Bizkaiko Batzar Nagusiek onartu egin dute Foru Aldundiko Gizarte Ekintza Sailaren testua, Laguntza Neurriak Emateko Institutua, Gaikuntza, barne hartzen eta arautzen duena, eta orain arteko Bizkaiko Tutoretza Erakundea (BTE) ordeztuko du. Arau testu berriak foru araudia egokitu du, 8/2021 Legea indarrean sartu zelako. Lege horrek ezgaitze judiziala ezabatu zuen, eta, ondorioz, urriaren 31ko 9/2000 foru araudia aldatu behar izan da.

Hogei urte baino gehiagoz, Bizkaiko Tutoretza Erakundearen (BTE) ardura izan da Bizkaian bizi diren adin nagusiko pertsonen tutoretza eta kuradoretza, ebazpen judizial baten bidez haien gaitasuna aldatu egin baita, bai eta gaitasuna aldatzeko prozesu baten mende daudenak auzitegietan defendatzea ere. Foru arau berri horrek Bizkaiko Tutoretza Erakundea sortzeko Foru Arauaren edukia desgaitasunaren paradigma eta esparru juridiko berrira egokitzen du.

Gaur Foru Ganberak onetsitako foru arauaren proposamena sei artikulutan egituratuta dago eta bere helburu nagusia da tutoretza ordeztea gaitasun juridikoa gauzatzeko laguntza sistema berri batekin, pertsonaren eskubideak, borondatea eta lehentasunak errespetatzen dituena. Sergio Murillo Gizarte Ekintzako foru diputatuak azpimarratutakoaren arabera: paradigma berri bat da desgaitasuna duten pertsonentzat, maila juridikoan eskubideen titularrak dira beti eta guk laguntza emango diegu.

Laguntza Neurriak Emateko Institutu (Gaikuntza) berrian tutoretza kenduko zaie adinez nagusikoei. Nolanahi ere, laguntza eta ordezkaritza kuradoretzak aurreikusi dira; bigarrena salbuespenetarako soilik, Foru Institutuak emango dituen laguntzazko neurri judizial gisa.

Foru diputatuak onetsi berri den Foru Arauan jasotako beste aldaketa garrantzitsu bat azpimarratu du, zehazki, justiziak egin beharko duela pertsona bakoitzaren neurrira egindako jantzi bat, desgaitasuna duen pertsonak bere gaitasuna baliatzeko behar duen laguntza judizial zehatza ezarrita, eta Aldundiak erakunde horren bidez erantzun beharko du. Erakunde guztiak lerrokatzen ari gara, egiten ari garena eta hori nola egiten ari garen bateratzeko, laguntza behar duten pertsonei ematen dizkiegun erantzunak ahalik eta gehien pertsonalizatzeko, adierazi du Sergio Murillok osoko bilkuran.

Arau aldaketa bat da desgaitasunen bat duten pertsonen eskubideei buruzko Nazio Batuen Konbentzioari (New Yorkeko Konbentzioa, 2006ko Konbentzioa, desgaitasunen bat duten pertsonen eskubideei buruzko ibilbide orri berri bat ezarri zuena) eta desgaitasunen bat duten pertsonei gaitasun juridikoa baliatzen laguntzeko legeria zibila eta prozesala erreformatu zuen ekainaren 2ko 8/2021 Legeari egokitzea.