Bizkaiko Foru Aldundiak gaur egin duen gobernu kontseiluan urtero lurraldean hondakinen kudeaketa eraginkorra eta jasangarria sustatzeko laguntzen ildoa onetsi du. Dirulaguntza hauek milioi bat eurorekin hornituta daude, eta udal eta mankomunitateei zuzenduta daude, Foru Erakundeak ezarritako helburu orokorretan aurrera egiteko aukera emango duten hainbat jarduketa gara ditzaten  Europar Batasunak ezarritako hierarkiaren arabera hondakinetan dauden baliabideak aprobetxatzeko. Azken finean, tokiko erakunde hauek motibatu eta lagundu nahi dira, konpostajea sustatzeko eta prebentzioa, berrerabilera eta gaikako bilketa areagotzeko.

Laguntza hauek toki-erakundeek sei eremutan hartutako neurriak finantzatuko dituzte:

• Hondakinen prebentzioa eta ingurumen-hezkuntza (arlo hauetarako laguntzen aurrekontu orokorretik 300.000 euro bideratzen dira). Eremu honetan aurtengo dekretuan garatutako berrikuntzarik gehienak sartu dira diruz lagundu daitezkeen ekimen gisa. Horien artean, aire zabaleko, hala nola tokiko jaietan, azoketan edo kontzertuetan, ekitaldi publikoetan hondakinak (edalontziak, platerak, mahai-tresnak...) sortzea saihestuko duten material berrerabilgarriak erostea; espaloiko edukiontziak etiketatzea edo binilatzea, edukiontzi horietako bakoitzean sartu beharreko hondakinak identifikatu ahal izateko; ekimen propioagatik edo Libera, Let's clean Up Euskadi edo antzeko beste proiektu batzuen esparruan sakabanatutako zaborra (littering) biltzeko, kontabilizatzeko eta karakterizatzeko ekitaldiak antolatzea; eta Hondakinen Prebentziorako Europako Asterako (EWWR) ekintzak antolatzea.
• Hondakinak biltzeko eta kontabilizatzeko prozesua digitalizatzea (200.000 euro); ataza hau,  adibidez, telekontrol- eta identifikazio-sistemak ezarriz burutu daiteke.
• Aholkularitza teknikoa eta prestakuntza (100.000 euro), eraikuntza- eta eraispen-hondakinen kudeaketara eta edukiontzien optimizaziora bideratutako udal-ordenantzak garatzeko. Eremu honen barruan sartzen dira, halaber, hondakinak kudeatzeko eta/edo prebenitzeko tokiko planak idaztea, edo hondakinen udal edo eskualde mailako laginketak, karakterizazioak eta konposizio-azterketak egitea.
• Bilketa espezifikoak (100.000 euro), hala nola legez kanpoko isurketak jaso eta ezabatzeko sistemak edo tresna elektriko eta elektronikoen hondakinak atez ate biltzeko sistemak ezartzea.
• Berotegi-efektuko gasen emisioak murrizten dituzten hobekuntza teknologikoak dituzten hondakinak biltzeko ibilgailuak erostea (100.000 euro).
• Kudeaketarako baliabideetan egindako inbertsioa (200.000 euro). Aurten, lehen aldiz, eremu honen barruan sartzen da udalek eta mankomunitateek etxeko toxikoak biltzeko edukiontzi espezifikoak erostea, tresneria (zartaginak, kazolak, baxerak...), plastikoak, zurak eta ontziak ez diren metalak; partikularren lurra eta obra-hondakinak, kafe-kapsulak eta udalerrietan bildu ohi ez diren bestelako hondakinak.

Aurtengo dekretuak, halaber, udalek eta mankomunitateek jaso beharreko dirulaguntzaren ordainketa bi zatitan egitea ezartzen du: % 90 emakidaren unean, eta gainerako % 10 erosketa justifikatu denean, toki-erakundeek edozein erosketa egin aurretik laguntza hori eskura dezaten eta inbertsioa aurreratu behar ez dezaten.

Udalek eta mankomunitateek eskuratu ahal izango duten zenbatekoa garatu beharreko ekintzaren kostuaren % 100era iritsi daiteke; dena dela, toki-erakundeek 80.000 euroko gehieneko zenbatekoa izango dute 20.000 biztanletik beherako udalerrien kasuan eta 120.000 eurokoa 20.000 biztanletik gorako udalerrietan.

Laguntzak norgehiagoka-erregimenean emango dira, eta apirilaren 15era arte eskatu ahal izango dira.