Bizkaiko Foru Aldundiak eta Barakaldoko Udalak bultzada emango diote industria-herriko espazio enblematiko eta historiko baten eraldaketa integralari: Bizkaiko Labe Garaiek Sestaon eta Ansion zituzten plantak Lutxana auzoaren bidez lotzen zituen trenbide zaharra. Bi erakundeek lankidetza-hitzarmen bat sinatu zuten azaroan, fabriken arteko errepide zahar hori berreskuratu eta modernizatzeko lanak egite aldera.

Proiektuaren asmoa da eremua erabat berritzea; horretarako, elementu hauek guztiak eraiki edo jarriko dira: noranzko bikoitzeko errepide bat, biribilgune berri bat, oinezko eta bizikletentzako sarbideak -igogailu bat barne-, berdeguneak eta zuhaitz berriak.

Helburua da Barakaldoko hiri-lotura indartzea, itsasadarrerantz zein BECen ingururantz, eta, gainera, A-8 autobidetik udalerrira iristeko erraztasuna hobetzea, eremuko trafikoa berrantolatuz. Jarduketa horrek lotura berri bat eratuko du BI-739 errepide zaharrarekin, eta, hala, hobetu egingo dira Serralta zumarkalera eta azoka-esparrura iristeko sarbideak.

Gaur goizean, Bizkaiko ahaldun nagusik Elixabete Etxanobek eta Amaia del Campo alkateak, proiektua egingo den eremua bisitatu, eta etorkizuneko jarduketaren diseinuak erakutsi dituzte. Jarduketan, 8,5 milioi euro inbertituko dira guztira. Kopuru horretatik, Bizkaiko Foru Aldundiak 6 milioi jarriko ditu, eta Barakaldoko Udalak, berriz, 2,5 milioi. Lanak 2026ko bigarren seihilekoan hasiko dira, eta 15 hilabete iraungo dute 2028ko lehenengo seihilekora arte.

Bisitan, bi arduradunek rokodromoaren tunelaren ingurua zeharkatu dute, Metro Bilbaoren Ansioko geltokitik hurbil. Inguru hori eraldaketa nabarmena izango duten guneetako bat da. Aurkeztutako diseinuen arabera, noranzko bikoitzeko errepidea eta oinezkoen pasealeku goratua izango ditu, hiri-integrazioa eta segurtasuna hobetzeko.

Jarduketak BECen eta Serraltako futbol-zelaiaren arteko tarteari eragingo dio, eta barne hartuko ditu ibilgailuen zirkulaziorako galtzada erabat berritzea, espaloi zabalak eraikitzea eta 240 bat aparkaleku-plaza berri sortzea, ilaran zein perpendikularki jarrita. Gainera, proiektua dago biribilgune bat eraikitzeko Serralta zumarkalearen eta Andikollano kalearen artekoko bidegurutzean, bide-segurtasuna areagotze aldera.

Proiektuaren elementu nabarmenen artean daude, halaber, igogailu berria eta eskailerak, Serraltaren eta Gurutzetaren arteko lotura hobetuko baitute. Inguru hori garatzeko bidean dago, etxebizitza berriak eraikitzen ari baitira. Eremu horretan, gainera, Serralta zumarkalearen azpian dagoen oinezkoen lurpeko pasabidea kenduko da.

Mugikortasun jasangarria funtsezkoa izango da eraldaketa horretan, kilometro bat luzeko bidegorri bat sortuko baita, udalerriko gainerako bizikleta-bideekin lotuko dena. Pasealeku berriak argi eta zerbitzu berrituak izango ditu, bai eta zuhaitz eta landare berriak ere (59 zuhaitz, eta 1.800 landare baino gehiago), ibilbide osoan zehar.