Elixabete Etxanobe: "Bermeok erakusten dau posible dala nazinoartean presentzia daukan enpresa-jarduera bat Bizkaitik gestionetea, eta, era berean, ezagutzea, enplegua eta erabagiteko ahalmena berton mantentzea"

Elixabete Etxanobe Bizkaiko ahaldun nagusia Bermeon egon da gaur, atunaren eta hegaluzearen balio-katearen errealitatea bertatik bertara ezagutzeko eta, bereziki, katebegi nagusietako bi zuzen-zuzenean ezagutzeko: kontserba-industria eta atunontzi izoztaileak.

Lehenengo eta behin, Serrats Kontserbak enpresaren instalazioak bisitatu ditu. Familia-enpresa hori, 1890ean sortua, hegaluzearen, antxoen eta beste kontserba batzuen elaborazio artisauaren erreferentea da. Gaur egun, enpresa familiaren bosgarren belaunaldiaren eskuetan dago.

Ondoren, Etxanobe Bermeo Tuna elkarteko kontserba-enpresetako ordezkariekin bildu da, eta Bermeon eta Busturialdea-Urdaibain hain errotuta dagoen industria-jarduera horren bilakaeraz eta erronkez hitz egin dute.

Kontserba-industriak, enplegua eta ezagutza espezializatua mantentzeaz gain, arrantza-jarduera elikagaien eraldaketarekin, gastronomiarekin eta Bermeori estu lotutako itsas kulturarekin uztartzen du.

Etxanobek adierazi duenez, itsas jarduera oso errotuta dago gure lurraldean, gure nortasun ekonomikoaren parte da, eta, gainera, eboluzionatzeko, berrikuntzarako eta lehiatzeko gaitasun oso handia erakutsi du. Ahaldun nagusiak gaineratu duenez, enpresa horiek nola lan egiten duten zuzenean ezagutzean eta haien ardura duten pertsonei entzutean, hobeto ulertzen da Bermeori eta Bizkaiari ematen dioten balioa.

Ondoren, ahaldun nagusia Bermeo Tuna World Capital elkartearen egoitzara joan da, eta bertan, Bermeorekin lotutako atun-enpresa izoztaileetako ordezkariekin bildu da.

Bilera horretan, arrantza-jardueraren nazioarteko dimentsioa ezagutu ahal izan da; izan ere, hainbat ozeanotan garatzen bada ere, arrantzak enpresa-lotura handia du Bermeon, bertako erabaki-zentroen, enplegu kualifikatuaren, hornitzaileen, ezagutzaren eta berrikuntzaren bidez.

Ahaldun nagusiaren esanetan, Bermeok frogatzen du nazioartean presentzia duen enpresa-jarduera bat Bizkaitik bertatik kudeatu ahal dela, ezagutza, enplegua eta erabakitzeko gaitasuna bertan mantentzen diren bitartean; lurraldean errotuta eta, aldi berean, mundura irekita egotea ekosistema horren balio nagusietako bat da.

Bisitaldiak bi errealitate osagarri erakusteko aukera eman du: batetik, kontserba-industria bat, lurraldeari eta tokiko enpleguari estu lotua, eta bestetik, mundu mailako arrantza-enpresa batzuk, Bermeon enpresa-zentroak, ezagutza eta erabakitzeko gaitasuna mantentzen dituztenak.

Jardunaldia Bermeo Tuna Pintxo Tour ekitaldian parte hartu duen ostalaritza-establezimenduetako batean amaitu da, eta, horrela, balio-kate bereko arloetako ibilbidea osatu da, zehazki, arrantza-jarduera, elikagaien eraldaketatik eta gastronomia.

Bermeo, nazioarteko erreferentziako gunea

Bizkaia nazioarteko erreferentea da atunaren balio-kate osoan, hainbat arlo barne hartzen dituen ekosistema oso bati esker, hau da, arrantza, industria, logistika, teknologia, ikerketa zientifikoa eta prestakuntza. Aldi berean, Bizkaiko enpresek sektore tradizional baten errotzea, esportaziorako gaitasuna eta industria-bikaintasuna ordezkatzen dituzte. Aipatutako sektorea Bermeoko eta Bizkaiko motor ekonomikoetako bat da.

Testuinguru horretan, Bermeo Estatuko atun-sektorearen polo nagusia da, eta sektorearen inpaktuaren % 43 balio-kate osoan zehar. Bermeotik 45 itsasontzik egiten dute lan, hau da, Espainiako atunontzi guztien kopuruaren % 64k; horrek 1.490 milioi euroko inpaktu ekonomikoa eragiten du mundu osoan, eta balio-kate osoan zehar 20.747 lanpostu (zuzenak eta zeharkakoak) mantentzen ditu, Bermeon kokatutako enpresekin lotuta.

Izan ere, atun-sektorea Euskadiko ekonomia urdinaren adierazle estrategiko nagusietako bat da. Euskadiko atun-sektorearen balio-kateak 1.889 milioi euroko inpaktu ekonomikoa du mundu mailan; horietatik, 881 milioi Euskadin geratzen dira, 448 milioi arrantza-jarduerari lotuta eta 433 milioi eraldaketa-industriari lotuta.

EAEko enpresak Espainiako atun-sektorearen mundu mailako inpaktu ekonomikoaren % 55 dira, eta bederatzi enpresa-talde aritzen dira, 54 itsasontzirekin, Atlantikoan, Indian eta Ozeano Barean lanean.

 Jasangarritasunaren eta 2030 Agendaren aldeko apustua

Era berean, sektore hori Bizkaian sakon errotutako industria tradizionalaren eredua da, eta lehiakortasuna eta jasangarritasuna uztartuta, hazkunde-eredu baterantz eboluzionatzeko gai izan da. Haren jarduera ingurumen-, gizarte- eta ekonomia-jasangarritasunarekiko konpromiso irmoarekin garatzen da balio-kate osoan, Nazio Batuen Erakundeak onartutako Garapen Jasangarrirako Helburuekin (GJH) eta 2030 Agendarekin bat etorriz. Itsas baliabideen kudeaketa arduratsuaz gain, kalitateko enplegua sortu, berrikuntza bultzatu eta enpresak nazioartekotzeko ekarpena erabakigarria da.