresak eta gizarte-eragileak batzea talentu digitala hazteko, lurraldearen benetako premiekin lotzeko eta Bizkaiaren transformazioan motorra izateko».
Luz Usamentiaga Euskalteleko presidenteak adierazi duenez, «zentro honekin bete egiten dugu gure konpromisoa, hau da, gizarteari gaitasun eta trebetasun berriak eskuratzen laguntzea, lurraldeko talentu osoa indartzeko eta gaur egungo garapen teknologikoek berekin dakartzaten erronkei arrakastaz erantzuteko. Bizkaia Euskaltel Digital Center gure sustraiekiko konpromisotik sortu zen, eta etorkizunari ilusioz begiratzeko espazioa izan nahi du».

Euskal gizarte osoarentzako lankidetza eta prestakuntzarako topagunea
Bizkaia Euskaltel Digital Center hub berriak Euskadin prestakuntza- eta aurrerapen-erreferentea izan nahi du, pertsona guztientzako gaikuntza digitalaren sustapenean:  ezagutzak eguneratu nahi dituzten enpresak, profesionalki hazi nahi dutenak, aldaketetara egokitu nahi duten adinekoak, ekintzailetzan jardun nahi duten eta gizarte digital berriko lan-merkatuan sartu nahi duten gazteak.

Helburua da Euskadiko gizartearen eta ekoizpen-sarearen benetako premiei erantzutea, enplegua eskuratzeko eta garapen pertsonalerako funtsezko trebetasunak eskuratzea erraztuz.

Horretarako, hezkuntza-, gizarte-, enpresa- eta erakunde-arloko agenteak lankidetza publiko-pribatuko ingurune batean harremanetan jartzea nahi du, epe luzerako hazkunde- eta garapen-ikuspegiarekin.

Eskari handiko gaitasun digitalei buruzko prestakuntza, Europar Batasunaren eskakizunekin bat 
Bizkaiko zentro honetan gaur hasiko diren prestakuntza-programa guztiak bat datoz EBren Estrategia Digitalak definitutako funtsezko gaitasun digitalekin, eta eskari profesional handiko teknologia eta arloetan zentratuko dira: adimen artifiziala, zibersegurtasuna, 5G sareak, programazioa, 3D inprimaketa eta datuen analisia.

Prestakuntza-eskaintza segmentatutako ibilbideetan egituratuta dago, hartzaileen arabera, eta ikaskuntza praktikorako espazioak ditu, esperimentaziora bideratutako esperientziazko laborategien bidez.

Prestakuntza-eskaintza horretan, zuntz optikoaren instalazioari buruzko doako ikastaro teknikoak nabarmentzen dira, zeinetan prestakuntza teoriko-praktikoa eta sektoreko enpresa liderretako praktikaldi profesionala egiten baita.

Ekimen horrek erraztu egiten du telekomunikazioen sektorean kalitateko enplegua eskuratzea; izan ere, etorkizunean sektore hori haztea eta langile kualifikatuak eskatzea aurreikusten da.

Bestalde, zentroak umeentzako campus teknologikoak izango ditu, txiki-txikitatik STEM bokazioak pizteko eta teknologia modu irisgarri eta parte-hartzailean hurbiltzeko.

Azkenik, azpimarratu behar da Bizkaia Euskaltel Digitalek asmo irmoa duela euskal gizartean topagune irekia izateko, non esperientziak eta ezagutzeak partekatzen diren. 

Horretarako, zentroak, teknologia ez ezik, euskara, ekonomia, kultura eta berdintasunari lotutako gaiak ere landuko ditu, euskal lurraldearekin duen konpromisoa berresteko, eta, aldi berean, eraldaketa digitala, inklusiboa, parte-hartzailea eta aberasgarria bultzatzeko komunitatean.

Meinrad Spenger MasOrange-ko CEOak adierazi du zentroa, prestakuntza-zentro hutsa baino gehiago, konpromiso irmoa dela Euskadiren etorkizunarekin, eta bertatik, berrikuntza, inklusioa eta talentua bat eginik, gizarte konektatuagoa eta parte-hartzaileagoa eraiki nahi dela, hau da, XXI. mendeko erronketarako prestatuta dagoen gizartea.